Yobi Ke Landa Kukangama na Nzambi

KETI muntu lenda landa kukangama na Nzambi kana yandi me kutana ti bampasi ya ngolo kibeni mpi kana bulemfu na yandi ke natila yandi ve mambote ata fioti? Mambu yina kuminaka Yobi sadisaka na kupesa mvutu na ngiufula yai.

Ntangu bantu ya Izraele vandaka na Ezipte, Yobi mpangi ya Abrahami, vandaka kuzinga na kisika yina bo ke bingaka bubu yai nde Arabie. Na ntangu yina, bawanzio na zulu vukanaka na ntwala ya Nzambi mpi Satana kotaka na kati na bo. Yehowa songaka kimvuka yina ya bawanzio nde yandi vandaka kutudila nsadi na yandi Yobi, yina vandaka kukangama na yandi, ntima. Ya kieleka, Yehowa tubaka nde muntu mosi ve vandaka kukangama na yandi bonso Yobi. Kansi Satana tubaka nde Yobi vandaka kusadila Nzambi kaka sambu Nzambi vandaka kusakumuna yandi mpi kutanina yandi. Satana tubaka nde kana bo botula Yobi bima yonso yina yandi kele na yo, yandi ta singa Nzambi.

Nzambi pesaka Satana nzila ya kubotula Yobi bimvwama na yandi, ya kufwa bana na yandi mpi ya kulosila yandi maladi. Yobi vandaka ve kuzaba nde Satana muntu vandaka kunatila yandi bampasi, yo yina yandi vandaka kudiyula sambu na nki Nzambi pesaka nzila nde yandi kutana ti bampasi yina. Ata mpidina, Yobi singaka ve Nzambi ata fioti.

Banduku na yandi tatu ya mbi kwisaka kutala yandi. Bo tubaka mambu mingi yina bo me sonikaka na mukanda ya Yobi. Banduku na yandi sosaka kundimisa yandi nde Nzambi muntu pesaka yandi ndola sambu na masumu yina yandi vandaka kubumba. Bo tubaka nkutu nde Nzambi ke zolaka ve bansadi na yandi mpi nde yandi ke tudilaka bo ve ntima. Ata mpidina, Yobi buyaka kulanda bangindu na bo ya mbi. Yo yina yandi tubaka ti kundima yonso nde yandi ta landa kukangama na Nzambi tii kuna yandi ta fwa!

Kansi Yobi salaka kifu mosi ya kutuba nde yandi vandaka muntu ya kuluta mbote. Leke Elihu, yina vandaka kulanda masolo yonso ya Yobi ti banduku na yandi, sadisaka bo na kukatula bangindu yina. Elihu pesaka Yobi foti sambu Yobi vandaka ve kunwanina lukumu ya luyalu ya Yehowa Nzambi kansi yandi vandaka kudiyangisa mingi sambu na lukumu na yandi mosi mpi yandi vandaka kutuba nde yandi vandaka muntu ya kuluta mbote. Diaka, Elihu nganinaka ngolo banduku ya Yobi.

Na nima, Yehowa Nzambi solulaka ti Yobi sambu na kusadisa yandi na kukatula bangindu na yandi yina. Yehowa sadilaka bambandu ya bima mingi ya kitoko yina yandi me salaka sambu na kusadisa Yobi na kubakisa nde muntu kele fioti kibeni na ntwala ya Nzambi. Yobi ndimaka ti kudikulumusa ya mingi bandongisila yina Nzambi pesaka yandi. “Yehowa kele kibeni ti lutondo mpi yandi ke wilaka bantu mawa,” yo yina yandi belulaka Yobi, pesaka yandi diaka bimvwama mingi mbala zole kuluta yina yandi vandaka na yo ntete mpi yandi pesaka yandi diaka bana kumi. (Yakobo 5:11) Yobi kangamaka kaka na Nzambi ata yandi vandaka kukutana ti bampasi ya ngolo, yo yina yandi monisaka nde Satana kele luvunu mutindu yandi ke tubaka nde bantu ta kuka ve kukangama kaka na Nzambi kana bo ke kutana ti bampasi.

—Beto me baka bangindu yai na mukanda ya Yobi.