Rebeka Salaka Yonso Sambu na Kusepedisa Yehowa

Rebeka vandaka nkento yina vandaka kuzola Yehowa. Zina ya bakala na yandi vandaka Izaki. Yandi mpi vandaka kuzola Yehowa. Inki mutindu Rebeka kutanaka ti Izaki? Inki mutindu Rebeka monisaka nde yandi salaka yonso sambu na kusepedisa Yehowa? Bika beto longuka disolo na yandi.

Abrahami mpi Sara vandaka bibuti ya Izaki. Bo vandaka kuzinga na Kanana, insi yina bantu vandaka ve kusambila Yehowa. Kansi Abrahami zolaka nde mwana na yandi kukwela nkento yina ke sambilaka Yehowa. Yo yina yandi tindaka nsadi na yandi, ziku Eliezere, na kusosa nkento sambu na Izaki na Arani, kisika bampangi ya nkaka ya Abrahami vandaka kuzinga.

Eliezere mpi bansadi ya nkaka ya Abrahami salaka nzietelo. Yo vandaka nzietelo mosi ya nda. Bo kwendaka ti bashamo kumi yina nataka madia mpi bakado. Inki mutindu Eliezere zolaka kuzaba nkento yina yandi ta pona sambu na Izaki? Ntangu Eliezere mpi bansadi ya nkaka ya Abrahami kumaka na Arani, bo telamaka pene-pene ya dibulu mosi ya masa sambu Eliezere zabaka nde ntama mingi ve bantu ta kwisa kubaka masa. Yandi sambaka Yehowa mpi tubaka nde: ‘Kana mono lomba leke mosi ya nkento masa mpi yandi pesa mono ti bashamo na mono, mono ta zaba nde yandi kele nkento yina nge me pona.’

Na ntangu yina leke Rebeka kwisaka na dibulu ya masa. Biblia ke tuba nde yandi vandaka kitoko mingi. Eliezere lombaka yandi masa, mpi Rebeka tubaka nde: ‘Ee. Mono ta pesa nge masa, ebuna mono ta baka mpi masa sambu na bashamo na nge.’ Yindula fioti! Bashamo ke nwaka masa mingi kibeni kana bo kele na mpusa ya masa; yo yina Rebeka fwete baka masa na dibulu mbala na mbala. Keti nge ke mona yandi na kifwanisu mutindu yandi ke sala kisalu ya ngolo?— Eliezere yitukaka na mutindu Yehowa pesaka mvutu na kisambu na yandi.

Eliezere pesaka Rebeka bakado mingi ya kitoko. Mpi Rebeka bingisaka Eliezere ti bansadi ya nkaka na nzo na bo. Eliezere zabisaka bo kikuma yina Abrahami tindaka yandi kuna mpi monisaka mutindu Yehowa pesaka mvutu na kisambu na yandi. Dibuta ya Rebeka ndimaka nde Izaki kukwela yandi.

Keti nge ke yindula nde Rebeka ndimaka na kukwelana ti Izaki?— Rebeka zabaka nde Yehowa muntu tindaka Eliezere kuna. Yo yina, ntangu dibuta ya Rebeka yulaka yandi kana yandi me ndima kukwenda na Kanana mpi kukwelana ti Izaki, yandi tubaka nde: ‘Ee, mono me ndima kukwenda.’ Na mbala mosi, yandi kwendaka ti Eliezere. Ntangu bo kumaka na Kanana, bo kwelanaka ti Izaki.

Sambu Rebeka lungisaka lukanu ya Yehowa, Yehowa sakumunaka yandi. Na nima ya bamvula mingi, Yezu butukaka na dibuta na yandi! Kana nge ke landa mbandu ya Rebeka mpi ke sepedisa Yehowa, yandi ta sakumuna nge mpi.