Landa Kukangama ti Organizasio ya Yehowa

LONGOKI Yakobo sonikaka nde: “Beno kwenda pene-pene na Nzambi, ebuna yandi ta kwisa pene-pene na beno.” (Yak. 4:8) Ya kieleka ata beto kele bantu ya kukonda kukuka, Yehowa kele ve na zulu mingi to ntama mingi kibeni sambu na kuwa bisambu na beto. (Bis. 17:27) Inki mutindu beto lenda kwenda pene-pene na yandi? Beto lenda sala yo kana beto ke sala kinduku ya ngolo ti Yehowa mpi ke samba yandi na masonga yonso. (Nk. 39:12) Beto lenda kuma mpi banduku ya Nzambi kana beto ke longuka mbala na mbala Ndinga na yandi Biblia. Na mutindu yina, beto ke zabaka Yehowa Nzambi, balukanu na yandi mpi luzolo na yandi sambu na beto. (2 Tim. 3:16, 17) Mpidina, beto ke longukaka na kuzola Yehowa mpi beto ke kumaka kuwa boma ya kusala mambu yina ta pesa yandi mpasi.—Nk. 25:14.

² Kansi beto lenda kwenda pene-pene na Yehowa kaka na nzila ya Mwana na yandi, Yezu. (Yoa. 17:3; Bar. 5:10) Katula Yezu, ata muntu mosi ve lenda sadisa beto na kuzaba mbote mutindu Yehowa ke yindulaka. Yandi zabaka mbote-mbote Tata na yandi, yo yina yandi tubaka nde: “Ata muntu mosi ve kuzaba kana Mwana kele nani katula kaka Tata, mpi ata muntu mosi ve kuzaba kana Tata kele nani katula kaka Mwana mpi konso muntu yina Mwana ke zola kumonisa yandi Tata.” (Luka 10:22) Yo yina, ntangu beto ke longuka Baevanzile sambu na kuzaba mutindu Yezu vandaka kuyindula mpi kudiwa, beto ke longukaka kibeni na kuzaba mutindu Yehowa ke yindulaka mpi ke kudiwaka. Kuzaba mambu yai ke sadisaka beto na kukwenda kibeni pene-pene ya Nzambi na beto.

³ Beto lenda kuma banduku ya Yehowa na lutwadisu ya Mwana na yandi, kana beto ke kangama ngolo ti kitini ya organizasio na yandi yina ke monanaka mpi yina ke sadisaka beto na kuzaba mutindu ya kusala luzolo na yandi. Mutindu Biblia tubilaka yo na Matayo 24:45-47, Mfumu, disongidila Yezu Kristu, me ponaka “mpika ya kwikama mpi ya mayele” sambu na kupesa bantu ya nzo ya lukwikilu ‘madia na ntangu ya me fwana.’ Bubu yai, mpika ya kwikama ke pesaka beto madia mingi ya kimpeve. Na nzila ya mpika ya kwikama, Yehowa ke longisila beto na kutanga Ndinga na yandi konso kilumbu, na kukwenda na balukutakanu na beto ya Bukristu mbala na mbala mpi na kusala mingi na kisalu ya kusamuna ‘nsangu ya mbote ya Kimfumu.’ (Mat. 24:14; 28:19, 20; Yoz. 1:8; Nk. 1:1-3) Beto fwete tadila ve ata fioti mpika ya kwikama na disu ya kimuntu. Beto fwete sala ngolo sambu na kulanda kukangama ti kitini ya organizasio ya Yehowa ya ke monanaka mpi na kulanda lutwadisu na yo. Yo ta sala nde beto kwenda pene-pene na Yehowa Nzambi na beto, beto vanda kikesa mpi na lutaninu ata beto kutana ti mimekamu.

SAMBU NA NKI MIMEKAMU KE KUMA MINGI?

⁴ Ziku nge me sala bamvula mingi na kieleka. Kana mpidina, ntembe kele ve nde nge me kutanaka dezia ti mambu yina me mekaka kwikama na nge. Kansi, ata nge me zaba Yehowa ntama mingi ve mpi nge me yantika kuvukana ti bansadi na yandi, nge me zaba nde Satana Diabulu ke nwanisaka konso muntu yina ke lemfukaka na kimfumu ya Yehowa. (2 Tim. 3:12) Yo yina, yo vanda nge me kutanaka ti mimekamu ya nene to ya fioti, yo kele ve mfunu nde nge kuma boma-boma to nge lemba nitu. Yehowa ke sila nde yandi ta sadisa nge mpi ta pesa nge lufutu sambu yandi ta gulusa mpi ta pesa nge luzingu ya mbote na bilumbu ke kwisa.—Baeb. 13:5, 6; Kus. 2:10.

⁵ Beto yonso lenda kutana ti mimekamu na bilumbu yai ya me bikala sambu na nsi-ntoto ya Satana. Banda ntangu Nzambi tulaka Kimfumu na yandi na 1914, Satana ke vandaka diaka ve ti nswa ya kukota na zulu, kisika Yehowa ke vandaka. Bo losaka yandi na ntoto, kisika bo me kangaka yandi ti bawanzio na yandi. Mpasi ya ke kuma kaka mingi na ntoto mpi mbangika ya ngolo yina bansadi ya me kudipesaka na Yehowa ke kutana ti yo, ke monisa nde Satana kele na makasi mpi nde beto ke zinga na bilumbu ya nsuka ya luyalu na yandi ya mbi.—Kus. 12:1-12.

⁶ Satana ke vandaka na makasi sambu bo me losaka yandi na ntoto mpi sambu yandi me zaba nde ntangu na yandi me bikala fioti. Yandi ti bademo na yandi ke salaka yonso sambu na kubuyisa kisalu ya kusamuna nsangu ya Kimfumu mpi kubebisa bumosi ya bansadi ya Yehowa. Yo yina, mutindu Biblia ke tuba, beto ke nwanaka bitumba ya kimpeve sambu “beto ke nwanaka ve ti menga mpi nsuni, kansi beto ke nwanaka ti baluyalu, ti bankwa kiyeka, ti bamfumu ya nsi-ntoto yai ya mpimpa, ti bampeve ya mbi yina kele na bisika ya zulu.” Kana beto ke zola kununga bitumba yina na lweka ya Yehowa, beto fwete yambula ve kunwana mpi beto fwete tanina binwaninu na beto ya kimpeve. Beto fwete ‘telama ngolo na ntwala ya mayele ya mbi’ ya Diabulu. (Baef. 6:10-17) Yo yina yo ke lomba nde beto kanga ntima.

BETO YEDISA KUKANGA NTIMA

⁷ Kukanga ntima kele “makuki ya kunwana ti bampasi to kigonsa.” Na mutindu ya kimpeve, kukanga ntima kele kikalulu ya kulanda kusala mambu ya mbote ata beto ke kutana ti bampasi, kimbeni, mbangika to konso kima yina ke sosaka kubebisa kwikama na beto na Nzambi. Yo ke lombaka kuyedisa kikalulu yai ya Bukristu. Kusala yo ke lombaka ntangu. Beto ke kumaka kibeni kukanga ntima kana beto ke yela na kimpeve. Kana beto ke kanga ntima na mambu ya fioti-fioti yina ke mekaka lukwikilu na beto ntangu beto me yantika luzingu na beto ya Bukristu, beto ke kumaka ngolo mingi mpi ke kangaka ntima na bampasi mingi yina lenda kumina beto. (Luka 16:10) Beto fwete kinga ve nde mimekamu ya ngolo kukumina beto na ntwala ya kubaka lukanu ya kutelama na lukwikilu. Beto fwete baka lukanu yina na ntwala nde beto kutana ti mimekamu. Sambu na kumonisa nde yo ke lombaka kuyedisa kikalulu ya kukanga ntima kumosi ti bikalulu ya nkaka ya ke sepedisaka Nzambi, ntumwa Piere sonikaka nde: “Beno sala ngolo kibeni sambu beno yika na lukwikilu na beno bikalulu ya mbote, na bikalulu na beno ya mbote nzayilu, na nzayilu na beno kudiyala, na kudiyala na beno kukanga-ntima, na kukanga-ntima na beno kukangama na Nzambi, na kukangama na beno na Nzambi zola ya kimpangi, na zola na beno ya kimpangi zola.”—2 Pie. 1:5-7; 1 Tim. 6:11.

⁸ Mambu yai ya Yakobo sonikaka na mukanda na yandi ke benda dikebi na beto na yina me tala mfunu ya kuyedisa kikalulu ya kukanga ntima: “Bampangi na mono, beno vanda na kiese ntangu beno ke kutana ti mimekamu ya mutindu na mutindu, sambu beno ke zaba nde lukwikilu na beno yina me mekama ke butaka kukanga-ntima. Kansi, bika kukanga-ntima kumanisa kisalu na yo, sambu beno vanda ya kukuka mpi ya kukonda kifu na mambu yonso, mpi beno konda ata kima mosi ve.” (Yak. 1:2-4) Yakobo ke tuba nde Bakristu fwete ndima mimekamu mpi kusepela kana yo me kumina bo sambu yo ke sadisaka beto na kuyedisa kikalulu ya kukanga ntima. Keti nge ke tadilaka mambu mutindu yai? Na nima, Yakobo ke monisa nde kukanga ntima yo mosi ke sadisaka beto na kutomisa kimuntu na beto ya Bukristu mpi yo ke salaka nde Nzambi kundima beto kibeni. Ya kieleka, kikalulu na beto ya kukanga ntima ke kumaka ngolo konso kilumbu ntangu beto ke kutanaka ti mimekamu mpi ke nungaka yo. Na nima, kikalulu ya kukanga ntima ke butaka bikalulu ya nkaka ya mfunu yina beto ke vandaka ti yo mfunu.

⁹ Yehowa ke sepelaka ti kikalulu na beto ya kukanga ntima. Yandi ta pesa beto luzingu ya mvula na mvula sambu na kikalulu yai. Yakobo tubaka diaka nde: “Kiese na muntu yina ke landa kukanga ntima na mumekamu, sambu kana Nzambi ndima yandi, yandi ta baka mpu ya kimfumu ya luzingu, yina Yehowa me silaka na bantu yina ke landaka kuzola Yandi.” (Yak. 1:12) Ya kieleka, beto ke kangaka ntima sambu beto ke vandaka ti kivuvu yai. Beto lenda bikala ve na kieleka kana beto ke kanga ve ntima. Kana beto ke landa bupusi ya nsi-ntoto, yo ta pusa beto na kuvutuka kuna. Kana beto ke kanga ve ntima, Yehowa ta pesa beto diaka ve mpeve na yandi mpi beto ta butaka diaka ve mbuma na yo na luzingu na beto.

¹⁰ Sambu na kulanda kukanga ntima na bantangu yai ya mpasi, beto fwete landa kuvanda ti mabanza ya mbote sambu na bampasi ya beto ke kutana ti yo sambu beto kele Bakristu. Kuvila ve nde Yakobo sonikaka nde: “Beno vanda na kiese.” Kusala mutindu yai lenda vanda ve pete, sambu mimekamu lenda natila beto bampasi ya kinsuni to ya mabanza. Kansi, kuvila mpi ve nde yo ke tadila luzingu na nge na bilumbu ke kwisa. Mambu yina kuminaka bantumwa ke sadisaka beto na kubakisa mutindu beto lenda vanda na kiese ntangu beto ke kutana ti bampasi. Disolo yango kele na mukanda ya Bisalu. Yo ke tuba nde: “Bo bingaka bantumwa, bo bulaka bo fimbu, mpi bo pesaka bo nsiku ya kuyambula kutuba na zina ya Yezu, ebuna bo yambulaka bo. Bo katukaka na Sanedreni, bo vandaka na kiese sambu bo monaka nde bo me fwana nde bo pesa bo nsoni sambu na zina na yandi.” (Bis. 5:40, 41) Bantumwa bakisaka nde bampasi yina vandaka kumonisa nde bo vandaka kulemfuka na ntuma ya Yezu mpi nde Yehowa vandaka kundima bo. Mwa bamvula na nima, ntangu Piere sonikaka mukanda na yandi ya ntete na nsadisa ya mpeve santu, yandi tubilaka mfunu ya kuniokwama sambu na mambu ya lunungu.—1 Pie. 4:12-16.

¹¹ Beto tubila mambu ya nkaka yina Polo ti Silasi kutanaka ti yo. Ntangu bo vandaka kusala kisalu na bo ya kimisionere na Filipo, bo kangaka bo mpi bo fundaka bo nde bo vandaka kutula mavwanga na mbanza mpi kulonga bikalulu yina ke wakana ve ti nsiku. Yo yina, bo bulaka bo ngolo kibeni mpi bo tulaka bo na boloko. Disolo ya Biblia ke monisa nde ntangu bo vandaka na boloko ti bamputa ya kukonda kusansa “pene-pene ya midi ya mpimpa, Polo ti Silasi vandaka kusamba mpi kuyimba sambu na kukumisa Nzambi, mpi bantu ya boloko vandaka kuwa bo.” (Bis. 16:16-25) Polo ti Silasi bakisaka kibeni nde bampasi yina bo monaka sambu na Kristu vandaka kumonisa kwikama na bo na meso ya Nzambi mpi ya bantu. Yo vandaka mpi sambu na bo dibaku ya kusamuna diaka mingi na bantu yina vandaka na mfunu ya kuwa nsangu ya mbote. Yo vandaka kutadila mpi luzingu ya bantu ya nkaka. Kaka na mpimpa yina, mfumu ya boloko ti dibuta na yandi waka nsangu mpi bo kumaka balongoki. (Bis. 16:26-34) Polo ti Silasi tulaka ntima na Yehowa, na ngolo na yandi mpi na luzolo na yandi ya kusadisa bo na bampasi yina. Nzambi yambulaka bo ve.

¹² Bubu yai mpi, Yehowa me pesaka beto lusadisu yina beto ke vandaka na yo mfunu sambu na kulanda kuvanda ngolo na bantangu ya mpasi. Yandi ke zolaka nde beto kanga ntima. Yandi me pesaka beto Ndinga na yandi sambu yo sadisa beto na kubakisa mbote-mbote lukanu na yandi. Yo ke tungaka lukwikilu na beto. Beto ke vandaka ti dibaku ya kuvukana ti bampangi-Bakristu mpi ya kusala kisalu ya santu. Beto ke vandaka mpi ti dibaku ya kutanina kinduku ya ngolo ti Yehowa yandi mosi na nzila ya kisambu. Yandi ke waka bisambu yina beto ke salaka sambu na kukumisa yandi mpi kulomba yandi na masonga yonso lusadisu sambu beto bikala bunkete na meso na yandi. (Bafil. 4:13) Diaka, beto ke bakaka ngolo kana beto ke yindula mingi kivuvu yina beto ke vandaka na yo.—Mat. 24:13; Baeb. 6:18; Kus. 21:1-4.

KUKANGA NTIMA NA MIMEKAMU YA MUTINDU NA MUTINDU

¹³ Mimekamu ya beto ke kutanaka ti yo bubu yai me fwanana ti yina balongoki ya ntete ya Yezu Kristu kutanaka ti yo. Na bilumbu na beto, Bambangi ya Yehowa ke kutanaka ti bampasi sambu bambeni yina ke vandaka ve ti bansangu ya kieleka ke tubilaka bo mambu ya mbi mpi ke niokulaka bo. Kaka mutindu yo vandaka na bilumbu ya bantumwa, kimbeni ya mingi ke katukaka na bamfumu ya mabundu yina Ndinga ya Nzambi ke monisaka nde malongi mpi bisalu na bo kele ya luvunu. (Bis. 17:5-9, 13) Bantangu ya nkaka, bansadi ya Yehowa ke kumaka na ngemba ntangu bo ke lombaka nde bo zitisa banswa yina bansiku ya baluyalu ke pesaka. (Bis. 22:25; 25:11) Ata mpidina, bamfumu ke buyisaka mpi kisalu na beto, bo ke salaka yonso sambu na kutula nsuka na kisalu na beto ya Bukristu. (Nk. 2:1-3) Na bantangu ya mutindu yai, beto ke landaka ti kikesa yonso mbandu ya bantumwa ya kwikama yina tubaka nde: “Beto fwete lemfukila Nzambi bonso mfumu na kisika ya kulemfukila bantu.”—Bis. 5:29.

¹⁴ Mutindu zola ya insi ke kuma mingi na ntoto ya mvimba, bo ke na kupusa kibeni bansamuni ya nsangu ya mbote na kuyambula kisalu ya kusamuna yina Nzambi me pesaka bo. Bansadi yonso ya Nzambi ke bakisaka mbote kibeni lukebisu yina kele na Kusonga 14:9-12 yina ke tadila kusambila “mbisi ya mfinda mpi kifwani na yo.” Beto ke bakisaka ntendula ya bangogo yai ya Yoane: “Yo ke lomba nde basantu, bantu yina ke zitisaka bansiku ya Nzambi mpi ke landaka lukwikilu ya Yezu, kukanga ntima.”

¹⁵ Mimekamu yina ke basikaka sambu na bitumba, mubulu ya kukolama na baluyalu, mbangika ya ngolo mpi sambu bamfumu me buyisa kisalu na beto, lenda sala nde yo kuma mpasi na kusala lusambu ya Bukristu na meso ya bantu yonso. Ziku beno ke kuka diaka ve kuvukana dibundu ya mvimba. Yo lenda kuma mpasi na kusolula ti Betele. Baviziti ya bankengi ya nziunga lenda salama diaka ve. Mikanda lenda kwisa diaka ve. Inki nge fwete sala kana mambu ya mutindu yai me salama?

¹⁶ Kana mambu yai me salama, nge fwete sala yonso yina nge lenda sala na bantangu ya mutindu yai. Nge lenda sosa mpila ya kulonguka nge mosi. Mbala mingi bimvuka ya fioti lenda vukana sambu na kulonguka na banzo ya bampangi. Na balukutakanu yina, beno lenda sadila mikanda yina beto longukaka na bilumbu me luta mpi Biblia. Kudiyangisa ve mpi kukuma ve kisaka-saka. Mbala mingi Nto-Kimvuka ke sosaka mpila ya kusolula nswalu ti bampangi yina kele ti mikumba.

¹⁷ Ata nge kele ve kisika mosi ti bampangi na nge yonso ya Bakristu, kuvila ve nde Yehowa mpi Mwana na yandi Yezu Kristu kele ti nge. Kivuvu na nge lenda vanda kaka ngolo. Yehowa ta landa kuwa bisambu na nge mpi yandi ta pesa nge kikesa na nzila ya mpeve na yandi. Sosa lutwadisu na yandi. Kuvila ve nde nge kele nsadi ya Yehowa mpi longoki ya Yezu Kristu. Yo yina, sadila mbote mabaku ya kusamuna nsangu ya mbote. Yehowa ta sakumuna bikesa na nge. Bantu ya nkaka lenda kwisa kuvukana ti nge na nswalu yonso na lusambu ya kieleka.—Bis. 4:13-31; 5:27-42; Bafil. 1:27-30; 4:6, 7; 2 Tim. 4:16-18.

¹⁸ Kana nge me kutana ti kigonsa ya lufwa bonso bantumwa mpi bantu ya nkaka, tula ntima na “Nzambi yina ke tedimisaka bafwa.” (2 Bak. 1:8-10) Lukwikilu na nge na kivuvu ya lufutumuku lenda sadisa nge na kukanga ntima ata na ntwala ya kimbeni ya ngolo. (Luka 21:19) Yezu Kristu me pesaka beto mbandu; yandi zabaka nde kwikama na yandi na ntwala ya mimekamu ta pesa bantu ya nkaka kikesa ya kukanga ntima. Mutindu mosi mbandu na nge lenda pesa bampangi kikesa.—Yoa. 16:33; Baeb. 12:2, 3; 1 Pie. 2:21.

¹⁹ Katula mbangika mpi kimbeni, yo lenda lomba nde nge kanga ntima na mambu ya nkaka ya mpasi. Mu mbandu, bantu mingi me lembaka nitu sambu bantu ya teritware na bo ke yambaka bo ve mbote. Bankaka ke nwanaka ti maladi mosi buna, ke niokwamaka na mabanza to ke kukaka ve kusala mambu ya nkaka sambu nitu me lemba. Yo lombaka mpi nde ntumwa Polo kukanga ntima na mumekamu ya mutindu mosi buna yina vandaka kukanga yandi nzila ya kusala kisalu na yandi to kukumisa yo mpasi bantangu ya nkaka. (2 Bak. 12:7) Diaka, Epafrodite, Mukristu mosi ya mvu-nkama ya ntete ya mbanza Filipo, kumaka na “mawa sambu [banduku na yandi] waka nde yandi belaka.” (Bafil. 2:25-27) Kukonda kukuka na beto mosi mpi ya bantu ya nkaka lenda sala nde beto kuka kibeni ve kukanga ntima. Bantangu ya nkaka kuwakana lenda vanda ve ti bampangi-Bakristu ya nkaka to nkutu na kati ya bantu ya dibuta mosi. Kansi, bantu yina ke sadilaka bandongisila ya Ndinga ya Yehowa ke kangaka ntima mpi ke nungaka mambu ya mpasi ya mutindu yai.—Ezek. 2:3-5; 1 Bak. 9:27; 13:8; Bakol. 3:12-14; 1 Pie. 4:8.

BAKA LUKANU YA KUBIKALA YA KWIKAMA

²⁰ Beto fwete kangama ngolo na Yezu Kristu, muntu yina Yehowa me tulaka Mfumu ya dibundu. (Bakol. 2:18, 19) Beto fwete sala kumosi ti “mpika ya kwikama mpi ya mayele” mpi bankengi yina bo me ponaka. (Baeb. 13:7, 17) Kana beto ke zitisa mbote-mbote balukanu yina organizasio ya Nzambi ke bakaka mpi kana beto ke sala kumosi ti bampangi yina ke twadisaka beto, beto ta vukana sambu na kusala luzolo ya Yehowa. Beto fwete sadila mbote dibaku ya kisambu. Kuvila ve nde, ata bibaka ya boloko lenda kanga beto ve nzila ya kusolula ti Tata na beto ya zola ya kele na zulu to kubebisa bumosi ya beto ke vandaka na yo ti bampangi na beto.

²¹ Ti kikesa mpi kukanga ntima, bika beto sala yonso sambu na kulanda kulungisa mukumba yai ya Yezu Kristu, yina me futumukaka, pesaka balongoki na yandi: “Yo yina, beno kwenda mpi beno kumisa bantu ya makanda yonso balongoki, beno botika bo na zina ya Tata mpi ya Mwana mpi ya mpeve santu, beno longa bo na kuzitisa mambu yonso ya mono songaka beno.” (Mat. 28:19, 20) Bonso Yezu, bika beto kanga ntima. Beto tanina kibeni kivuvu ya Kimfumu mpi ya luzingu ya mvula na mvula yina beto ke vingila. (Baeb. 12:2) Sambu beto kele balongoki ya Kristu ya me bakaka mbotika, beto kele ti dibaku ya kupesa maboko na kulungana ya mbikudulu ya Yezu yina ke tubila “nsukilu ya ngidika ya bima.” Yandi tubaka nde: “Bo ta samuna nsangu yai ya mbote ya Kimfumu na ntoto ya mvimba sambu na kuta kimbangi na makanda yonso, ebuna nsuka ta kwisa.” (Mat. 24:3, 14) Bubu yai kana beto ke kudipesa na ntima ya mvimba na kisalu yai, beto ta vanda na kiese ya kubaka luzingu ya kukonda nsuka na nsi-ntoto ya mpa mpi ya lunungu yina Yehowa me silaka beto!