Bangindu ya Nkaka

Nsangu Sambu na Bibuti Yina Kele Bakristu:

Sambu nge kele kibuti, nge ke zola kusadisa bana na nge ya nge ke zolaka mingi na kuzola Yehowa mpi na kudipesa na yandi. Inki nge lenda sala sambu na kusadisa bo na kubaka mbotika? Inki ntangu bo ta vanda ya kuyilama sambu na diambu yai ya mfunu?

Yezu songaka balongoki na yandi nde: “Beno kumisa bantu ya makanda yonso balongoki, beno botika bo.” (Mat. 28:19) Na kutadila verse yai, yo ke lombaka ntete nde muntu kukuma longoki na ntwala ya kubaka mbotika, disongidila yandi fwete bakisa mpi kundima malongi ya Kristu mpi yandi fwete landa yo mbote-mbote. Ata bayina kele kibeni baleke lenda sala diambu yai.

Pesa bana na nge mbandu ya mbote mpi longa bo malongi ya Yehowa. (Kul. 6:6-9) Yo ke tendula nde nge fwete sadila mambu yina kele na mukanda Inki Biblia Ke Longa Beto? mpi mukanda Mutindu ya Kubikala na Zola ya Nzambi sambu na kulonga bo malongi ya Biblia yina yo ke lombaka nde muntu kuzaba ntete mpi kusadisa bo na kuyindula na nsadisa ya minsiku ya Biblia mpi na kuzitisa yo na luzingu na bo. Sadisa bana na nge na kuzaba mutindu ya kutendula na bangogo na bo mosi mambu yina bo ke kwikilaka na yo. (1 Pie. 3:15) Nzayilu mpi kikesa yina nge ta pesa bo mpi yina bo ta baka na kulonguka na bo mosi, na lusambu ya dibuta, na balukutakanu ya dibundu mpi na banduku ya mbote ta sadisa bo na kubaka mbotika mpi na kulanda kuyela na kimpeve. Sadisa bo na kulanda kuditudila balukanu ya kimpeve.

Bingana 20:11 ke tuba nde: “Ata mwana ke zabanaka na mambu ya yandi ke salaka, kana bikalulu na yandi kele ya bunkete mpi ya mbote.” Inki mambu ta monisa nde mwana ya bakala to ya nkento, me kuma longoki ya Yezu Kristu mpi me fwana na kubaka mbotika?

Mwana yina ke yela sambu na kubaka mbotika fwete lemfukila bibuti na yandi. (Bis. 5:29; Bakol. 3:20) Biblia ke tuba mambu yai sambu na Yezu ntangu yandi vandaka ti bamvula 12: “Yandi landaka kulemfukila [bibuti na yandi].” (Luka 2:51) Ya kieleka, nge fwete vingila ve nde mwana na nge kuvanda muntu ya kukuka. Kansi, mwana yina ke zola kubaka mbotika fwete sala ngolo na kulanda mbandu ya Yezu mpi kuzabana nde yandi ke lemfukilaka bibuti na yandi.

Yandi fwete monisa mpi nde yandi ke zolaka kulonguka bakieleka ya Biblia. (Luka 2:46) Keti mwana na nge ke sepelaka kukwenda na balukutakanu mpi kupesa bamvutu? (Nk. 122:1) Keti yandi ke zolaka kutanga Biblia mpi kulonguka yandi mosi mbala na mbala?—Mat. 4:4.

Mwana yina ke yela sambu na kubaka mbotika ke salaka ngolo na kutula mambote ya Kimfumu na kisika ya ntete. (Mat. 6:33) Yandi ke zabaka nde yandi kele ti mukumba ya kusonga bantu ya nkaka mambu yina yandi ke kwikilaka. Yandi ke pesaka maboko na bametode ya kuswaswana ya kisalu ya kusamuna mpi yandi ke waka ve nsoni ya kusonga balongi mpi bana ya nzo-nkanda na bo nde yandi kele Mbangi ya Yehowa. Yandi ke bakaka ve na nsaka badevware na yandi na Lukutakanu Luzingu mpi Kisalu.

Yandi fwete sala mpi ngolo na kuvanda ti bikalulu ya mbote mpi na kubuya banduku ya mbi. (Bing. 13:20; 1 Bak. 15:33) Yandi ta monisa yo na miziki, bafilme, manaka ya televizio mpi bansaka ya video yina yandi ke ponaka mpi na mutindu yandi ke sadilaka Internet.

Bana mingi me ndimaka mambu yina bibuti na bo vandaka kusonga bo mbala na mbala, bo me kumaka kuzola kieleka mingi mpi me lungisaka na kileke na bo mambu ya bo ke lombaka sambu na kubaka mbotika. Bika Yehowa kusakumuna nge na bikesa yina nge ke sala sambu na kusadisa bana na nge na kulungisa diambu yai ya mfunu na kinduku na bo ti Yehowa.

Nsangu Sambu na Nsamuni ya Me Bakaka Ntete Ve Mbotika:

Kuvanda nsamuni ya me bakaka ntete ve mbotika kele dibaku ya nene. Beto ke sikisa nge mutindu nge ke yela na kimpeve. Kulonguka Ndinga ya Nzambi me sadisaka nge na kuzaba Nzambi mpi na kukwikila na balusilu na yandi.—Yoa. 17:3; Baeb. 11:6.

Na ntwala nde nge yantika kulonguka ti Bambangi ya Yehowa, ziku nge vandaka kuvukana na mutindu mosi buna ti dibundu ya nkaka to nge vandaka ve muntu ata ya dibundu mosi. Mbala ya nkaka nge vandaka kusala kisalu mosi yina ke wakana ve ti minsiku ya Biblia. Kansi ntangu yai nge me monisaka lukwikilu mutindu nge me balulaka ntima, disongidila nge me waka mawa ya ngolo sambu na mambu ya mbi yina nge vandaka kusala. Diaka nge me monisaka yo mutindu nge me sobaka, disongidila nge me yambulaka luzingu na nge ya mbi ya ntama mpi nge me bakaka lukanu ya kusala mambu yina kele mbote na meso ya Nzambi.—Bis. 3:19.

Mbala ya nkaka, “yantika bumwana” nge me zaba masonama ya santu. Yo ke taninaka nge na bikalulu yina me fwana ve sambu na Bakristu mpi na masumu ya nene. (2 Tim. 3:15) Nge me longukaka mutindu ya kubuya bupusi ya banduku mpi bupusi ya nkaka ya kusala mambu yina kele mbi na meso ya Yehowa. Nge me monisaka lukwikilu na mutindu nge ke pesaka maboko na lusambu ya kieleka mpi ke zabisaka bantu ya nkaka mambu yina nge ke kwikilaka na yo. Nge me bakaka formasio ya kisalu ya kusamuna. Ntangu yai nge me baka lukanu ya kukuma nsamuni ya me bakaka ntete ve mbotika sambu na kusadila Yehowa.

Yo vanda bo longaka nge banzila ya Yehowa banda kileke to nge zabaka Yehowa ntangu nge kumaka mbuta, kele ti mambu zole ya nkaka yina nge fwete sala sambu na kuyela na kimpeve: kudipesa mpi mbotika. Sambu na kudipesa na Yehowa, nge fwete solula ti yandi na kisambu mpi kumonisa yandi nde nge me baka lukanu ya kudipesa ya mvimba na yandi kimakulu. (Mat. 16:24) Nge ta baka mbotika na masa sambu na kumonisa nde nge me kudipesaka na Nzambi. (Mat. 28:19, 20) Nge ta kuma nsadi yina Yehowa me ndima kana nge me kudipesa na yandi mpi kana nge me baka mbotika. Yo kele dibaku mosi ya nene kibeni!

Kansi mutindu nge monaka yo ntangu nge vandaka kulonguka Biblia, nge lenda kutana ti mambu mingi ya mpasi. Kuvila ve nde ntangu fioti na nima ya kubaka mbotika, “mpeve nataka Yezu na ntoto-makanga sambu Diabulu kumeka yandi.” (Mat. 4:1) Nge lenda kutana diaka ti mimekamu ya nkaka kana nge me baka mbotika mpi me kuma longoki ya Kristu. (Yoa. 15:20) Yo lenda vanda ya mitindu mingi. Bantu ya dibuta lenda niokula nge. (Mat. 10:36) Banduku na nge ya nzo-nkanda, banduku na nge ya kisalu mpi banduku na nge ya ntama lenda seka nge. Kansi nge fwete yibuka konso ntangu mambu yai ya Yezu tubaka na Marko 10:29, 30: “Ya kieleka mono ke tubila beno nde, ata muntu mosi ve me bikisaka nzo to bampangi ya babakala to bampangi ya bankento to mama to tata to bana to bilanga sambu na mono mpi sambu na nsangu ya mbote yina ta baka ve ntangu yai mbala 100 kuluta na nsungi yai ya ntangu—banzo, bampangi ya babakala, bampangi ya bankento, bamama, bana, mpi bilanga, ti mbangika—mpi na ngidika ya bima yina ke kwisa, luzingu ya mvula na mvula.” Yo yina, landa kusala ngolo sambu nge bikala pene-pene ya Yehowa mpi nge landa kuzinga na kuwakana ti minsiku na yandi ya lunungu.

Kana nge ke zola kubaka mbotika, zabisa mutambusi ya kimvuka ya bankuluntu. Bankuluntu ta tadila ti nge bangiufula yina kele na kitini ya ke landa sambu na kuzaba kana nge me fwana na kubaka mbotika. Nge lenda yantika kutadila bangiufula yai ntangu nge ke longukaka nge mosi mbala na mbala.

Ntangu nge ke kudibongisa sambu na masolo yai, baka ntangu ya kutanga mpi ya kuyindula baverse yina bo me tula. Nge lenda sonika banoti na nge na kati ya mukanda yai to na kisika ya nkaka. Nge lenda sadila banoti yina mpi kubika mukanda na nge ya kukanguka ntangu nge ke solula ti bankuluntu. Kana nge ke bakisa ve ngiufula mosi, kuwa ve boma na kulomba lusadisu na mpangi yina ke longukaka Biblia ti nge to na bankuluntu.

Ntangu nge ke solula ti bankuluntu, kuyindula ve nde nge fwete pesa bamvutu ya nda to ya mpasi na bangiufula yina bo ke yula. Yo ta vanda mbote nde nge pesa mbala mosi mvutu na ngiufula na mutindu ya pete mpi na bangogo na nge mosi. Sambu na bangiufula mingi, yo kele mpi mfunu na kutubila verse mosi to baverse zole ya ke ndimisa mvutu na nge.

Kana nge me zaba ntete ve mbote malongi ya Biblia yina yo ke lombaka nde muntu kuzaba ntete, bankuluntu ta sala yonso sambu na kusadisa nge sambu nge kuka kutendula mbote-mbote Masonuku na bangogo na nge mosi mpi nge lungisa mambu ya bo ke lombaka sambu nge baka mbotika na bilumbu ke kwisa.

[Noti na bankuluntu: Bantuma ya ke monisa mutindu ya kusolula ti bantu yina ke zola kubaka mbotika kele na balutiti 208-212.]