Mukanda ya Nto-Kimvuka

Bampangi Bansamuni ya Nsangu ya Mbote:

Beto kele ti dibaku ya nene kibeni ya kuvanda na bumosi na lusambu ya Yehowa, Nzambi mosi kaka ya kieleka! Beto kele ‘banduku na yandi ya kisalu.’ Yandi me pesaka beto kisalu ya santu mpi ya ke gulusaka luzingu ya bantu, disongidila kisalu ya kusamuna mpi ya kulonga nsangu ya mbote ya Kimfumu yina yandi me tulaka. (1 Bak. 3:9; Mat. 28:19, 20) Beto fwete vukana mbote sambu beto sala kisalu yai na ngemba mpi na bumosi na ntoto ya mvimba.—1 Bak. 14:40.

Mukanda yai ta sadisa nge na kubakisa mutindu mambu ke tambulaka na dibundu ya Bukristu bubu yai. Yo ke tubila mabaku mpi mikumba yina nge kele na yo mutindu nge kele Mbangi ya Yehowa. Kana nge ke baka na valere mabaku yina nge kele na yo mpi nge ke lungisa mikumba na nge, nge ta kuma “ngolo na lukwikilu.”—Bis. 16:4, 5; Bag. 6:5.

Yo yina, beto ke siamisa nge na kulonguka mukanda yai mbote-mbote. Sosa mutindu nge lenda sadila mambu ya kele na mukanda yai na luzingu na nge. Mu mbandu, kana nge me katuka kukuma nsamuni ya me baka ntete ve mbotika, inki nge fwete sala sambu nge baka mbotika mpi nge kuma Mbangi ya Yehowa? Diaka kana nge me bakaka mbotika, inki nge lenda sala sambu nge yela na kimpeve mpi nge sala diaka mingi na kisalu ya Yehowa? (1 Tim. 4:15) Inki nge lenda sala sambu dibundu kuvanda na ngemba? (2 Bak. 13:11) Sosa bamvutu ya bangiufula yai na mukanda yai.

Kana nge kele mpangi-bakala yina me bakaka mbotika, inki nge lenda sala sambu nge lungisa mambu yina bo ke lombaka sambu na kukuma nsadi ya kisalu mpi na nima nkuluntu? Bantu ke kuma mingi na organizasio ya Nzambi, yo yina beto kele kibeni na mfunu ya bampangi-babakala ya me fwana sambu na kutwadisa mabundu. Mukanda yai ta sadisa nge na kuzaba mambu ya nge fwete sala kana nge ke “zola” kulungisa balukanu yai ya kimpeve.—1 Tim. 3:1.

Beto ke samba na masonga yonso sambu mukanda yai kusadisa nge na kubakisa kisika na nge na organizasio ya Yehowa mpi na kubaka yo na valere. Beto ke zolaka beno yonso mingi kibeni mpi beto ke landa kusamba sambu beno vanda na kati ya bantu yina ke sepelaka ntangu yonso kusambila Yehowa, Tata na beto ya zulu.—Nk. 37:10, 11; Yez. 65:21-25.