NGIUFULA 7

Inki Mu Lenda Sala Kana Bo Ke Pusa Mu na Kuvukisa Nitu?

SA NA NKI YO KE MFUNU

Badesizio na nge na mambu ya kuvukisa nitu ta vanda ti malanda ya nda na makwisa na nge.

NGE ZOLAKA KUSALA NKI?

Yindula diambu yai: Heather ke kutanaka ti Mike banda bangonda zole mpamba, kansi yandi ke mona bonso nde yandi me zabaka Mike banda ntama kibeni. Bo ke tindilanaka ba sms mbala na mbala, bo ke solulaka bangunga mingi na telefone, mpi bo ke manisanaka bansa! Kansi ntangu yai Mike ke zola nde yo suka ve kaka na masolo.

Na bangonda zole ya me luta, kima yina Mike ti Heather me sala kele kaka kusimbana na maboko mpi kupesana beze fioti. Heather ke zola yo suka kaka pana. Kansi yandi ke zola mpi ve nde Mike kuyambula yandi. Mike mpamba muntu ke salaka nde yandi kudiwa nde yandi kele kitoko mingi mpi mfunu. Yandi ke kuditubila diaka nde, ‘Mu ti Mike, beto ke zolana mingi . . .’

Kana nge me lungisa dezia mvula ya kubaka fianse mpi nge ke na kisika ya Heather, nge ta sala nki?

YINDULA FIOTI!

Bo ke sadila lele mosi bonso kima ya kudipila nzo — Kuvukisa nitu kele dikabu yina Nzambi me pesaka kaka na bankwelani. Kusala yo na ntwala ya makwela kele kubebisa dikabu yina. Yo ke bonso kubaka lele ya kitoko yina muntu mosi pesaka nge mpi kusadila yo bonso kima ya kudipila nzo

Kana nge fwa nsiku mosi ya lugangu, mu mbandu nsiku ya gravité, nge ta kutana ti malanda na yo. Yo ke mutindu mosi kana nge fwa nsiku ya bikalulu ya mbote, mu mbandu nsiku yina ke tubaka nde: “Beno fwete sala ve pite.”—1 Batesalonika 4:3.

Nge ta kutana ti nki malanda kana nge buya kuzitisa nsiku yina? Biblia ke tuba: “Muntu yina ke salaka pite ke salaka disumu na nitu na yandi mosi.” (1 Bakorinto 6:18) Inki mutindu yo kele kieleka?

Bantu ya ke salaka bansosa me monaka nde mbala mingi baleke mingi yina me vukisaka nitu na ntwala ya kukwela me kutanaka ti diambu mosi to mingi ya mbi yina kele na nsi.

MAWA. Baleke mingi yina me vukisaka nitu na ntwala ya makwela ke tubaka nde bo vandaka na mawa na nima.
KUKONDA KUDITUDILA NTIMA. Na nima ya kuvukisa nitu, konso muntu ke yantikaka kuyindula mutindu yai, ‘Mwana yai ya bakala to ya nkento me vukisaka dezia nitu ti nani ya nkaka?’
KUKUMA KISAKA-SAKA. Na ntima na bo, bana-bankento mingi ke zolaka muntu yina ta tanina bo, kansi ve yina ta sala bo mambu ya mbi. Mpi bana-babakala mingi ke sepelaka ve mingi na mwana-nkento yina bo me vukisaka nitu ti yandi.
Na nsuka: Kana nge vukisa nitu na ntwala ya makwela, nge ke kudisala mbi sambu nge ke bebisa kima mosi ya mfunu. (Baroma 1:24) Nitu na nge ke mfunu mingi yo yina nge fwete bebisa yo ve!

Monisa nde nge kele ti ngolo ya ‘kusala ve pite.’ (1 Batesalonika 4:3) Ebuna kana nsuka-nsuka nge kwela, nge lenda vukisa nitu. Nge ta sepela na yo mbote-mbote, mpi nge ta kudiyangisa ve, nge ta vanda ve na mawa mpi basusi yina ke vandaka mbala mingi na kati ya malanda ya kuvukisa nitu na ntwala ya makwela.—Bingana 7:22, 23; 1 Bakorinto 7:3.

INKI NGE KE YINDULA?

Keti muntu yina ke zolaka nge na masonga yonso lenda tula mambote na nge ya kinsuni mpi ya mawi na kigonsa?
Keti muntu yina ke kudibanzaka na masonga yonso sambu na nge lenda pusa nge na kubebisa bangwisana na nge ti Nzambi?—Baebreo 13:4.