Mukanda ya Nto-Kimvuka

Na bantu yina ke zolaka Yehowa Nzambi mpi Ndinga na yandi, Biblia:

Yezu tubaka nde: “Beno ta zaba kieleka, ebuna kieleka ta katula beno na kimpika.” (Yoane 8:32) Yindula mutindu nge kudiwaka na mbala ya ntete ya nge zabaka kieleka ya Biblia! Yo pesaka nge kiese na kuzaba nde beto lenda longuka kieleka na nsi-ntoto yai ya me fuluka ti luvunu.—2 Timoteo 3:1.

Yehowa Nzambi ke zolaka nde beto zaba kieleka. Mpi sambu beto ke zolaka bantu, beto ke zolaka kulonga bo kieleka yango. Kansi kusadila Nzambi ke lombaka mambu mingi. Beto fwete sala yonso sambu na kuzinga bonso Bakristu sambu beto ke zitisaka kibeni minsiku ya Yehowa. Yezu tendulaka mutindu mosi ya mfunu yina beto lenda ndimisa Nzambi nde beto ke zolaka yandi. Yandi tubaka nde: “Kana beno ke zitisa bansiku na mono, beno ta bikala na zola na mono, mutindu mono me zitisaka bansiku ya Tata mpi ke bikalaka na zola na yandi.”—Yoane 15:10.

Yezu ke zolaka kibeni Tata na yandi mpi yandi ke salaka mambu yonso yina Tata na yandi ke lombaka yandi na kusala. Kana beto ke landa mbandu ya Yezu na mutindu na beto ya kuzinga, Yehowa ta zola beto mpi beto ta vanda kibeni na kiese. Mutindu Yezu tubaka, “kana beno me zaba mambu yai, beno ta vanda na kiese kana beno ke sala yo.”—Yoane 13:17.

Beto ke tula kivuvu nde mukanda yai ta sadisa nge na kulonguka na kuzinga na kuwakana ti kieleka ya Biblia mpi na kukuma nduku ya Nzambi. Beto ke samba nde nge ta yedisa zola na nge sambu na Nzambi mpi nge ta bikala na “zola ya Nzambi, . . . yina ke nata na luzingu ya mvula na mvula.”—Yude 21.