Banzadi ya Balusakumunu Yina Ke Katuka na Yehowa

YOELE 3:18 Mbikudulu yai ke monisa nto ya masa yina ke basika na kisika ya santu ya tempelo. Yo ke podisa “Muwanda ya Banti ya Akasia” yina kele ya kuyuma. Yoele mpi Ezekiele ke mona nzadi mosi ya ke pesa luzingu na kisika mosi ya kuyuma. Na bambandu yai zole, nzadi ke basika na nzo to tempelo ya Yehowa.

ZEKARIA 14:8 Profete Zekaria ke mona “bamasa ya luzingu” ke basika na mbanza Yeruzalemi mpi ke kulumuka. Ndambu na yo ke kulumuka na nzadi-mungwa ya esti, to Nzadi-Mungwa ya Kufwa, mpi ndambu ya nkaka na nzadi-mungwa ya westi, to Nzadi-Mungwa ya Mediterane. Yeruzalemi vandaka “mbanza ya Ntotila ya nene,” Yehowa Nzambi. (Mat. 5:35) Yo yina, mbanza yina Zekaria ke tubila ke yibusa beto luyalu ya Yehowa na ntoto ya mvimba na bilumbu ke kwisa. Bamasa yina mbikudulu yai ke tubila ke monisa nde Yehowa ta sakumuna bimvuka zole ya bantu ya kwikama na Paladisu, disongidila bayina ta luta na mpasi ya nene mpi bayina ta futumuka na nima.

KUSONGA 22:1, 2 Ntumwa Yoane ke mona nzadi mosi ya kifwani yina kele kibeni bonso nzadi yina Ezekiele monaka. Nzadi yango ke basika ve na tempelo kansi yo ke basika na kiti ya kimfumu ya Yehowa. Yo yina, yo ke monana nde mbona-meso yai mpi mbona-meso ya Zekaria ke tubila balusakumunu ya kimfumu ya Nzambi na nsungi ya Luyalu ya Bamvula Funda.

Ya kieleka, balusakumunu ya luyalu ya Yehowa ke swaswana fioti ti balusakumunu ya nzadi yina Ezekiele monaka na mbona-meso. Balusakumunu yai yonso ke katukaka na Yehowa mpi ke kulumukaka na bansadi na yandi yonso ya kwikama.

NKUNGA 46:4 Yo ke monana nde verse yai ke tubila mambu zole: lusambu mpi luyalu. Verse yai ke tubila nzadi yina ke nata kiese na “mbanza ya Nzambi,” yo ke monisa Kimfumu mpi luyalu, yo ke nata mpi kiese na “Nzo-tenta ya nene ya santu ya Muntu ya Kuluta Zulu,” yo ke monisa lusambu ya bunkete.

Na kimvuka, baverse yai yonso ke ndimisa beto nde Yehowa ta sakumuna bantu ya kwikama na mitindu zole. Beto ta baka mambote ya mvula na mvula (1) ya luyalu na yandi mpi (2) ya mambu yina yandi me yidikaka sambu na lusambu ya bunkete. Yo yina, beto fwete baka lukanu bubu yai ya kulanda kusosa “masa ya luzingu,” disongidila mambu ya bo me yidikaka na zola yonso sambu beto baka luzingu ya mvula na mvula, yina ke katukaka na Yehowa Nzambi mpi na Mwana na yandi!—Yer. 2:13; Yoa. 4:10.