Beno vanda ya kufuluka na zola
“Beno vanda na zola ya kufuluka na nkenda, mpi bumbote.”—KOLOSAI 3:12.
ATA mbala mosi ntete ve na Nkenda bantu mingi mevandaka na mfunu ya lusadisu ya nkenda. Sambu bau kekutana na maladi, nzala, kukonda kisalu, kufwa bantu, bitumba, mavwanga, mpi bankuba ya ntoto, mafuku ya bantu kele na mfunu ya lusadisu. Kansi kele na dyambu mosi ya kuluta ngolo dyaka: nkadilu ya kimpeve ya kukonda kivuvu ya bantu. Satana, yina kezaba nde ntangu na yandi mebikala fyoti, “kele na kukusa bantu ya ntoto ya mvimba.” (Kusonga 12:9, 12, NW) Na yau, bantu yina kele na nganda ya dibundu ya kyeleka kele na kigonsa ya kuvidisa luzingu na bau, mpi Biblia kekatula kivuvu ya lufutumuku sambu na bayina ya Nzambi tafwa na kilumbu na yandi ya kusambisa.—Matayo 25:31-33, 41, 46; 2 Tesalonika 1:6-9.
2 Kansi, tii na ntangu yango, Yehowa Nzambi kelanda na kumonisa nzizidi na yandi mpi nkenda na yandi sambu na bantu ya kukonda ntonda ti bantu ya mbi. (Matayo 5:45, NW; Luka 6:35, 36, NW) Yandi mesala sambu na kikuma mosi yina kukingisaka yandi na ntwala ya kupesa ndola na nsi ya Izraele ya kukonda kwikama. “ ‘Mutindu ya mono kele na moyo,’ yina kele ntela ya Nkwa Kimfumu Yehowa, ‘mono keyangalalaka, na lufwa ya muntu ya mbi ve, kansi na kumona muntu ya mbi kukatuka na nzila na yandi ya mbi ye mpi kubikala na luzingu. Beno katuka, beno katuka na banzila na beno ya mbi, sambu na inki beno kezola kufwa, O nzo ya Izraele?’ ”—Ezekiele 33:11, NW.
3 Bantu ya mbi ya bwala ya Ninive kubakaka mpi mambote ya nkenda ya Yehowa. Yehowa kutindaka mbikudi na yandi Yonasi na kukebisa bau na mbungula na bau ya kufinamaka. Bau kundimaka kisalu ya kusamuna ya Yonasi mpi bau kubalulaka ntima. Yau kutindaka Nzambi ya nkenda, Yehowa, na kubika kufwa mbanza yango na ntangu yina. (Yonasi 3:10; 4:11) Kana Nzambi kuwilaka bantu ya Ninive mawa, yina tavanda na kivuvu ya lufutumuku, nkenda ya inki mutindu yandi fwete kuvanda na yau sambu na bantu yai ya kekwenda na mbungula ya kimakulu!—Luka 11:32.
Kisalu Mosi ya Kuluta Mbote ya Mesimbama na Nkenda
4 Na kuwakana ti kimuntu na yandi ya nkenda, Yehowa kupesaka ntuma na Bambangi na yandi na kulanda kusamuna na banfinangani na bau “sangu ya mbote ya Kimfumu.” (Matayo 24:14) Na ntangu bantu keyangalala na kisalu yai ya kugulusa, Yehowa kekangula bantima na bau sambu nde bau kubakisa nsangu ya Kimfumu. (Matayo 11:25; Bisalu 16:14) Na kulandaka mbandu ya Nzambi na bau, Bakristu ya kyeleka kemonisaka nkenda ya mingi na kuvutukaka kutala bayina kuyangalalaka na nsangu, na kusadisaka bau, kana mpila kele, na nzila ya kulonguka ya Biblia. Yau yina, na 1993, kuluta mafuku iya na ndambu ya Bambangi ya Yehowa, na bansi 231 kulutisaka bangunga kuluta difuku na mafuku na kusamuna nzo na nzo mpi na kulonguka Biblia ti bankweno. Na nima, dibaku mepesama na bantu yai ya mpa na kupesa luzingu na bau na Yehowa mpi na kukota na ndonga ya Bambangi na yandi ya mebakaka mbotika. Mutindu yina, bau mpi kekudipesa na kati ya kisalu yai ya kuluta mbote ya mesimbama na nkenda, sambu na balongoki ya bilumbu kekwisa, yina kele dyaka bantu ya boloko ya nza ya Satana.—Matayo 28:19, 20; Yoane 14:12.
5 Na bilumbu kekwisa Yehowa tasala bonso “nkwa bitumba ya ngolo.” (Kubasika 15:3) Sambu na nkenda ya zina na yandi mpi ya bantu na yandi, yandi takatula mambi mpi tatula ntoto ya mpa ya lunungu. (2 Piere 3:13) Kima ya ntete yina tafwa na kilumbu ya nganzi ya Nzambi tavanda mabundu ya Kikristu. Kana Nzambi kugulusaka ve tempelo na yandi mosi na Yeruzalemi na mafingu ya ntotila ya Babiloni, yandi tagulusa mpi ve bimvuka ya mabundu yina kevweza yandi. Nzambi tatula na kati ya ntima ya bamambere ya Organisation des Nations Unies dibanza ya kufwa kikristu ti mitindu yonso ya nkaka ya mabundu ya luvunu. (Kusonga 17:16, 17) “Ye sambu na mono mpi,” ketuba Yehowa, “disu na mono tamona nkenda ve, mpi mono tawa mawa ve. Ya kyeleka mono tanata nzila na bau na zulu ya ntu na bau.”—Ezekiele 9:5, 10.
6 Na ntangu dibaku mepesama na bau kaka, Bambangi ya Yehowa talanda na kumonisa nkenda sambu na bankweno na kusamunaka ti kikesa nsangu ya Nzambi ya lugulusu. Na kutuba mbote, kana mpila kele, bau kesadisaka dyaka bantu yina kele na mfunu ya bima ya kinsuni. Kansi na dyambu yina, mukumba na bau ya ntete kele ya kukukisa bansatu ya bamambere ya dibuta na bau mpi na bayina kele bibuti na bau na lukwikilu. (Galatia 6:10; 1 Timoteo 5:4, 8) Bisalu mingi ya lusadisu ya kusalamaka na Bambangi ya Yehowa sambu na bampangi na bau ya kubwaka na bampasi ya mutindu na mutindu kusongaka mbandu ya nene ya nkenda. Kansi, Bakristu kekingilaka ve dyambu mosi ya mpasi sambu na kumonisa nkenda ya mingi. Bau kemonisaka nkadulu yango na luzaku yonso na ntwala ya bampasi ya konso kilumbu.
Ndambu ya Kimuntu ya Mpa
7 Yau kele kyeleka nde bumuntu na beto ya masumu mpi bupusi ya mbi ya nza ya Satana kele balukakilu na nsonga na beto ya nkenda. Yau yina Biblia kesyamisa beto na kuyambula “nganzi, makasi, nsoki, bantiakulu, mpi ntubilu ya nsoni.” Na kisika na yau, bau kelongisila beto na ‘kulwata kimuntu ya mpa’—kimuntu yina mefwanana na kifwanisu ya Nzambi. Ntetentete, yau melombama na beto na kulwata “zola ya kufuluka na nkenda, bumbote, mbatalala ya mbundu, ndembama, mpi ntima ya nda.” Na nima, Biblia kemonisa beto mutindu ya mbote ya kusadila sambu na kumonisa bankadulu yina. “Beno landa kuvibidilana ye kulolulana bamosi ti bankaka, kana mosi kele na dyambu na muntu ya nkaka. Bonso Yehowa kulolulaka beno, beno mpi kusala mutindu mosi.” Kana beto kele na ‘zola ya kufuluka na nkenda’ sambu na bampangi na beto bakristu, yau tavanda mpasi ve na kulolula.—Kolosai 3:8-13.
8 Na mutindu ya nkaka, muntu yina kebuya kulolula ti nkenda kebebisa bangwisani na yandi na Yehowa. Kele mpi yau yina ya Yezu kumonisaka mpenza na kati ya kingana na yandi ya mpika ya kukonda mawa, ya kutulamaka na boloko na mfumu na yandi “tii kuna yandi fweti futa mbongo yonso.” Ndola yina kulungaka na mpika yina sambu na kikalulu na yandi ya mbi ya kukonda kumonisa nkenda ya nkundi na yandi ya kimpika vandaka kulomba yandi. Yezu manisaka kingana na yandi na kutubaka nde: “Tata na mono kele na zulu ta sala beno mutindu mosi mpi, kana muntu kubikila mpangi na yandi ya nkaka mfuka ve na ntima yonso.”—Matayo 18:34, 35.
9 Kuvanda ya kufuluka na nkenda kele mutindu mosi ya mfunu ya zola. Ye mpi zola kele kidimbu ya keswaswanisa Bukristu ya kyeleka. (Yoane 13:35) Nkutu ntendula ya Biblia kepesa sambu na kimuntu ya mpa kesuka nde: “Na zulu ya bima yai yonso, beno fuluka na zola, sambu yau kele kikangila ya kukuka.”—Kolosai 3:14, NW.
Yandu ya Meso—Lukakilu na Nkenda
10 Sambu na bumuntu na beto ya masumu, yandu ya meso lenda kubutuka na kati ya ntima na beto kukonda mpasi. Mpangi na beto mosi ya bakala to ya nkento lenda mbala ya nkaka kuvanda na bingangu ya kubutukila to bima ya kinsuni mingi ya beto kele na yau ve. To mbala ya nkaka muntu mosi kubakaka balusakumunu ya nene mpi mikumba ya nkaka na kisalu ya kimpeve. Kana beto meyantika kuvanda na yandu ya meso sambu na bampangi na beto, keti beto tavanda kibeni na mpila ya kumonisa bau nkenda ya mingi? Na kutuba mbote, ve. Kansi, bidimbu ya kimpala lenda kuyantika kumonana na mbala mosi na nzila ya bangogo ya kutonga to na bisalu ya kukonda zola, na kutadila yina ya Yezu kutubaka sambu na muntu nde: “Muntu ke tubaka mambu yina me fulukaka na ntima na yandi.” (Luka 6:45) Yau lenda kumonana nde bantu ya nkaka kukota na kutonga na beto. Kele mpila yina ngemba ya dibuta to ya dibundu ya bansadi ya Yehowa talenda kukatuka.
11 Beto tadila yina kubwaka na kati ya dibuta mosi ya nene. Bana kumi ya ntete ya Yakobo kukumaka na kimpala na leki na bau ya suka Yozefi sambu yandi zolamaka mingi na tata na bau. Bonso mbutu, “bau lendaka ve kutubisa yandi ti ngemba yonso.” Na nima ya bilumbu, Yozefi kuzwaka dibaku ya kulala bandosi ya Nzambi na kumonisaka nde Yehowa kundimaka yandi. Yina kupesaka bampangi na yandi “kikuma ya ngolo ya kuyina yandi.” Sambu bau kukatulaka ve kimpala na bau na kati ya ntima na bau, kisika ata mosi kuvandaka ve sambu na nkenda mpi yau kunataka na disumu mosi ya nene.—Kuyantika 37:4, 5, 11.
12 Na nsoki yonso, bau kutekaka Yozefi na bumpika. Sambu na kusosa kubumba mbi na bau, bau kubakaka lukanu ya kundimisa tata na bau nde mbisi mosi ya mfinda kufwaka yandi. Na nima ya bamvula, disumu na bau kusongamaka na ntangu ya nzala kupusaka bau na kukulumuka na Ezipiti sambu na kusumba madya. Mfumu ya madya, yina ya bau kuzabaka dyaka ve nde kuvandaka Yozefi, kufundaka bau nde bau vandaka baneki mpi kutubaka na bau na kulomba yandi lusadisu ve kana bau kunata ve leki na bau ya suka, Benyamini. Na ntangu yina, Benyamini kukumaka mwana ya kuzolana mingi ya tata na bau, mpi bau kuzabaka mbote nde Yakobo tazola ve kubika yandi kukwenda.
13 Yau yina na ntangu ya bau kuvandaka na ntwala ya Yozefi, kansansa na bau kupusaka bau na kundima nde: “Ya kieleka, beto salaka mpangi na beto mbi; beto monaka mutindu yandi vandaka kumona mpasi, kansi beto wilaka yandi [nkenda] ve ntangu yandi vandaka kubondila beto. Yo yina mpasi yai me bwila beto.” (Kuyantika 42:21) Na nsadisa ya kikalulu na yandi ya nkenda kansi ya kusyamina ngwi, Yozefi kusadisaka bampangi na yandi na kumonisa masonga ya mbalula ntima na bau. Ebuna yandi kudimonisaka na bau mpi, yandi na luzolo ya mbote, yandi kulolulaka bau. Mpila yina, dibuta kuvutukilaka bumosi na yau. (Kuyantika 45:4-8) Bonso beto kele Bakristu, beto fwete kubaka dilongi ya nene na dyambu yai. Na kuzabaka bansukilu ya mbi ya yandu ya meso, beto fwete kusambila Yehowa na kusadisa beto na kuyingisa mawi ya kimpala na ‘zola ya kufuluka na nkenda.’
Balukakilu ya Nkaka na Nkenda
14 Lukakilu ya nkaka ya kukonda kumonisa nkenda na beto kele kutala nsaka ya mubulu. Bansaka ti baluyangidilu yina kekembisa mubulu kevumbulaka kiwina ya menga. Na bantangu ya Biblia, mbala na mbala bampani vandaka kudipesa na kutala banwani ya sirke mpi bampila ya nkaka munyokudi ya bantu na zulu ya ntoto ya zelo na kintinu ya Roma. Baluyangidilu ya mpila yina, na kutadila nsoniki ya bankenda, “mefwaka biyeka ya kuvukana na bampasi na nkweno, kiyeka ya keswaswanisa muntu na bambisi.” Baluyangidilu mingi ya nza kekupesa bubu yai kele na malanda ya kiteso mosi. Bakristu, yina kesala ngolo na kuvanda ti nkenda ya mingi, fwete kusola mbotembote lutangu na bau, bafilime mpi manaka ya televizio. Ti mayele yonso, bau tatula na ntu bangogo yai ya Bankunga 11:5 (NW) nde: “Konso muntu yina kezolaka mubulu, ya kyeleka [Yehowa] keyinaka yandi.”
15 Muntu yina kekudibanzaka ntetentete sambu na yandi mosi lenda mpi kubwa na kukonda kumonisa nkenda. Yai kele dyambu ya nene, bonso ketendula yau ntumwa Yoane nde: “Kana muntu kele mvwama, ebuna yandi me mona nde mpangi na yandi ke na kima ve kansi yandi me buya na kusadisa yandi, nki mutindu yandi lenda tuba nde yandi ke zolaka Nzambi?” (1 Yoane 3:17) Na kingana ya Musamaria ya mbote, Yezu kutubilaka nganga-nzambi ya lunungu na meso na yandi mosi mpi Mulevi yina kumonisaka kukonda ya nkenda ya mutindu mosi. Na kumonaka mpasi ya mpangi na bau Muyuda, bantu yina kubakaka lueka ya nkaka ya nzila mpi kulandaka nzyetolo na bau. (Luka 10:31, 32) Kansi, Bakristu ya nkenda kesalaka nswalu na kulungisa bansatu ya kinsuni ti ya kimpeve ya bampangi na bau. Bonso Musamaria ya kingana ya Yezu, bau kekudibanzaka mpi sambu na bansatu ya banzenza. Sambu na yau, bau kele na kyese na kupesa ntangu, ngolo mpi bima ya kinsuni sambu na kuyedisa na ntwala kisalu ya kukumisa bantu balongoki. Na mutindu yina, bau kekudipesa sambu na luguluku ya mafuku ya bantu.—1 Timoteo 4:16.
Nkenda Sambu na Bantu ya Maladi
16 Maladi kele dikabu ya bantu ya kukonda kukuka mpi ya kefwaka. Bakristu mekatulama ve, mpi mingi na kati na bau kesalaka ve na mambu ketala kimunganga: bau kesalaka mpi ve bimangu bonso bakristu ya ntete yina kubakaka kiyeka na maboko ya Kristu mpi na maboko ya bantumwa. Na lufwa ya bantumwa ya Kristu mpi ya bantu vandaka kusala kumosi ti bau, biyeka ya bimangu yina kumanaka. Na yau, biyeka na beto ya kusadisa bantu kenyokwama na maladi ya kinsuni, kunikana ya butomfo mpi bandosi to bimona meso, kele na ndilu.—Bisalu 8:13, 18; 1 Korinto 13:8.
17 Mbala mingi kunyokwama ya mabanza kenataka maladi. Mu mbandu, Yobi, muntu ya kubanga Nzambi, kunyokwamaka mingi na mabanza sambu na maladi ya ngolo ti bampasi ya Satana kutulaka yandi. (Yobo 1:18, 19; 2:7; 3:3, 11-13) Yandi vandaka na mfunu ya banduku yina zolaka kumonisila yandi ti nkenda mpi yina zolaka kutuba na yandi na bangogo ya “ndembika.” (1 Tesalonika 5:14) Na kisika nde yau kusalama mpila yina, bantu tatu ya kudibingaka bandembidi-mbundu kwendaka kutala yandi mpi na nswalu yonso bau kukumaka na bansukilu ya luvunu. Bau kukumisaka kunyokwama ya mabanza ya Yobi ngolo na kutubaka nde kikuma ya bampasi na yandi kuvandaka kifu na yandi mosi. Na kudimonisaka ya kufuluka na nkenda, Bakristu takuditanina na kubwa na mutambu ya mpila yina kana mosi na kati ya bankundi na bau kebela to kenyokwama na mabanza. Mbala ya nkaka, kima ya ntete ya bantu yina kevandaka na yau mfunu kele disolo ti bankuluntu to Bakristu ya kuyela na kimpeve yina tawidikila bau ti nkenda, na kudimonisaka bantu ya kubakisa mbote, mpi ya tapesa bau bandongisila ya kulunga ya mekatuka na Masonuku.—Roma 12:15; Yakobo 1:19.
Nkenda Sambu na Bantu ya Kulemba
18 Mingimingi bankuluntu fwete kuvanda ya kufuluka na nkenda. (Bisalu 20:29, 35) “Beto . . . yina kele na lukwikilu ya ngolo, beto fweti sadisa bantu yina ke na lukwikilu ya ngolo ve,” ketuma Biblia. (Roma 15:1) Sambu beto kele bantu ya kukonda kukuka, beto yonso kesalaka bifu. (Yakobi 3:2) Zola kele mfunu mingi kana beto kele na ntwala ya muntu yina “kesala kifu na ntwala ya yandi kuzaba yau.” (Galatia 6:1, NW) Bankuluntu tazola ve ata fyoti kukukana ti Bafarize yina kuvandaka ya lunungu na meso na bau mosi, yina kuvandaka bantu ya mbi na yina metala nsadila ya Nsiku ya Nzambi.
19 Kansi, bankuluntu kelandaka bambandu ya nkenda ya mingi ya Yehowa Nzambi ti Yezu Kristu. Kisalu na bau ya ntete kele ya kupesa madya, kusyamisa, mpi ya kupesa kikesa na mameme ya Nzambi. (Yezaya 32:1, 2) Na kisika ya kuyunsa kutadila mambu na kusadilaka bansiku mingi, bau ketadilaka minsiku ya kuluta mbote yina metulama na Ndinga ya Nzambi. Yau yina, mukumba ya bankuluntu fwete kuvanda ya kupesa kikesa, ya kukuna na kati ya ntima ya bampangi na bau kyese ti ntonda sambu na bumbote ya Yehowa. Kana mosi na kati ya bankundi na beto kusala kifu ya fyoti, nkuluntu tabuya kunganina yandi na ntwala ya bantu ya nkaka. Kana yau kele kibeni mfunu na kutubila yau, nkenda ya mingi tapusa nkuluntu yina na kubaka muntu yango na yandi mosi mpi sambu na kutubila yandi dyambu yango na kinsweki ya bankaka. (Tala Matayo 18:15.) Bonso yau lenda kuvanda mpasi na kuwakana ti muntu, nkuluntu fwete kusolula ti yandi na nzizidi mpi kuvanda na mpusa ya kusadisa yandi. Yandi tazola ve ata fyoti kusosa kikuma sambu na kubasisa muntu ya mutindu yina na dibundu. Ata yau melombama nde komite ya kusambisa kusalama, bankuluntu tamonisa nkenda ya mingi na nkadilu na bau na ntwala ya muntu yina mesala kifu ya nene. Lembami na bau lenda kusadisa na kunata yandi na mbalula ya ntima.—2 Timoteo 2:24-26.
20 Kansi, kele na bantangu yina nsadi mosi ya Yehowa lenda ve kumonisa nkenda. (Tala Kulonga 13:6-9.) Mukristu lenda kuwa bonso mumekamu mosi ya ngolo na mpila ya “kubika kutambula” ti nduku mosi ya nene to mambere ya dibuta na yandi yina mebasisama na dibundu. Na dyambu ya mpila yai, yau kele mfunu na kukonda kulutisila mawa. (1 Korinto 5:11-13) Kukangama ngolo ya mutindu yina lenda mpi kusyamisa nsumuki na kubalula ntima. Kansi, na ntangu bau kele na ntwala ya bantu ya kimuntu ya nkaka (bankento to babakala), Bakristu fwete kubuya na kumonisa nkenda ya kuluta yina talenda kunata na mansoni.
21 Kifulu kele mingi ve sambu beto tubila disolo yai na bamambu mingi na yau nkenda ya mingi kele mfunu—na nkadilu na beto na ntwala ya banunu, ya bayina kele na mafwa, ya bayina kevubidila minyoku ya nkwedi yina kele nkwikidi ve. Beto fwete kumonisa nkenda ya mingi sambu na bankuluntu yina kesalaka mingi. (1 Timoteo 5:17) Beto zitisa bau mpi beto pesa bau nsimbisi. (Baebreo 13:7, 17) Ntumwa Piere kusonikaka nde: “Beno yonso kuvanda . . . na nkenda ya mingi.” (1 Piere 3:8, NW) Na kusalaka mutindu yina na mambu yonso kisika yau kelombama, beto tasala na bumosi mpi na mambote ya dibundu mpi tabenda bantu ya nkaka na kyeleka. Na zulu ya yonso yai, beto tapesa lukumu na Tata na beto ya kufuluka na nkenda, Yehowa.
[Study Questions]
1. Sambu na inki nkenda kele mfunu mingi bubu yai?
2. Sambu na inki Yehowa kukingisaka sambu na kufwa bantu ya mbi?
3. Inki mbandu ya nkenda ya Yehowa sambu na bayina kele ve bantu na yandi beto kele na yau, mpi inki dilongi ya beto mebaka na yau?
4. Inki mutindu Yehowa kemonisa nkenda na yandi sambu na bantu na yandi bubu yai?
5. Inki takumina dibundu yina kevweza Nzambi na ntangu nkenda ya Nzambi takuma na nsuka na yau?
6. Na inki mambu Bambangi ya Yehowa mepusama na kumonisa nkenda na bau?
7. (a) Na Kolosai 3:8-13, inki ngwisani metulama na kati ya nkenda ti kimuntu ya mpa? (b) Na inki dyambu nkenda ya mingi kesadisaka Bakristu?
8. Sambu na inki yau kele mfunu na kuvanda na kyese na kulolula?
9. Inki kuwakana kele na kati ya nkenda ya mingi ti nkadilu ya kuluta mfunu ya kimuntu ya mpa?
10. (a) Inki mutindu kimpala lenda kubutuka na kati ya bantima na beto? (b) Inki bambutu ya mbi lenda kukatuka na kimpala?
11. Sambu na inki bampangi kumi ya Yozefi kutulaka ve nkenda na kati ya ntima na bau, mpi yau kunataka na inki?
12, 13. Inki beto fwete kusala kana kimpala meyantika kukota na ntima na beto?
14. Sambu na inki beto fwete kubuya na kutala nsaka ya kekumbisa mubulu?
15. (a) Inki mutindu muntu lenda kusonga kukonda mpenza ya nkenda? (b) Inki mutindu Bakristu ya kyeleka kesalaka na ntwala ya bansatu ya bampangi na bau bakristu mpi na ntwala ya bamfinangani na bau?
16. Inki bandilu ya beto kele na yau na yina metala lusadisu ya kupesa na bantu ya maladi?
17. Inki dilongi beto mebaka na mutindu ya bau kusadilaka Yobi, yina vandaka kubela mpi vandaka na mafwa?
18, 19. (a) Inki mutindu bankuluntu fwete kusadila bantu ya kulemba mpi bayina kesalaka bifu? (b) Ata yau kelombama nde komite ya kusambisa kusalama, sambu na inki bankuluntu fwete kukeba na kusadila bantu ya mesala bifu ti nkenda ya mingi?
20. Inki tangu yau kele mbi na kumonisa nkenda mpi sambu na inki?
21. Tanga bamambu ya nkaka na yina beto fwete kumonisa nkenda ya mingi, mpi inki mambote kebakamaka?
[Caption on page 1]
[Questions]
[Caption on page 1]
[Picture caption]
Na bansi 231, Bambangi ya Yehowa kesalaka kisalu mosi ya kuluta mbote ya mesimbama na nkenda, na banzo ya bantu, na babalabala, ata na kati ya baboloko
[Caption on page 1]
[Question box]
Bangyufula ya Mvutukila
◻ Inki mutindu Yehowa kemonisa nkenda sambu na bantu ya masumu?
◻ Sambu na inki yau kele mfunu na kufuluka na nkenda?
◻ Inki kele bikangidi ya nkaka sambu na kumonisa zola na beto ya kufuluka na mawa?
◻ Inki mutindu beto fwete kusadila bantu ya maladi ti bantu kenyokwama na mabanza?
◻ Nani fwete kuvanda ntetentete na nkenda ya mingi, mpi sambu na inki?