Dibundu Na Nge
Keti Yau Kele Maswa ya Lenda Kuyambulama Ve?
MASWA kele na katikati ya kitembo. Kibuka ya bantu, yina kuvandaka na mawa mingi kukonda kivuvu ya kugulusa maswa na bau, kele na ntwala ya lukanu ya ngolo: kubikala na kati ya maswa to kuyambula yau mpi kudigulusa bau mosi. Keti nge vandaka kuzaba nde kifwanifwani yai ya boma mesadilama bonso kingana ya teyolozi?
Bateyolozie, mingimingi ya Katolika, kefwanisaka mbala mingi dibundu na bau na maswa mosi yina ketambula na mpasi na kati ya kitembo. Bau ketubaka nde maswa yango, ti Yezu to Piere na mpindukulu, kemonisa mwaye mosi kaka ya lugulusu. Pozisio ya bamfumu ya dibundu ya Katolika kele yai: ‘Kukonda kuyambula maswa. Dibundu mekatuka kuzwa bampasi ya ngolo na ntwala, kansi yau kele maswa yina kunungaka bampasi na yau yonso ya ntama.’ Bankaka ketubaka nde: ‘Sambu na inki kuyambula yau? Inki bansola kele na kati na yau? Sambu na inki ve kubikala na kati na yau mpi kutwadisa yau na kisika masa kele mpima?’
Na kuwakana ti ntubilu yina ya kifwanisu, bantu mingi, yina kele na kati ya mabundu ya mpila na mpila, ketubaka nde: ‘Mono zaba nde dibundu na mono kele ya mbi na mambu mingi, kansi mono ketula kivuvu nde yau tasoba. Mono kezola ve kuyambula yau. Mono kezola kupesa lusadisu na mono sambu nde yau kununga bampasi na yau.’ Ngindulu ya mutindu yai lenda kukatuka na zola ya masonga sambu na dibundu ya bankaka to mbala ya nkaka na boma ya “kubasisa maswekamu” na yau.
Mbandu ya kuluta mbote kele yina ya Hans Küng, teyolozie ya Katolika yina kuzabana mbote mpenza mpi ya kuvandaka nkolami, yina kuyindulaka na mudindu nde: “Keti mono fwete kuyambula maswa na ntangu ya kitembo, na kubikilaka bayina ya mono mesala na bau kumosi na kati ya maswa ti ntangu yai mukumba ya kunwana ti mupepe ya ngolo mpi kigonsa ya kudinda ya maswa mpi mbala ya nkaka kunwana sambu na kugulusa yau?” Yandi kuvutulaka mvutu nde: “Mono tayambula ve mukumba na mono na kati ya dibundu.” Nsola ya nkaka talenda kuvanda ya “kuyambula dibundu yango, sambu na luvunu na yau, sambu na zola ya minsiku ya kuzanguka, mpi mbala ya nkaka, sambu na kukuma mukristu ya kyeleka mpenza.”—Die Hoffnung bewahren.
Kansi, keti muntu lenda kubikala na kati ya maswa ya dibundu na yandi mosi na kivuvu nde, na mawa na yandi, Nzambi tabikila mabundu yonso ntangu ya kukonda ndilu sambu na kusala nsoba? Yau kele dyambu mosi ya kuluta nene. Mutindu yau memonisama na kingana, kubasika nswalunswalu na maswa yina kele na kigonsa ya kudinda sambu na kukota na maswa yina kele na lutaninu ve kele kiteso mosi ti kubikala na kati ya maswa yina kedinda. Keti yau kele mayele na kubikala na kati ya dibundu mosi ata nkutu yau lenda kunata wapi, ata nkutu mvwandilu na yau kele inki? Keti mabundu ya ntangu na beto takuka kundima nsoba? Tii inki ntangu Nzambi tabikila yau ntangu nde yau kulanda kutelamina luzolo na yandi?