Nge Kele Mfunu Mingi na Meso Ya Nzambi!

“Ti zola ya kukonda nsuka, mono mezolaka nge. Yau yina, mono ketadilaka nge ti bumbote ya ntima.”​—YEREMIA 31:3, NW.

1. Inki mutindu nkadilu ya Yezu na ntwala ya bansukami ya ntangu na yandi kuswaswanaka ti yina ya Bafarize?

BAU lendaka kumona zola na meso na yandi. Muntu yai, Yezu, kuswaswanaka mpenza na bantwadisi ya mabundu na bau; yandi vandaka kudibanzabanza. Yandi vandaka kuwa mawa sambu na bantu yina sambu bau “kuvandaka ya kulemba mpi ya kupanzana bonso mameme ya kukonda ngungudi.” (Matayo 9:36, NW) Yau kulombamaka nde bantwadisi ya mabundu na bau kuvanda bangungudi ya zola yina kemonisa Nzambi ya zola mpi ya mawa. Na kisika na yau, bau vandaka kuvweza bansukami bonso bantu mpamba​—mpi bonso bantu ya kusingama!a (Yoane 7:47-49; fwanisa ti Ezekiele 34:4.) Yau kemonana pwelele nde ngindu yina ya mbi, ya mewakana ve ti Masonuku kuswaswanaka mpenza na mutindu Yehowa ketadilaka bantu na yandi. Yandi kutubaka na dibuta na yandi, Izraele nde: “Ti zola ya kukonda nsuka, mono mezolaka nge.”​—Yeremia 31:3, NW.

2. Inki mutindu bankundi tatu ya Yobi kumekaka na kundimisa yandi nde yandi kuvandaka muntu ya kukonda mfunu na meso ya Nzambi?

² Kansi, Bafarize kuvandaka ve bantu ya ntete na kumeka kundimisa mameme ya zolwa ya Yehowa nde bau kele na mfunu ve. Tadila mbandu ya Yobi. Na ntwala ya Yehowa, yandi kuvandaka muntu ya lunungu mpi muntu ya kukonda lusembo, kansi “bandembiki-mbundu” tatu vandaka kumonisa bonso nde Yobi kuvandaka nsadi ya mansoni, muntu ya mbi ya meyambulaka lukwikilu yina tafwa nkatu kubikisa ata kidimbu na nima na yandi. Bau vandaka kutuba nde Nzambi tandima ve mambu yonso ya lunungu ya Yobi kusalaka, sambu Nzambi kutudilaka ve nkutu bawanzyo na yandi mosi ntima mpi kutadilaka zulu yau mosi bonso ya kukonda kugedila.​—Yobi 1:8; 4:18; 15:15, 16; 18:17-19; 22:3.

3. Inki mitindu Satana kesadila bubu yai sambu na kumeka kundimisa bantu nde bau kele na mfunu ve mpi bau kezolamaka ve?

³ Bubu yai, Satana kele kaka na kusadila ‘mayele ya mbi’ yai sambu na kumeka kundimisa bantu nde bau mezolamaka ve mpi kele na mfunu ve. (Efezo 6:11, NW, tala noti na nsi ya lutiti.) Ya kyeleka, mbala mingi yandi kepukumunaka bantu na kupusaka bau na kusadila lulendo na bau. (2 Korinto 11:3) Kansi, yandi kesepelaka mpi na kufwa lukumu ya bantu ya kukonda ngolo. Yau kesalama mpila yina mingimingi na “bilumbu ya nsuka” yai ya mpasi. Bubu yai, bantu mingi keyela na mabuta yina “zola ya kyeleka kele ve”; konso kilumbu, bamingi fwete kununga bantu ya mubulu, ya bwimi to ya ntu ngolo. (2 Timoteo 3:1-5) Bamvula mingi ya kumona mpasi, ya kukonda kuwakana sambu na mpusu ya nitu, ya luyinu, to ya kunyokwama lenda kundimisa bantu ya mutindu yina nde bau kele na mfunu ve mpi kezolamaka ve. Muntu mosi kusonikaka nde: “Mono kevandaka ve na mawi ya zola sambu na konso muntu yina mpi mono mezolamaka ve na konso muntu yina. Yau kele mpasi kibeni sambu na mono na kundima nde Nzambi kekudibanzaka sambu na mono.”

4, 5. (a) Sambu na inki ngindu ya kudimona ya kukonda mfunu kele ya kuswaswana ti Masonuku? (b) Inki kele nsukilu ya kigonsa kana beto kendima nde bikesa na beto yonso kele na mfunu ve?

⁴ Ngindu yai bantu kele na mfunu ve kebwisa kyeleka ya lufulu ya Ndinga ya Nzambi, dilongi ya nkudulu. (Yoane 3:16) Kana Nzambi kukukaka kupesa kima ya kuluta ntalu​—luzingu ya kuluta mbalu ya mwana na yandi mosi​—sambu na kusumbila beto dibaku ya kuzinga mvula na mvula, ya kyeleka Yandi kezolaka beto mpenza; ya kyeleka beto kele mfunu mingi na meso na yandi!

⁵ Kuluta dyaka, yau zolaka kulembisa mpenza nitu na kuyindulaka nde Nzambi kesepelaka na beto ve, nde bikesa na beto kele na mfunu ata mosi ve! (Fwanisa ti Bingana 24:10.) Ti mboninu yai ya mbi, ata nkutu nsyamisa mepesama na ngindu ya mbote, sambu na kusadisa beto na kuyedisa kisalu na beto sambu na Nzambi kisika yau lenda kusalama, yau lenda kumonana sambu na bankaka bonso ndola. Yau lenda kumonana na mawi na beto ya kati bonso nde yonso ya beto kesalaka kele kaka fyoti.

6. Inki kele ngindu ya mbote yina meswaswana ti nkadilu ya kuvanda na bangindu ya mbi sambu na beto mosi?

⁶ Kana nge kevandaka na mawi ya mbi ya mutindu yina na kati na nge, kukatula ve kivuvu. Mbala na mbala, bamingi na kati na beto kekudiyindudilaka mambu ya mbi sambu na bau mosi. Mpi yibuka nde, Ndinga ya Nzambi mepesamaka sambu na “kusungika mambu” mpi sambu na “kubwisa bisika ya ngolo.” (2 Timoteo 3:16; 2 Korinto 10:4) Ntumwa Yoane kusonikaka nde: “Mpila yina, beto tazaba nde beto kele bantu ya kyeleka mpi beto tavanda na kikesa na ntima na ntwala na yandi sambu na mambu yonso ya ntima na beto lenda kubedisila beto, sambu Nzambi kele nene kuluta ntima na beto mpi yandi kuzaba mambu yonso.” (1 Yoane 3:19, 20, NW) Na yau, bika beto tadila mitindu tatu ya Biblia kelonga beto nde beto kele mfunu mingi na meso ya Yehowa.

Yehowa Ketadilaka Nge Nde Nge Kele Mfunu

7. Inki mutindu Yezu kulongaka Bakristu yonso na yina metala mfunu na bau na meso ya Nzambi?

⁷ Ntetentete, Biblia kelonga pwelele nde konso muntu na kati na beto kele na mfunu na meso ya Nzambi. Yezu kutubaka nde: “Keti bau ketekaka ve bansokusa tanu na tubibende zole ya mbongo? Kansi Nzambi kevilaka ve ata mosi na kati na yau. Kansi, ata nkutu nsuki ya ntu na beno kele ya kutangama yonso. Beno banga ve, beno kele na mfunu kuluta bansokusa mingi.” (Luka 12:6, 7, NW) Na bilumbu yina, nsokusa kuvandaka bandeke yina vandaka kutekama na ntalu ya kuluta fyoti bonso madya, kansi mosi ve na kati na yau kukondaka kuzabana na Ngangi na yau. Na yau, yau memonana pwelele nde: sambu na bantu, yau kele na mfunu kuluta mingi mpenza, Nzambi kuzaba mambu na bau yonso. Yau kele bonso nsuki mpenza ya ntu na beto ketangama mosi mosi!

8. Sambu na inki yau kele kyeleka na kuyindula nde Yehowa lenda kutanga bansuki ya ntu na beto?

⁸ Keti nsuki lenda kutangama? Kana nge keyindula nde kitini ya kingana ya Yezu yai kele ve ya kyeleka, zaba nde: Nzambi keyibukaka mbote mpenza bansadi na yandi ya kwikama na mpila nde yandi takuka kufutumuna bau​—na kugangaka bau dyaka ti mambu yonso, vukisa mpi mambu ya kuvandaka na kati ya kode zenetike na bau ti bansungimina mpi mambu yonso ya bau kumonaka na bamvula ya luzingu na bau. Kutangama ya nsuki na beto (yai ya kemenaka na ntu kiteso ya 100000) talenda kuvanda mpenza dyambu ya fyoti kana beto kufwanisa yau ti dyambu yina!​—Luka 20:37, 38.

Inki Mfunu Beto Kele na Yau na Meso ya Yehowa?

9. (a) Inki kele mwa bikalulu ya mbote ya Yehowa kesepelaka na yau? (b) Sambu na inki nge kendima nde bikalulu ya mutindu yina kele na mfunu mingi na meso na yandi?

⁹ Ya zole, Biblia kelonga beto mambu ya Yehowa kemonaka ya mfunu na beto. Na ntubilu ya petepete, yandi keyangalalaka na bikalulu na beto ya mbote mpi bikesa na beto. Ntotila Davidi kutubaka na mwana na yandi Salomo nde: “Yehowa kefyonguninaka bantima yonso, mpi yandi keswasukisaka balukanu mingi ya mabanza.” (1 Bansangu 28:9, NW) Sambu Nzambi kefyonguninaka bantima ya bankama ya mafunda ya mafuku ya bantu na kati ya nza yai ya kufuluka na mubulu, ya kufuluka na luyinu, mutindu yandi kevandaka na kyese na ntangu yandi kemonaka ntima yina kezola ngemba, kyeleka mpi lunungu! (Fwanisa ti Yoane 1:47; 1 Piere 3:4.) Inki kesalamaka ntangu Nzambi kemonaka ntima yina kele ya kufuluka na zola na yandi, yina kesosa kuzaba mambu ya metala yandi mpi ya kekabula nzayilu yango ti bankaka? Na Malashi 3:16 (NW), Yehowa ketubila beto nde yandi kewidikilaka bayina ya kesolulaka ti bankaka na yina metala yandi mpi yandi kele nkutu ti “mukanda ya nsungiminu” sambu na “bayina yonso kebangaka Yehowa mpi bayina yonso keyindulaka zina na yandi.” Bikalulu ya mutindu yina kele mfunu mingi na meso na yandi!

10, 11. (a) Inki mutindu bankaka talenda kukuma na kuvila mpenza nde Yehowa kesepelaka na bikalulu na bau ya mbote? (b) Inki mutindu mbandu ya Abiya kemonisa nde Yehowa kesepelaka na bikalulu ya mbote ya biteso yonso?

¹⁰ Kansi, ntima ya kudibedisa lenda kukwamina na kubuya banzikisa ya mutindu yai ya mfunu na beto na meso ya Nzambi. Yau lenda ntangu yonso kuditubilaka yau mosi na nsi ya ntima nde: ‘Kansi, bankaka mingi kele bayina kemonisa mpenza bikalulu yina kuluta mono. Mawa ya inki mutindu Yehowa tavanda na yau ntangu yandi ketesa bau ti mono!’ Yehowa ketesaka ve bansadi na yandi, yandi kele mpi ve makambu ngolo, ata nkutu na bantuma ya ngolo. (Galatia 6:4) Yandi ketangaka na kati ya bantima na luswasukusu ya mudindu, mpi yandi kesepelaka na bikalulu ya mbote ya biteso yonso.

¹¹ Mu mbandu, ntangu Yehowa kutumaka nde dibuta ya mvimba ya Ntotila Yeroboami yina kuyambulaka lukwikilu fwete kufwa, kukatulama bonso “tufi,” Yandi kutumaka nde kaka, Abiya, mosi na kati ya bana ya Ntotila muntu zolaka kuzikama na mutindu ya mbote. Sambu na inki? “Dyambu ya mbote na meso ya Yehowa Nzambi ya Izraele kumonanaka na kati na yandi.” (1 Bantotila 14:10, 13, NW) Keti yau kusongidilaka nde yandi kuvandaka nsambidi ya kwikama ya Yehowa? Yau kuvandaka mpenza mpila yina ve, sambu yandi kufwaka, bonso bansadi ya mambi ya nkaka ya nzo na yandi. (Kulonga 24:16) Kansi, Yehowa kusepelaka na “dyambu ya mbote” ya yandi kumonaka na ntima ya Abiya mpi yandi kusalaka na kuwakana ti dyambu yango. Mukanda Matthew Henry’s Commentary on the Whole Bible ketuba nde: “Kisika mwa dyambu ya mbote ya mutindu yina kele, yau tamonana: Nzambi ya kesosaka yau, kemonaka yau, ata yau kele fyoti, mpi kesepelaka na yau.” Mpi kuvila ve nde kana Nzambi mekuta ata kamwa kikalulu ya mbote ya fyoti na kati na nge, yandi lenda kuyedisa yau ntangu yonso ya nge kesala ngolo sambu na kusadila yandi na kwikama yonso.

12, 13. (a) Inki mutindu Nkunga 139:3 kemonisa nde Yehowa kesepelaka na bikesa na beto? (b) Na inki mutindu yau lenda kutubama nde Yehowa keyungulaka bisalu na beto?

¹² Yehowa kesepelaka na bikesa na beto na mutindu mosi. Na Nkunga 139:1-3 (NW), beto ketanga nde: “O Yehowa, nge mefyonguninaka mono, mpi nge zaba mono. Nge mosi kuzaba ntangu mono kefongaka mpi ntangu mono ketelemaka. Na ntama, nge ketadilaka ngindu na mono. Nge metesaka nzyetelo mpi bantangu na mono ya mvunda, mpi nge meyikanaka ti banzila na mono yonso.” Ya kyeleka, Yehowa kuzaba bisalu na beto yonso. Kansi, yandi mesuka kaka ve na kuzaba yau. Na Kiebreo, bangogo “nge meyikanaka ti banzila na mono yonso” lenda mpi kusongidila “nge kepesaka mbalu mingi na banzila na mono yonso” to “nge kezolaka banzila na mono yonso.” (Fwanisa ti Matayo 6:19, 20.) Kansi, inki mutindu Yehowa lenda kuzola banzila na beto na ntangu beto kele bantu ya kukonda kukuka mpi ya kufuluka na masumu?

¹³ Dyambu ya kubenda dikebi kele nde, na kutadila mwa bantu ya mayele, ntangu Davidi vandaka kusonika nde Yehowa “metesaka” banzyetelo mpi bantangu ya mvunda na yandi, na Kiebreo yau kesongidila kibeni “kuyungula” mpi “kupepula.” Mukanda mosi kutubaka nde: “Yau kesongidila . . . kupepula matiti yonso, mpi kubikisa kaka mbuma​—kugulusa yonso yina ya kele na mfunu. Yau yina awa yau kesongidila nde Nzambi, na ntubilu ya kifwanusu, vandaka kuyungula yandi. . .  Yandi vandaka kukatula matiti yonso, to yonso yina kuvandaka ve na mfunu, mpi yandi kumonaka nde yonso yina kubikalaka kuvandaka ya mbote mpi ya mfunu.” Ntima ya kudibedisa lenda kuyungula bisalu na beto na mutindu ya kuswaswana, kusembaka beto kukonda mawa ya ntima sambu na bifu na beto ya ntama mpi kuvwezaka bisalu yonso ya mbote ya beto kesala. Kansi Yehowa kelolulaka masumu na beto kana beto mebalula ntima na masonga yonso mpi kana beto kesala ngolo na kukonda kuvutukila bifu na beto ya ntama. (Nkunga 103:10-14; Bisalu 3:19) Yandi keponaka bisalu na beto ya mbote mpi yandi keyibukaka yau. Ya kyeleka, yandi keyibukaka yau kimakulu ntangu yonso ya beto tabikala ya kwikama na yandi. Yandi tamonana bonso muntu ya kukonda lunungu na kuvilaka yau, kansi yandi kele ve muntu ya kukonda lunungu.​—Baebreo 6:10.

14. Inki kemonisa nde Yehowa kesepelaka na bisalu na beto na kisalu ya Bukristu?

¹⁴ Inki mwa bisalu ya mbote ya Nzambi kesepelaka na yau? Mambu yonso ya beto kesalaka na kulandaka mbandu ya Mwana na Yandi, Yezu Kristu. (1 Piere 2:21) Na yau, ya kyeleka mpenza kisalu mosi ya kuluta mfunu kele luyalumunu ya nsangu ya mbote ya Kimfumu ya Nzambi. Na Roma 10:15 (NW), beto ketanga nde: “Mutindu yau kele kitoko makulu ya bayina kesamunaka nsangu ya mbote ya mambu ya mbote!” Ata nkutu beto lenda ve kuyindula mpenza nde makulu na beto yai ya mpamba kele “kitoko,” ngogo ya Polo kusadilaka awa kuvandaka yau yina mosi ya mesadilama na nsekula ya Kigeleki La Septante sambu na kutubila Rebeka, Rashele, ti Yozefi​—bau yonso tatu kuzabanaka sambu na kitoko na bau. (Kuyantika 26:7; 29:17; 39:6) Na yau, kudipesa na beto na kati ya kisalu ya Nzambi na beto, Yehowa, kele kitoko mingi mpi mfunu mingi na meso na yandi.​—Matayo 24:14; 28:19, 20.

15, 16. Sambu na inki Yehowa kesepelaka na mvibudulu na beto, mpi inki mutindu bangogo ya Ntotila Davidi na Nkunga 56:8 kemonisa dyambu yango?

¹⁵ Kikalulu ya nkaka ya Nzambi kesepelaka na yau kele mvibudulu na beto. (Matayo 24:13) Yibuka nde, Satana kezola nde nge pesa Yehowa mukongo. Konso kilumbu ya nge kebikala ya kwikama na Yehowa, kele kilumbu ya ngika ya nge kesadisilaka yandi na kupesa mvutu na masota ya Satana. (Bingana 27:11) Mbala mingi, mvibudulu kele dyambu ya petepete ve. Bampasi ya mavimpi, bampasi ya mbongo, kunyokwama ya mabanza, mpi balukakilu ya nkaka yina lenda kusala nde konso kilumbu keluta kukuma mumekamu. Mvibudulu na ntwala ya mimekamu ya mutindu yina kele na mbalu ya nene na Yehowa. Kele sambu na yau Ntotila Davidi kulombaka na Yehowa na kubumba mansanga na yandi na kati ya “mulangi” ya kifwanusu, na kuyulaka na kivuvu yonso nde, “Keti yau kele ve na mukanda na nge?” (Nkunga 56:8, NW) Ya kyeleka, Yehowa keyangalalaka na mansanga na beto yonso ti bampasi ya beto kevibidilaka na kubikalaka ya kwikama na yandi mpi yandi keyibukaka yau. Yau mpi kele na mbalu ya nene na meso na yandi.

¹⁶ Na kutadilaka bikalulu na beto ya mbote mpi bikesa na beto, mutindu yau kele pwelele nde Yehowa kemonaka mambu mingi ya kusepelisa na kati ya mosi mosi na kati na beto! Yau kuvanda dyambu ya inki mutindu ya nza ya Satana tabasisila beto, Yehowa ketadilaka beto bonso bantu ya mfunu mingi mpi bonso ndambu ya “bima ya kitoko ya mabuta yonso.”​—Agai 2:7.

Mambu ya Yehowa Mesalaka Sambu na Kumonisa Zola na Yandi

17. Sambu na inki kimenga ya nkudulu ya Kristu kendimisa beto nde Yehowa ti Yezu kezolaka mosi mosi na kati na beto?

¹⁷ Ya tatu, Yehowa kesalaka mambu mingi sambu na kumonisa zola na yandi na beto. Ya kyeleka, kimenga ya nkudulu ya Kristu kele mvutu ya kuluta ngolo na luvunu ya Satana yai nde beto kele na mfunu ve to beto kezolamaka ve. Beto fwete kuvila ve ata fyoti nde lufwa ya kuluta mpasi ya Yezu kufwaka na zulu ya nti ya mpasi mpi mpasi ya kuluta nene ya Yehowa kuvibidilaka na kumonaka lufwa ya Mwana na yandi ya zolwa kuvandaka kidimbu ya zola na bau sambu na beto. Dyaka, zola yango kemonisama na mosi mosi na kati na beto. Ntumwa Polo kutadilaka yau mutindu yina, sambu yandi kusonikaka nde: “Mwana ya Nzambi . . . kuzolaka mono mpi yandi kudipesaka yandi mosi sambu na mono.”​—Galatia 2:20, NW.

18. Na inki sansa Yehowa kebendaka beto penepene na Kristu?

¹⁸ Yehowa kumonisaka zola na yandi sambu na beto na kusadisaka mosi mosi na kati na beto sambu nde yandi kubaka mambote ya kimenga ya Kristu. Na Yoane 6:44 (NW), Yezu kutubaka nde: “Ata muntu mosi ve lenda kukwisa na mono kana Tata, yina kutindaka mono, kubenda yandi ve.” Na nzila ya kisalu ya kusamuna, yina kekuminaka mosi mosi na kati na beto, mpi na nzila ya mpeve santu na yandi, yina Yehowa kesadilaka sambu na kusadisa beto na kubakisa mpi kusadila bakyeleka ya kimpeve ata nkutu bandilu ya beto kele na yau mpi bikalulu ya kukonda kukuka, Yehowa yandi mosi kebendaka beto penepene na Mwana na yandi mpi na kivuvu ya mvula na mvula. Yau yina, Yehowa lenda kutuba na beto mutindu yandi kutubaka na Izraele nde: “Ti zola ya kukonda nsuka, mono mezolaka nge. Yau yina, mono ketadilaka nge ti bumbote ya ntima.”​—Yeremia 31:3, NW.

19. Sambu na inki dibaku ya kisambu fwete kundimisa beto nde Yehowa kele mpenza na zola sambu na beto?

¹⁹ Kansi, mbala ya nkaka kele na nzila ya dibaku ya kisambu beto kemonaka zola ya Yehowa na mutindu mosi ya mudindu. Yandi kelomba konso muntu na kati na beto na “kusambila yandi ntangu yonso.” (1 Tesalonika 5:17) Yandi kewaka! Yandi mebingama nkutu “Muwi ya bisambu.” (Nkunga 65:2) Yandi mepesaka ve mukumba yina na muntu ya nkaka, ata nkutu na Mwana na yandi mosi ve. Yindula ntete: Ngangi ya luyalanganu kesyamisa beto na kufinama penepene na yandi na nzila ya kisambu, na kimpwanza yonso ya kutuba. Malombo na nge lenda nkutu kupusa Yehowa na kusala yina ya yandi lendaka kusala ve kana nge bondilaka yandi ve.​—Baebreo 4:16; Yakobo 5:16; tala Yezaya 38:1-16.

20. Sambu na inki zola ya Nzambi kele na yau sambu na beto kele ve kikuma ya kudipesa lukumu ya kuluta to ya kuvanda na bwimi?

²⁰ Mukristu ya kukonda bukatikati talenda kutadila banzikisa yai ya zola mpi lukumu ya Nzambi bonso kikuma ya kudimona mfunu kuluta yina ya yandi kele kibeni. Polo kusonikaka nde: “Na nsadisa ya lemvo ya mono mefwana ve na kubaka yina mepesama na mono, mono ketuba na mosi mosi na kati na beno na kukonda kuditadila kuluta mutindu ya yandi fwete kuditadila; kansi na kuditadila na mpila nde yandi kuvanda na mabanza ya mbote, konso muntu na kuwakana ti kiteso ya lukwikilu ya Nzambi mepesaka yandi.” (Roma 12:3, NW) Na yau, na ntangu beto kesepela mpenza na tiya ya zola ya Tata na beto ya zulu, bika beto kubanza mpi kuyibuka nde bumbote ya Nzambi, beto mefwana ve na kubaka yau.​—Fwanisa ti Luka 17:10.

21. Inki luvunu ya Satana beto fwete ntangu yonso kutelamina, mpi inki kyeleka ya Nzambi beti fwete kulunda na dibanza?

²¹ Bika nde konso muntu na kati na beto kusala yina melunga na yandi sambu na kutelamina bangindu yonso ya Satana kepanza na kati ya nza yai ya kununa ya kezola kufwa. Yau ketadila mpi kulosa dibanza yai nde beto kele na mfunu ve to kezolamaka ve. Kana luzingu na kati ya nza yai melongaka nge na kuditadila nge mosi bonso lukakilu ya ngolo yina lenda kunungama ve ata na zola ya kuluta nene ya Yehowa, to nde bisalu na nge ya mbote kele mpenza fyoti ata nkutu meso na yandi ya kemonaka yonso kekuka kumona yau ve, to nde masumu na nge meluta mingi na mpila nde ata nkutu lufwa ya Mwana na yandi ya zolwa kekuka kufika yau ve, bau longaka nge luvunu. Losa baluvunu ya mutindu yina kumosi ti mambu ya wonga ya yau kenata! Bika nde beto lunda ntangu yonso na mabanza bangogo ya kupemama ya ntumwa Polo na Roma 8:38, 39 (NW), nde: “Mono mendima nde ata lufwa, ata luzingu, ata bawanzyo, ata baluyalu, ata bima ya ntangu yai, ata bima ya ntangu kekwisa, ata mitindu yonso ya ngolo, ata zulu, ata mudindu, to nkutu konso kigangwa ya nkaka takuka ve kukabula beto na zola ya Nzambi yina kele na Yezu Kristu Mfumu na beto.”

[Noti na nsi ya lutiti]

Inki Nge Keyindula?

◻ Sambu na inki Satana kemekaka na kundimisa beto nde beto kele na mfunu ve mpi beto kezolamaka ve?

◻ Inki mutindu Yezu kulongaka nde Yehowa kesepelaka na mosi mosi na kati na beto?

◻ Inki mutindu beto zaba nde Yehowa kezolaka bikalulu na beto ya mbote?

◻ Inki mutindu beto lenda kundima nde Yehowa keyangalalaka na bikesa na beto?

◻ Inki mutindu Yehowa memonisaka zola na yandi sambu na mosi mosi na kati na beto?

[Caption on page 24]

[Ntendula ya Bifwanisu ya lutiti 24]

Yehowa kezabaka mpi keyibukaka bayina yonso keyindulaka zina na yandi