‘Keti Mono Kele Mfunu na Nzambi?’

“KETI mono kele mfunu? Keti Nzambi Kekudibanzaka Sambu na Mono?” Yai vandaka ntu-dyambu ya disolo mosi ya zulunalu Christianity Today. Philip Yancey, nsoniki ya disolo yango, ketuba nde: “Kitini ya mingi ya kisalu na mono ya nsoniki tadilaka dyambu ya mampasi, mono vandaka kuvutukila bambala mingi dyambu yango, bonso kusimba mputa yina kebelukaka ve mbote-mbote tuka ntama. Na ntangu mono kewidikilaka batangi ya babuku na mono, bankenda na bau ya bampasi kesyamisaka bantembe na mono.”

Mbala ya nkaka nge mpi kekudiyulaka kana Nzambi ketulaka dikebi na luzingu na nge. O, nge lenda kuzaba mukapu ya Yoane 3:​16, yina ketuba nde “Nzambi me lutaka kuzola bantu yonso; yo yina yandi pesaka bo mwana mosi yina kele na yandi.” To mbala ya nkaka nge metangaka Matayo 20:​28, yina ketuba nde Yezu kwisaka sambu na “kupesa [bantu] moyo na yandi bonso mbongo ya kukatula bantu mingi na kimpika ya masumu.” To nge lenda kudiyula dyaka, ‘Keti Nzambi kezabaka mono? Keti yandi kekudibanzaka sambu na mono bonso muntu?’ Bikuma kele mingi ya kukwikila nde yandi kesalaka yau, bonso beto tamona yau.