Nunga Kumekama ya Kwikama

“Beno lwata bikalulu ya mpa mutindu beno ke lwataka bilele na beno. Bikalulu yina [gangamaka na kuwakana ti luzolo ya Nzambi, na lunungu mpi kwikama ya kyeleka, “NW”].”—EFEZO 4:24.

1. Sambu na inki beto fwete kukwikama na Yehowa Nzambi?

KUNUNGA kumekama ya kwikama kele mitindu mingi. Mutindu ya kuluta mfunu kele kununga kumekama ya kwikama na Yehowa Nzambi. Ya kyeleka, na kutadilaka yina Yehowa kele mpi yina yandi mesalaka sambu na beto, mpi sambu na kudipesa na beto na yandi, beto fwete kumonisa kwikama na yandi. Inki mutindu beto kemonisaka kwikama na Yehowa Nzambi? Mutindu ya ntete kele kuvanda ya kwikama na minsiku ya lunungu ya Yehowa.

2, 3. Inki ngwisana kele na kati ya kwikama ti lunungu?

² Na kununga kumekama yina, beto fwete kusadila bangogo yina kele na 1 Piere 1:​15, 16 nde: “Nzambi yina solaka beno, yandi kele muntu ya santu; bikalulu na beno fweti songa nde beno mpi beno kele bantu ya santu. Sambu bo sonikaka na Mukanda ya Nzambi nde: ‘Beno vanda bantu ya santu, sambu mono mpi mono kele muntu ya santu.’ ” Kwikama na Yehowa Nzambi tapusa beto na kulemfukila yandi ntangu yonso, na kunataka mabanza na beto, bangogo na beto, mpi bisalu na beto na kuwisana ti luzolo na yandi ya santu. Yau ketendula kulunda kansansa ya mbote mutindu beto metumama na 1 Timoteo 1:​3-5: “Mono ke songa bantu na kusala mpidina [kubikisa kulonga malongi ya luvunu to kuwa bingana ya luvunu] sambu bo kuvanda na kuzola yina ke basikaka na ntima ya mpembe, na [kansansa, NW] ya mbote na ntima, ti na lukwikilu ya kieleka.” Ya kyeleka, muntu mosi ve na kati na beto kele ya kukuka, kansi beto fwete kusala ngolo na kusala yina ya beto lenda, keti buna ve?

³ Kwikama na Yehowa tatanina beto na kukolama ve na minsiku ya lunungu ya Yehowa. Ya kyeleka, kwikama tatanina beto na kuvanda ve na kati mutindu ya nkaka na nganda mpi mutindu ya nkaka. Kwikama kele kima ya muyimbi Bankunga vandaka kuyindula ntangu yandi kuyimbaka nde: “Mfumu, songa mono banzila na nge, mpidina mono ta landa yo mbote-mbote, longa mono na kusadila nge na ntima mosi ya mbote.” (Nkunga 86:11) Kwikama kelomba mambu yina kutendulamaka mbotembote bonso “bulemfu na mambu yina bantu lenda kutuma ve.”

4, 5. Kwikama tasadisa beto na kusala ve inki mambu ya imbi?

⁴ Kwikama na Yehowa tapimisa beto mpi na kusala konso kima yina lenda kufingisa zina na yandi to Kimfumu na yandi. Mu mbandu, kilumbu mosi mavwanga kukotaka na kati ya Bakristu zole, na mpila nde nkatu kuyindula bau kwendaka kumonana na ntwala ya kinzonzi ya inza. Zuzi kuyulaka bau nde, ‘Keti beno zole kele Bambangi ya Yehowa?’ Yandi vandaka kubakisa mpenza ve inki bau lendaka kwenda kusala na kinzonzi. Nsoni ya inki mutindu yau kuvandaka! Kwikama na Yehowa lendaka kunata bampangi yina zole na kusadila ndongisila yai ya ntumwa Polo: “Kana beno ke nata mambu na beno na tribinale, mpidina ke songa mpi nde beno me bela ka beno dezia! Sambu na nki beno ke pesa bantu ya nkaka nzila ve bo sala beno mbi to bo yiba beno?” (1 Korinto 6:7) Ya kyeleka, kulanda nzila ya kwikama na Yehowa kele kundima kuvidisa bima na nge mosi na kisika ya kunata mafingu na zulu ya zina ya Yehowa mpi na zulu ya organizasio na yandi.

⁵ Kwikama na Yehowa Nzambi kelomba mpi kupesa ve nzila na boma ya muntu. “Kutekita na ntwala ya bantu ketulaka mutambu, kansi muntu yina ketulaka ntima na Yehowa tataninama.” (Bingana 29:25, NW) Na yau, beto kukolama ve na ntangu ya minyoku, kansi beto kulanda mbandu ya Bambangi na Union Soviétique ya ntama, na Malawi, na Ethiopie, mpi na bansi ya nkaka mingi.

6. Kwikama takangisa beto na kuvukana ve ti banani?

⁶ Kana beto kele ya kwikama na Yehowa Nzambi, beto tazola ve kuta kinduku ti bayina yonso ya kele bambeni na yandi. Kikuma yau yina longoki Yakobo kusonikaka nde: “Keti beno zaba ve nde, kana nge kele nduku ya mambu ya nsi-ntoto, nge kele mbeni ya Nzambi? Muntu yina ke zola kuvanda nduku ya mambu ya nsi-ntoto, yandi ke kuma mbeni ya Nzambi.” (Yakobo 4:4) Beto kezola kuvanda na kwikama yina Ntotila Davidi kumonisaka ntangu yandi kutubaka nde: “Mfumu, mono ke mengaka mpenza bantu yina ke mengaka nge. Mono ke zolaka ve ata fioti bantu yina ke tombukilaka nge. Mono me menga bo mingi mpenza, mono ke tangaka bo bonso bambeni na mono mosi.” (Nkunga 139:21, 22) Beto kezola ve kuvukana ti bantu yina yonso kesalaka masumu na luzolo, sambu beto mevukana na bau ata na kima mosi ve. Keti kwikama na Nzambi takangisa beto ve na kuvukana ti konso mbeni ya Yehowa ya mutindu yina, yau kuvanda kimuntu-kimuntu to na nzila ya televisio?

Beto Fwete Kotila Yehowa

7. Kwikama tasadisa beto na kusala inki sambu na Yehowa mpi inki mutindu Elihu kusalaka yau?

⁷ Kwikama tapusa beto na kukotila Yehowa Nzambi. Mbandu ya kitoko ya inki mutindu Elihu kubikisaka na dyambu yai! Yobi 32:​2, 3 ketela beto nde: “Yandi [Elihu] waka makasi sambu Yobi vandaka kutuba nde yandi salaka mbi ve, Nzambi me pesa yandi mpasi ya mpamba.  . . Yandi wilaka mpi banduku ya Yobi makasi sambu bo kukaka ve kupesa Yobi mvutu, mpidina yo vandaka kumonika nde Nzambi muntu salaka mbi.” Na Yobi, kubanda na kapu 32 tii 37, Elihu kekotila Yehowa. Mu mbandu, yandi kutubaka nde: “Yobi, kanga ntima, vingila fioti; mono ta longa nge mambu ya nkaka sambu na Nzambi. . . . mono ta zaba kunungisa Nzambi yina salaka mono. . . . Yandi ke kebaka bantu ya mbote.”​—⁠Yobi 36:​2-7.

8. Sambu na inki yau kele na mfunu na beto kukotila Yehowa?

⁸ Sambu na inki yau kele mfunu na kukotila Yehowa? Bubu yai, Nzambi na beto Yehowa kevwezama na mitindu ya kuluta mingi. Bantu ketuba nde yandi kele ve, nde yandi kele ndambu mosi ya Butatu Busantu, nde yandi kepesaka bantu mpasi mvula na mvula na bilungi ya tiya, nde yandi kelongaka lukwikilu na inza ti lebakanu yonso, nde yandi kesungiminaka ve bantu, mpi buna na buna. Beto tamonisa kwikama na yandi na kumonisaka nde Yehowa kele; nde yandi kele mayele, ya lunungu, nkwa-ngolo, mpi Nzambi ya zola; nde yandi kele na ntangu sambu na konso mambu; mpi nde kana ntangu na yandi ya kutulamaka melunga, yandi tatula nsuka na mambi yonso mpi kukitula ntoto ya mvimba paladisu. (Longi 3:1) Yau kelombila beto kusadila mabaku yonso sambu na kuta kimbangi ya zina mpi Kimfumu ya Yehowa.

Kwikama na Organizasio ya Yehowa

9. Na inki mambu bantu ya nkaka memonisaka kukonda kwikama na bau?

⁹ Ntangu yai beto ketubila mambu ya kuvanda ya kwikama na organizasio ya Yehowa ya kemonana. Na ntembe ve, beto fwete kukwikama na yau, kumosi ti na “mpika ya kwikama mpi ya mayele,” nzila ya dibundu ya Bukristu kezwilaka madya ya kimpeve. (Matayo 24:​45-47, NW) Beto baka nde kima mosi mebasika na mikanda ya La Société Watch Tower mpi beto kebakisa yau ve to kendima yau ve na ntangu yina. Inki beto tasala? Kudasuka mpi kubasika na organizasio? Yina kele mutindu bantu ya nkaka kusalaka ntangu, bamvula mingi meluta, Nzozulu ya Nkengi kutubaka nde ngwakana ya mpa tasalama na Bamvula Funda Mosi. Bankaka kudasukaka sambu na mambu ya Nzozulu ya Nkengi kutubaka na mbala ya nkaka na yina metala bukatikati. Kana bayina kubudisaka mabaku na mambu yai kuvandaka ya kwikama na organizasio mpi na bampangi na bau, bau zolaka kukinga nde Yehowa kutendula mambu yai, mutindu yandi kusalaka yau na ntangu na yandi mosi. Yau yina, kuvanda ya kwikama kelomba mpi kuvingila ti nzizidi yonso tii ntangu mpika ya kwikama mpi ya mayele tabasisa bantendula ya nkaka.

10. Kwikama tasadisa beto na kukonda kusosa kuzaba inki?

¹⁰ Kwikama na organizasio ya Yehowa ketendula mpi kuvukana ve ata fyoti ti bantu yina meyambulaka lukwikilu (baaposta). Bakristu ya kwikama tasosa ve kuzaba inki bantu ya mutindu yina kele na kutuba. Ya kyeleka, bantu yina Yehowa kele na kusadila na kutwadisa kisalu na yandi kele ve bantu ya kukuka. Kansi Ndinga ya Nzambi kesonga beto na kusala inki? Kubasika na organizasio ya Nzambi? Ve. Zola ya bumpangi fwete kubumba beto ya kwikama na yau, mpi beto fwete kulanda na “kuzolana ngolo mpenza.”​—⁠1 Piere 1:⁠22.

Kwikama na Bankuluntu ya Kukwikama

11. Kwikama tasadisa beto na kukeba sambu na inki mabanza ya imbi?

¹¹ Kana kima mosi metubama to mesalama na dibundu mpi beto kebakisa yau ve, kwikama tapimisa beto na kusosa kusambisa, mpi yau tasadisa beto na kuyambula nde mbala ya nkaka yau kele dyambu ya ketadila mboninu ya muntu na muntu. Keti yau meluta mbote ve na kutadila mingi bikalulu ya mbote ya bankuluntu yina meponamaka to nkundi ya nkaka ya nkwikidi, na kisika ya kutadila mingi bifu na bau? Ee, beto kezola kukeba sambu na mabanza yonso yina ya imbi, sambu yau kewakana ti kukonda kwikama. Kwikama tasadisa beto mpi na kulemfukila ntuma ya Polo na kutuba “mambu ya mbi ve ata na muntu mosi.”—Tito 3:1, 2.

12, 13. Inki mimekamu ya kuswaswana bankuluntu fwete kununga?

¹² Kwikama kevandaka ti mimekamu ya kuswaswana na bankuluntu. Mosi na kati ya mimekamu yai kele dyambu ya kubumba kinsweki. Mambere mosi ya dibundu lenda kuta kinsweki na nkuluntu mosi. Kwikama ya nkuluntu sambu na muntu yina takangisa yandi na kufwa nsiku ya kubumba kinsweki. Yandi tasadila ndongisila yina kele na Bingana 25:9: “Kusonga bantu ya nkaka ve kinsweki ya muntu ya nkaka.” Disongidila nde yandi lenda kusonga ve ata nkento na yandi!

¹³ Bankuluntu mpi kele ti mimekamu ya nkaka ya kwikama. Keti bau tasosa kuyangidika bantu, to bau tasadisa na kikesa yonso ti kudikulumusa bayina kele ti mfunu ya nsongisa, ata bau kele bampangi na yandi ya kinsuni to banduku ya ngolo? Kwikama na organizasio ya Yehowa tanata bayina na kati na beto ya kele bankuluntu na kusadisa muntu yonso yina kele na mfunu ya lusadisu ya kimpeve. (Galatia 6:​1, 2) Ata beto kele bantu ya mawete, kwikama takumisa beto bantu ya masonga ti bankundi na beto bankuluntu, kaka mutindu ntumwa Polo kutubaka na ntumwa Piere na masonga yonso. (Galatia 2:​11-14) Na ndambu ya nkaka, bankengi fwete kulungalala, na kudibongisaka na kukonda kusala nkatu mayele, to kumonisa nkadilu ya kukabulakabula to, na mitindu ya nkaka, na kusadilaka kiyeka na bau mbi, bau kekumisa dyambu ngolo na bayina kele na nsi ya lutwadisu na bau na kuvanda ti kwikama na organizasio ya Nzambi.​—⁠Filipi 4:⁠5.

14, 15. Inki mambu lenda kumeka kwikama ya bamambere ya dibundu?

¹⁴ Kele ti baluse ya nkaka na yina metala dyambu ya kununga kumekama ya kwikama kati ya dibundu ti bankuluntu na yau. Kana kele ti mvwandilu mosi yina kemonana bonso mavwanga na kati ya dibundu, yau kepesa beto dibaku ya kumonisa kwikama na Yehowa mpi na bayina kemonisaka yandi. (Tala Nzozulu ya Nkengi [ya Kifalansa] ya Yuni 15, 1987, balutiti 15-17.) Kana muntu mebasisama na dibundu, kwikama kelomba nde beto kukotila bankuluntu, kansi beto kumeka ve kubanda kupesa bangindu na kutuba kana kikuma ya kyeleka kuvandaka to ve na mambu yina mesalama.

¹⁵ Kwikama na dibundu kelomba mpi nde beto kusimba balukutakanu yonso tanu ya mposo na kiteso yina mvwandilu ti bingangu na beto kepesa nzila. Kwikama ketuma kaka ve nde beto kuvukana na yau mbala na mbala, kansi mpi nde beto kuyidika yau mpi kupesa bamvutu ya ketungaka kana mabaku kupesama.—Baebreo 10:24, 25.

Kwikama na Makwela

16, 17. Inki mimekamu ya kwikama Bakristu bankwelani fwete kununga?

¹⁶ Na nani ya nkaka beto fwete kumonisa kwikama? Kana beto mekwelaka, na kutadilaka ndefi na beto ya makwela, beto fwete kununga kumekama ya kuvanda ya kwikama na nkwelani na beto. Kwikama na nkento na beto takangisa beto na kumonika muntu ya kuluta mbote na bankento ya nkaka to na babakala ya nkaka kansi na nkento to na bakala na beto mosi ve. Kwikama na nkwelani na beto kelomba mpi ve nde beto sakula balebakanu ti bifu na yandi na bantu ya nganda. Yau kele mpasi ve na kwenda kubokuta ti bantu ya nkaka, kansi yau kele mpasi na kubikisa nzila ya masolo ya kukanguka ti nkwelani na beto, kima ya beto fwete kusala na kuwakana ti Nsiku ya Wolo. (Matayo 7:12) Ya kyeleka, mvwandilu ya makwela kele ti kumekama ya ngolo ya kwikama na beto ya Bukristu.

¹⁷ Na kununga kumekama ya kwikama na dyambu yai, beto fwete kutina ve kaka kusala bifu ya nene, kansi beto fwete kutanina mpi mabanza ti mawi na beto. (Nkunga 19:14) Mu mbandu, kana ntima na beto ya kufuluka ti mpukumuna kele na mpusa mingi ya luyangidilu mpi ya kyese, yau kele mpasi ve na kubikisa kutala mpamba sambu na kubanda kuzola ti bwimi yonso. Na kutumaka kwikama na makwela, Ntotila Salomo kulongisilaka babakala nde bau ‘nwa kaka na nto yai [bankento na bo].’ (Bingana 5:15) Ye Yezu kutubaka nde: “Konso muntu yina ke tala nkento ya ngani ti nzala ya kuladisa yandi, yandi me sala pite ti yandi na ntima na yandi na ntangu yina.” (Matayo 5:28) Babakala yina kekudibikisaka na kutala bima yina kemonisaka mansoni (porno), kekudikotisaka na kigonsa ya kusala bizumba, na kuyibaka nswa ya bankento na bau mpi na kuvandaka ya kukonda kwikama na ntwala na bau. Sambu na kikuma yina mosi, nkento yina kewidikila to ketala manaka yina kemwanga mambu ya bizumba, lenda kupukumunama na kukuma ya kukonda kwikama na bakala na yandi. Kansi, na kubikalaka mpenza ya kwikama na nkwelani na beto, beto kekumisa ngolo kikangilu ya makwela, mpi beto kesadisana na bikesa na beto ya kuyangidika Nzambi.

Lusadisu Sambu na Kubikala ya Kwikama

18. Kundima inki mambu tasadisa beto na kuvanda ya kwikama?

¹⁸ Inki tasadisa beto na kubikala ya kwikama na mambu yai iya: kwikama na Yehowa, na organizasio na yandi, na dibundu, mpi na nkwelani na beto? Lusadisu ya ntete kele kundima nde kununga kumekama ya kwikama kewakana ti kunungisa kimfumu ya Yehowa. Ya kyeleka, na kubikalaka ya kwikama, beto kemonisa nde Yehowa kele Nkwa-kimfumu Yonso. Na yau, beto mpi lenda kuzwa luzitu na beto mosi mpi kivuvu ya luzingu ya mvula na mvula na inza ya mpa ya Yehowa. Beto lenda kudisadisa na kubikalaka ya kwikama, na kutadilaka bambandu ya kitoko ya kwikama, kubanda na Yehowa kulumuka na bayina metubama na Biblia ti na mikanda na beto ya Watch Tower, na kati na yau masolo ya Annuaire.

19. Inki kisalu lukwikilu kesalaka na kusadisa beto na kuvanda ya kwikama?

¹⁹ Lukwikilu ya ngolo na Yehowa Nzambi mpi kitita ya kukonda kuyangidika yandi tasadisa beto na kununga kumekama ya kwikama. Beto kekumisa lukwikilu na beto ngolo mpi kitita na beto ya Yehowa na kulongukaka na kikesa yonso Ndinga ya Nzambi mpi na kuvukanaka na kisalu ya Bukristu. Yau tasadisa beto na kusala ti kuwakana na ndongisila ya Polo yina mesonama na Efezo 4:​23, 24 nde: “Ntima na beno ti mabanza na beno yo fweti vanda ya mpa mpenza. Beno lwata bikalulu ya mpa mutindu beno ke lwataka bilele na beno. Bikalulu yina [gangamaka na kuwakana ti luzola ya Nzambi, na lunungu mpi kwikama ya kyelaka, NW].”

20. Na zulu ya mambu yonso, inki kikalulu tasadisa beto na kuvanda ya kwikama na Yehowa mpi na bayina yonso ya beto fwete kukwikama?

²⁰ Kundima bikalulu ya Yehowa kesadisaka beto na kuvanda ya kwikama. Ya kuluta yonso, zola ya kukonda bwimi sambu na Tata na beto ya mazulu mpi ntonda sambu na mambu yonso yina yandi mesalaka sambu na beto, na kuzolaka yandi ti ntima ti moyo ti mabanza ti ngolo na beto yonso tasadisa beto na kuvanda ya kwikama na yandi. Dyaka, kuvanda ti zola yina Yezu kutubaka nde yau taswaswanisa balandi na yandi tasadisa beto na kuvanda na kwikama na Bakristu yonso na kati ya dibundu ya Bukristu mpi na kati ya dibuta na beto. Na ntubilu ya nkaka, yau kele mpenza dyambu ya kuvanda muntu ya bwimi to ya kukonda bwimi. Kukonda kwikama disongidila kuvanda muntu ya bwimi. Kwikama disongidila kuvanda muntu ya kukonda bwimi.​—Marko 12:30, 31; Yoane 13:34, 35.

21. Inki mutindu beto lenda tuba na bunkufi dyambu ya kuvanda ya kwikama?

²¹ Na kutuba mambu yonso na bunkufi: Kwikama kele kikalulu ya kuluta mbote ya Yehowa, Yezu Kristu, mpi bansadi yonso ya kyeleka ya Yehowa kemonisaka. Na kuvanda ti ngwakana ya mbote ti Yehowa Nzambi, beto fwete kununga kumekama ya kwikama na yandi na kusadilaka malombu na yandi ya lunungu na kuvukanaka ve ti bambeni na yandi, mpi na kukotilaka Yehowa na kusamuna na mitindu yonso. Beto fwete kununga mpi kumekama ya kubikala ya kwikama na organizasio ya Yehowa. Beto fwete kuvanda na kwikama na mabundu na beto ti na bankwelani na beto. Na kunungaka kumekama ya kwikama mbotembote, beto kevukana na ndungunu ya kimfumu ya Yehowa mpi kekota na lweka na yandi na dyambu yango. Mpila yina, beto tanunga na kubaka lemvo na yandi mpi beto tabaka nsendo ya luzingu ya mvula na mvula. Mambu ya ntumwa Polo kutubaka sambu na vumi ya bunzambi, lenda kutubama mpi na beto na yina metala kununga kumekama ya kwikama. Yau kele mfunu sambu na luzingu ya ntangu yai mpi yina ya kekwisa.​—Nkunga 18:25; 1 Timoteo 4:8.

Inki Mutindu Nge Tapesa Mvutu?

◻ Na inki mitindu beto lenda kununga kumekama ya kwikama na Nzambi?

◻ Inki kwikama na organizasio ya Yehowa kelombila beto?

◻ Inki mutindu bankuluntu lenda kununga kumekama ya kwikama?

◻ Inki kumekama yina metadila kwikama bankwelani Bakristu fwete kununga?

◻ Inki bikalulu fwete kusadisa beto na kununga kumekama ya kwikama?

[Kifwanisu ya kele na lutiti 16]

Kwikama na bamambere ya dibundu takandika bankuluntu na kubasisa mambu ya kinsweki

[Kifwanisu ya kele na lutiti 17]

Kwikama na nkwelani kekumisaka kikangilu ya makwela ngolo