Nzambi, Leta, ti Nge

“Dibundu ti Leta Kenwana Sambu na Referendum ya Nsiku ya Kufwa Makwela na Irland”

NTU-DYAMBU yai ya kele na The New York Times kemonisa mutindu bantu kekutana bubu yai ti nsola na kati ya mambu yina Leta kezola ti yina ya dibundu na bau kelonga.

Disolo yango kutubaka nde: “Ngonda mosi melunga ntete ve na ntwala referendum ya ketadila kukatula to ve bansiku ya ketadila kukonda kufwa dikwela, Irland, insi ya mefuluka mingi na bantu ya Katolika, kele na kumona mavwanga ya kelutaka kusalama ve na kati ya bamfumu na yau ya Luyalu ti bamfumu ya dibundu.” Leta kupesaka dibanza ya kukatula bansiku yina ketadila kukonda kufwa dikwela, kansi dibundu ya Katolika kubuyaka na ngolo yonso dyambu ya kufwa dikwela mpi kukwela dyaka. Yau vandaka kulomba nde bantu ya Katolika ya Irland kupona; kulemfuka na Leta to na dibundu. Na nsuka na yau, Leta kunungaka na kiteso ya kuluta kibeni mingi ve.

Dyambu ya kuluta mpasi, na Irland ya Nordi na bamvula mingi, bantu kutanaka ti mavwanga ya mingi na dyambu ya kimfumu ya insi. Bantu mingi kufwaka. Bakatolika ya Roma ti Bamisioni vandaka ti bamboninu ya kuswaswana na yina metala

Leta ya bau fwete kulemfukila: keti luyalu ya Angleterre ya vandaka kufula na Irland ya Nordi, to luyalu ya kimvuka ya Irland ya mvimba.

Mutindu mosi, na insi yina vandaka kubingama Yougoslavie, bamfumu ya luyalu melombaka nde bantu ya balukwikilu ya kuswaswana, na kati na bau Bakatolika ti Baortodoxe, kunwana bitumba sambu na ntoto. Sambu na basitwaye mingi, yau vandaka kulomba kulemfukila inki? Keti yau vandaka kulomba nde bau kulanda bayina vandaka kutuba nde bau vandaka kumonisa Leta, to yau vandaka kulomba nde bau kulemfukila Nzambi yina kutubaka nde: “Kufwa muntu ve . . . Zola mpangi na nge bonso nge mosi”?​—⁠Roma 13:⁠9.

Nge lenda kuyindula nde mvwandilu ya mutindu yai lenda kutadila nge ve. Kansi yau lenda. Na kutuba ya mbote, yau lenda kutadila nge nkutu ntangu yai. Na mukanda na yandi The State in the New Testament, theolozie Oscar Cullmann ketubila “banzengolo ya luzingu-to-lufwa ya Bakristu ya ntangu yai fwete, to lenda kubaka na bamvwandilu ya mpasi, ntangu bau kenyokulama na baluyalu ya kele demokrasi ve.” Kansi, yandi ketubila mpi “mukumba ya kyeleka mpi ya mfunu kiteso mosi, ya Bakristu yonso—kumosi ti Bakristu yina kezinga na bamvwandilu ya kebingamaka na kifu nde ‘ya mbote,’ ‘ya bilumbu yonso’—sambu na kunwana mpi kupesa mvutu na dyambu mosi ya mpasi yina yandi kekutana na yau, kaka sambu yandi kele Mukristu.”

Na yau, keti ngwisana na kati ya lusambu ti Leta fwete kutadila Bakristu bubu yai? Ee, yau fwete. Kubanda na ntangu ya ntama, Bakristu kemekaka na kukuna mboninu mosi ya bukatikati ya bamfumu ya kinsuni. Ntwadisi na bau Yezu Kristu, Leta ya Roma sambisaka yandi, bedisaka yandi, mpi gondaka yandi. Yau lombaka nde balongoki na yandi kukwedisa bantuma na bau ya Bukristu ti malombu ya Kintinu ya Roma. Na yau, mvutukilu ya ngwisana na bau ti bamfumu tamonisa beto nzila ya kulanda sambu na Bakristu bubu yai.

[Bangogo ya kemonisa kisina ya foto ya lutiti 3]

Tom Haley/Sipa Press