Beto Sadisa Bankaka na Kulonguka Malombu ya Nzambi

“Yina kele kisalu ya mono fweti sala kaka. [Mawa na mono] kana mono ke zabisaka ve Nsangu ya Mbote!”​—1 KORINTO 9:⁠16.

1, 2. (a) Na inki kisalu ya bitini zole Yehowa kelomba beto na kuvukana? (b) Inki bantu ya ntima-masonga fwete longuka sambu na kukuma bantu ya Kimfumu ya Nzambi?

YEHOWA kele ti nsangu ya mbote sambu na bantu. Yandi kele ti Kimfumu, mpi yandi kezola bantu ya bisika yonso kuwa mambu na yau! Kana beto mezaba yau, Nzambi kelomba nde beto kabula yau ti bankaka. Kisalu yai kele ti bitini zole. Ntete, beto fwete samuna nsangu ya mbote ya Kimfumu ya Nzambi. Na mbikudulu na yandi ya metadila “nsuka ya ngidika ya bima,” (NW) Yezu tubaka nde: “Bo ta longaka Nsangu yai ya Mbote ya Kimfumu na nsi-ntoto ya mvimba, na mpila nde bantu ya makanda yonso kuwa yo. Ebuna na nima, nsuka ya ntoto ta kwisa.”​—⁠Matayo 24:​3, 14.

² Kitini ya zole ya kisalu yai ketadila kulonga bayina kendima nsangu ya Kimfumu. Na nima ya lufutumuku na yandi, Yezu songaka kimvuka mosi ya nene ya balongoki na yandi nde: “Yo yina, beno kwenda kukumisa bantu yonso balonguki na mono: Beno botika bo na zina ya Tata ti ya Mwana ti ya [mpeve santu], beno longa bo mpi na kulanda mambu yonso ya mono [tumaka beno]. Beno fweti zaba mbote nde mono ta vandaka ti beno bilumbu yonso tii na nsuka ya [“ngidika ya bima,” NW].” (Matayo 28:​19, 20) ‘Mambu ya Yezu tumaka’ katukaka na yandi ve; yandi longaka bankaka na kulanda bansiku, to malombu, ya Nzambi. (Yoane 14:​23, 24; 15:10) Na yau, kulonga bankaka na ‘kulanda mambu ya Kristu tumaka’ kelomba kusadisa bau na kulonguka malombu ya Nzambi. Bantu ya ntima-masonga fwete lungisa malombu ya Nzambi sambu na kukuma bantu ya Kimfumu na yandi.

3. Kimfumu ya Nzambi kele inki, ye inki yau tasala yina kekumisa nsangu ya Kimfumu nsangu ya mbote mutindu yai?

³ Kimfumu ya Nzambi kele inki? Mpi inki yau talungisa ya kekumisa nsangu ya Kimfumu nsangu ya mbote mutindu yina? Kimfumu ya Nzambi kele luyalu mosi ya zulu. Yau kele mbalu mingi na ntima ya Yehowa, sambu yau kele nzila ya yandi tasadila sambu na kusantisa zina na yandi, na kukatulaka yau mafingu yonso. Kimfumu kele kisadilu yina Yehowa tasadila sambu na kulungisa luzolo na yandi na ntoto mutindu yau kele na zulu. Yina kele kikuma ya Yezu longaka beto na kusamba sambu Kimfumu ya Nzambi kukwisa mpi tumaka beto na kutula yau na kisika ya ntete na luzingu na beto. (Matayo 6:​9, 10, 33) Keti nge kemona sambu na inki Yehowa kemonaka yau mfunu mingi nde beto longa bankaka na yina metadila Kimfumu na yandi?

Kisalu ya Kyese Kansi Kizitu Ve

4. Inki mbandu lenda pesama na kusonga nde ntuma na beto ya kusamuna nsangu ya mbote kele kizitu ve?

⁴ Keti yau kele kizitu na kulonga nsangu yai ya mbote? Ata fyoti ve! Mu mbandu: Tata kele ti mukumba ya kusadisa dibuta na yandi na kinsuni. Kukonda kusala buna kele kiteso mosi ti kubuya lukwikilu ya Bukristu. Ntumwa Polo sonikaka nde: “Kana muntu ke sadisa bantu ya dikanda na yandi ve, nkutu kana yandi ke sadisa bantu ya fami na yandi mosi mpi ve, yandi me vidisaka lukwikilu na yandi, yandi me luta nkutu mumpani na mbi.” (1 Timoteo 5:⁠8) Kansi, keti ntuma yina kele kizitu sambu na bakala Mukristu? Ve, kana yandi kezolaka dibuta na yandi, sambu kana mutindu yina yandi tazola kusadisa bau.

5. Ata kisalu ya kusamuna mpi kukumisa bantu balongoki kele ntuma, sambu na inki beto fwete vanda na kyese na kuvukana na kusala yau?

⁵ Mutindu mosi, kisalu ya kusamuna mpi ya kukumisa bantu balongoki kele ntuma, dilombu, luzingu na beto mesimbama na yau. Polo tubilaka yau mutindu yai: “Yina kele kisalu ya mono fweti sala kaka. [Mawa na mono] kana mono ke zabisaka ve Nsangu ya Mbote!” (1 Korinto 9:16; fwanisa ti Ezekiele 33:​7-9.) Ata mpila yina, kima ketindaka beto na kusamuna kele zola, kutumama mpamba ve. Ntetentete beto kezolaka Nzambi, kansi beto kezolaka mpi bampangi na beto, ye beto kezabaka nde yau kele mfunu mingi nde bau kuwa nsangu ya mbote. (Matayo 22:​37-39) Yau kepesaka bau kivuvu sambu na makwisa. Ntama mingi ve Kimfumu ya Nzambi tasungika mambu ya kukonda lunungu, takatula mpasi yonso, mpi tavutula ngemba ti bumosi​—⁠yonso yai sambu na lusakumunu ya mvula na mvula ya bayina kelemfukaka na luyalu na yau ya lunungu. Keti beto keyangalala, ee kesepela ve, na kukabula nsangu ya mbote ya mutindu yai na bankaka?​—⁠Nkunga 110:⁠3.

6. Sambu na inki kisalu ya kusamuna ti kukumisa bantu balongoki kemonisa lukakilu ya nene?

⁶ Na bantangu yankaka, kisalu yai ya kusamuna mpi kukumisa bantu balongoki kevandaka ti lukakilu ya nene. Bantu kele ya kuswaswana. Bantu yonso kele ti dikebi to bandenda ya mutindu mosi ve. Bamosi melongukaka mingi, kansi bankaka melongukaka mingi ve. Kutanga​—⁠yina vandaka ntete bonso nsaka ya mbote​—⁠ketadilamaka mbala mingi ntangu yai bonso ndola. Kikalulu mosi, ya ketendulama bonso “kuvanda muntu ya lenda kutanga kansi kezolaka ve kusala yau,” kele na kuyela, nkutu ti na bansi yina kematisaka mapeka nde yau kele ti bantu mingi ya melongukaka. Ebuna inki mutindu beto lenda sadisa bantu ya kele ti bankenda mpi dikebi ya kuswaswana mutindu yai sambu na kulonguka mambu ya Nzambi kelombaka?​—⁠Fwanisa ti 1 Korinto 9:​20-23.

Bisadilu ya Mbote Sambu na Kusadisa Bankaka

7. Inki mutindu “mpika ya kwikama mpi ya mayele” kesadisaka beto sambu na kusadisa bankaka na kulonguka malombu ya Nzambi?

⁷ Kisalu ya mpasi kekumaka mpasi ve na kusala kana nge kele ti bisadilu ya mbote. Kisadilu yina kele mbote bubu yai sambu na kisalu mosi, lenda kubongisama mbasi to nkutu kuyingisama sambu na bansatu ya kesoba. Yau kele mutindu mosi ti kisalu na beto ya kusamuna nsangu ya Kimfumu ya Nzambi. Na bamvula ya keluta, “mpika ya kwikama mpi ya mayele” kepesaka beto bisadilu ya mefwana kibeni, mikanda ya mesalamaka ntetentete sambu na kutwadisa kulonguka ya Biblia ti bantu na banzo. (Matayo 24:​45, NW) Na yau, beto kevandaka ti lusadisu sambu na kusadisa bantu ya “makanda yonso ti ya bandinga yonso ti ya bansi yonso” na kulonguka malombu ya Nzambi. (Kusonga 7:⁠9) Mbala na mbala, bisadilu ya mpa kepesamaka sambu na kulungisa bansatu ya kesoba na inza. Bika beto tadila mwa bambandu.

8. (a) Inki kisalu mukanda “Que Dieu soit reconnu pour vrai!” kusalaka sambu na kumatisa ndongolo ya Biblia? (b) Inki kisadilu sambu na kisalu ya kulonguka Biblia pesamaka na 1968, mpi yau salamaka ntetentete sambu na inki? (c) Inki mutindu mukanda La vérité kusadisaka na kisalu ya kukumisa bantu balongoki?

⁸ Kubanda na 1946 tii 1968, beto vandaka kusadila mukanda “Que Dieu soit reconnu pour vrai!” bonso kisadilu ya ngolo sambu na ndongolo ya Biblia, ye bansononono 19 250 000 kubasikaka na bandinga 54. Mukanda La vérité qui conduit à la vie éternelle yina kubasikaka na 1968 vandaka kisadilu ya ngolo ya kulongukila Biblia ti bantu ya luzolo na bamvula mingi. Ntete, yau vandaka kusalama mingi nde bantu kulonguka Biblia bamvula mingi ti Bambangi ya Yehowa nkatu kubotama. Kansi kisadilu yai salamaka sambu na kupusa longoki, na kusyamisaka yandi na kusadila mambu ya yandi vandaka kulonguka. Mbutu? Mukanda Les Témoins de Jéhovah: Prédicateurs du Royaume de Dieu ketuba nde: “Na bamvu tatu ya kisalu yina bandaka na Septembri 1, 1968, tii nsuka na Augusti 31, 1971, kimvuka ya bantu 434 906 kubotamaka​—⁠ya kuluta mbala zole na ndambu ntalu ya bantu yina bakaka mbotika na bamvu ya kisalu tatu yina kuyitaka!” Kubanda kubasika na yau, mukanda La vérité meyalumukaka mingi kibeni​—⁠bansononono kuluta 107 000 000 na bandinga 117.

9. Inki kima ya luswaswanu kele na mukanda Zinga mvula na mvula, ye inki bupusi yau vandaka na yau na zulu ya ndonga ya bansamuni ya Kimfumu?

⁹ Na 1982 mukanda Nge lenda zinga mvula na mvula na ntoto yina takituka paladisu kumaka kisadilu ya ntete ya kutwadisila kulonguka ya Biblia ti bantu. Kisadilu yai kele ti bifwanisu kuluta 150, konso kifwanisu kele ti nsa ya mayele yina ketendula dilongi ya kele na kifwanisu na bunkufi. Kisalu na Beto ya Kimfumu October 1982 kutubaka nde: “Na bamvula kiteso ya 20 ya mukanda ‘Que Dieu soit reconnu pour vrai!’ vandaka mukanda na beto ya ntete ya kulonguka (kubanda na 1946 tii nsuka na katikati ya bamvu 1960) bansamuni ya mpa ya Kimfumu kuluta 1 000 000 kuyikamaka na ndonga na beto. Na nima, bansamuni yankaka 1 000 000 kuyikamaka na ntangu mukanda La vérité qui conduit à la vie éternelle kumaka mukanda na beto ya ntete ya kulonguka na nima ya kubasika na yau na 1968. Na kusadilaka mukanda na beto ya mpa ya kulonguka, Nge lenda zinga mvula na mvula na ntoto yina takituka paladisu, keti beto tamona kuyela ya mutindu mosi na ndonga ya bansamuni ya Kimfumu? Na ntembe ve ee, kana yau kele luzolo ya Yehowa!” Yau monanaka pwelele nde yau vandaka luzolo ya Yehowa, sambu kubanda na 1982 tii na 1995, bansamuni kuluta 2 700 000 kuyikamaka na ndonga ya bansamuni ya Kimfumu!

10. Inki kisadilu ya mpa kupesamaka na 1995, mpi sambu na inki yau fwete sadisa balongoki ya Biblia na kuyela ngolo mpi nswalu na kimpeve?

¹⁰ Yezu tubaka nde: “Bambuma mingi kele na bilanga, kansi bantu ya kisalu kele mingi ve.” (Matayo 9:37) Ya kyeleka, bambuma kele mingi na bilanga. Kisalu ya kusala kele dyaka mingi. Na bansi yankaka, bantu fwete sonikisa mazina na lisiti na kukinga kulonguka ya Biblia. Na yau, ti dibanza ya kuyalumuna nzayilu ya Nzambi nswalunswalu, na 1995 “mpika ya kwikama mpi ya mayele” pesaka kisadilu ya mpa, mukanda ya balutiti 192 na ntu-dyambu Nzayilu ya Kenataka na Luzingu ya Mvula na Mvula. Kisadilu yai ya mbalu ketubila ve mingimingi malongi ya luvunu. Yau kemonisa bakyeleka ya Biblia na mutindu mosi ya mbote. Kivuvu kele nde yau tasadisa balongoki ya Biblia na kuyela ngolo mpi nswalu na kimpeve. Mukanda Nzayilu keyita kumwangana na inza ya mvimba ti bansononono 45 500 000 ya menyemamaka na bandinga 125 yika mpi kubalulama yina kele na kusalama na bandinga yankaka 21.

11. Inki kisadilu ya ngolo kupesamaka sambu na kusadisa bayina melongukaka ve to kezabaka ve kutanga mbote, ye inki mutindu yau tulaka kidimbu ya ngolo na manaka na beto ya ndongolo?

¹¹ Mbala na mbala, ‘mpika ya kwikama’ kepesaka bisadilu ya kesalamaka ntetentete sambu na ntalu mosi ya bantu ya kuswaswana to ya fyoti. Mu mbandu, inki lenda salama sambu na bantu yina lenda vanda ti mfunu ya lusadisu ya kuswaswana sambu na bikalulu na bau ya bambuta to ya lusambu? Inki mutindu beto lenda sadisa bau na kulonguka malombu ya Nzambi? Na 1982, beto zwaka yina beto vandaka na yau mfunu​—⁠kamukanda ya balutiti 32 Zinga Mvula na Mvula na Kiese na Ntoto! Mukanda yai ya kufuluka na bifwanisu ya kitoko kevandaka kisadilu ya ngolo na kulonga bayina melongukaka ve to ketangaka mbote ve. Yau kele ti ntendula ya petepete mpi mpasi ve na kubakisa malongi ya lufulu ya Masonuku. Kubanda kubasika na yau, kamukanda Zinga mesadisaka mingi na manaka ya ndongolo ya inza ya mvimba. Bansononono kuluta 105 100 000 menyemamaka na bandinga 239, yau kevandaka tii bubu yai mukanda ya kuluta kuyalumuka ya la Société Watch Tower mesalaka!

12, 13. (a) Kubanda na 1990, ‘mpika ya kwikama’ kupesaka inki mutindu ya mpa ya kusimba bantu mingi? (b) Inki mutindu beto lenda sadila bakaseti ya video ya la Société na kisalu na beto ya bilanga? (c) Inki kisadilu ya mpa pesamaka ntama mingi ve sambu na kusadisa beto na kisalu ya kukumisa bantu balongoki?

¹² Na zulu ya mikanda ya kunyema, kubanda na 1990 ‘mpika ya kwikama’ mepesaka beto bisadilu ya ndongolo yina kepesaka mutindu ya mpa ya kusimba bantu mingi​—⁠bakaseti ya video. Na Oktobri ya mvula yango yina, yandi basisaka kaseti ya video ya minuta 55 Les Témoins de Jéhovah: un nom, une organisation​—⁠kaseti ya video ya ntete kibeni ya la Société Watch Tower kubasisaka. Nsonga yai ya kitoko, ya kelonga, na bandinga 35, kemonisa organizasio ya bantu ya Yehowa ya mekudipesaka na kulungisa na inza ya mvimba ntuma ya Yezu na kulonga nsangu ya mbote na ntoto ya mvimba. Kaseti ya video yai kusalamaka ntetentete sambu na kusadisa na kisalu na beto ya kukumisa bantu balongoki. Bansamuni ya Kimfumu kulutisaka ntangu ve na kusadila kisadilu yai ya mpa na kisalu ya bilanga. Bankaka vandaka kuluta na yau na basakosi na bau ya mikanda, ya kuyilama na kumonisa to kudefisa yau nswalu na bantu ya kemonisa dikebi. Ntama mingi ve na nima ya kubasika na yau, nkengi-ntambudi mosi sonikaka nde: “Na mvu-nkama ya 21 bavideo mekumaka mwaye ya kubenda mabanza mpi bantima ya mafuku ya bantu, yau yina beto ketula kivuvu nde kaseti ya video yai tavanda ya ntete na bakaseti ya video mingi ya la Société tasadila sambu na kuyedisa kisalu ya Kimfumu.” Ya kyeleka, bakaseti ya video mingi mebasikaka, na kati na yau yina ya bitini tatu La Bible: un livre historique et prophétique ti Jehovah’s Witnesses Stand Firm Against Nazi Assault. Kana bakaseti ya video ya la Société kele na ndinga na nge, keti nge mesadilaka yau na kisalu na nge ya bilanga?a

¹³ Ntama mingi ve kisadilu ya mpa, kamukanda Inki Nzambi Kelombaka na Beto? pesamaka sambu na kusadisa beto na kisalu ya kukumisa bantu balongoki. Sambu na inki yau basikaka? Inki mutindu yau lenda kusadilama?

Beto Fimpa Kisadilu ya Mpa

14, 15. Kamukanda Inki Nzambi Kelombaka kusalamaka sambu na banani, mpi inki kele na kati na yau?

¹⁴ Mukanda ya mpa Inki Nzambi Kelombaka na Beto? mesalama sambu na bantu yina keyitaka kukwikila na Nzambi mpi kezitisaka Biblia. Bankengi-ntambudi ti bamisionere ya Gileade ya kele na bamvula mingi ya ngikana na bansi ya keyantika na kutoma sadisaka na kusalama ya kamukanda yai. Yau kele ti dilongi ya pwelele ya malongi ya lufulu yonso ya Biblia. Bangogo kele kitoko, mpasi ve, pwelele. Ata mpila yina, mambu ya kamukanda yango kele ve ya zuluzulu. Yau kemonisa “mabele” mpamba ve, kansi mpi “madia ya ngolo” ya kekatuka na Ndinga ya Nzambi na mutindu mosi ya bantu mingi lenda bakisa.​—⁠Baebreo 5:​12-14.

¹⁵ Na bamvula ya mekatuka kuluta, bansamuni ya Kimfumu na bansi mingi lombaka mukanda ya mutindu yina kibeni. Mu mbandu, filiale ya la Société Watch Tower ya Papouasie-Nouvelle-Guinée sonikaka nde: “Bantu mekuma bisakasaka sambu na malongi ya konda kuwakana ya mabundu. Bau kele na mfunu ya bansa ya sikisiki ya kyeleka, ti mikapu ya Biblia na lweka yina bau lenda zikisa na Babiblia na bau mosi. Bau kele na mfunu ya mambu ya kemonisa pwelele mpi sikisiki yina Nzambi kelombaka na Bakristu ya kyeleka ye inki bikalulu mpi bisalu yandi kendimaka.” Kamukanda Inki Nzambi Kelombaka kele kibeni kima ya beto kele na yau mfunu sambu na kusadisa bantu ya mutindu yina na kulonguka malombu ya Nzambi.

16. (a) Banani na kingenga lenda baka mambote ya ntendula ya kukonda mpasi ya kele na kamukanda ya mpa? (b) Inki mutindu bayina kele na teritware na beto lenda baka mambote na kamukanda Inki Nzambi Kelombaka?

¹⁶ Inki mutindu nge lenda sadila kisadilu yai ya mpa? Ntete yau lenda sadilama na kulonguka ti bantu yina kezabaka kutanga ve to kezolaka ve kutanga.b Bantu ya mutindu yina lenda baka mambote na bantendula ya mpasi ve ya kele na kamukanda. Na nima ya kutadila dyaka nsononono ya keyitaka ya kamukanda yai, bafiliale ya Watch Tower sonikaka mambu yai: “Kamukanda yango tasadisa mingi na bandambu mingi ya insi kisika bantu kezolaka ve kutanga mingi.” (Brésil) “Kele ti ntalu mingi ya banzenza yina lenda tanga ve ndinga na bau ya kisina mpi kele na mpasi mingi dyaka na kutanga Kifalansa. Kamukanda yai lenda sadilama bonso lusadisu na kulonguka ti bantu ya mutindu yina.” (France) Keti nge lenda zaba bantu ya teritware na nge yina lenda baka mambote ya kamukanda Inki Nzambi Kelombaka?

17. Na inki mutindu kamukanda ya mpa lenda sadisa mingi na bansi mingi, mpi sambu na inki?

¹⁷ Ya zole, na bansi mingi kamukanda yango lenda vanda na mfunu mingi na kuyantika kulonguka ya Biblia ti bantu ya kebangaka Nzambi, bau vanda ya kulonguka to ve. Ya kyeleka, yau kelomba kusala ngolo sambu na kuyantika kulonguka na mukanda Nzayilu ya Kenataka na Luzingu ya Mvula na Mvula. Kansi na bamvwandilu yankaka, yau lenda vanda kuluta petepete na kuyantika kulonguka na kamukanda. Na nima, na ntangu ya mbote, kulonguka fwete kulanda na mukanda Nzayilu, kisadilu na beto ya ntete mpi ya kuponama sambu na kulonguka. Na yina metala nsadilu ya mutindu yai ya kamukanda Inki Nzambi Kelombaka, bafiliale ya Watch Tower sonikaka nde: “Kuyantika kulonguka ya Biblia kele mpasi, mpi dibaku ya kuyantika kulonguka ya Biblia kelutaka kumonika kana nsamuni meyantika ti kamukanda.” (Allemagne) “Kamukanda ya mutindu yai tavanda ya mbote kibeni sambu na kuyantika kulonguka ya Biblia, yina talenda kulanda na nima na mukanda Nzayilu.” (Italie) “Ata bantu ya Japon melongukaka mingi, bamingi kele ti nzayilu ya nkufi ya Biblia mpi malongi na yau ya lufulu. Kamukanda yai fwete vanda nzila ya kuluta kitoko ya kenata na mukanda Nzayilu.”​—⁠Japon.

18. Inki beto fwete yibuka na yina metala kulungisa malombu ya Nzambi?

¹⁸ Bafiliale ya la Société na ntoto ya mvimba kulombaka kamukanda yai, ye nswa kupesamaka sambu na kubalula yau na bandinga 221. Bika mukanda yai ya mpa kuvandila beto lusadisu ya mfunu sambu na kusadisa bankaka na kulonguka mambu ya Yehowa Nzambi kelombaka na bau. Na ndambu na beto, bika beto yindula nde kulungisa malombu ya Nzambi, na kati na yau ntuma ya kusamuna mpi kukumisa bantu balongoki, kepesa beto dibaku ya mbote ya kumonisa Yehowa kiteso ya beto kezolaka yandi. Ee, yina ya Nzambi kelombaka na beto kele kizitu ve. Yau kele nzila ya kuluta mbote ya kenata na luzingu!​—⁠Nkunga 19:​7-11.

[Banoti na nsi ya lutiti]

Keti Nge Lenda Tendula?

◻ Inki kisalu ya bitini zole Yehowa kelomba bansadi na yandi na kusala?

◻ Sambu na inki ntuma na beto ya kusamuna mpi kukumisa bantu balongoki kele kizitu ve?

◻ Inki bisadilu “mpika ya kwikama mpi ya mayele” mepesaka sambu na kisalu ya kusamuna mpi kukumisa bantu balongoki?

◻ Kamukanda Inki Nzambi Kelombaka mesalama sambu na banani, mpi inki mutindu beto lenda sadila yau na kisalu na beto ya kusamuna?

[Kifwanisu ya kele na lutiti 17]

Kisalu na beto ya kusamuna mpi kukumisa bantu balongoki kele kizitu ve

[Kifwanisu ya kele na lutiti 18]

“Que Dieu soit reconnu pour vrai!” (1946, revisé na 1952): 19 250 000 na bandinga 54 (Nsononono ya Kingelesi)

La vérité qui conduit à la vie éternelle (1968): 107 000 000 na bandinga 117

Nge lenda zinga mvula na mvula na ntoto yina takituka paladisu (1982): 80 900 000 na bandinga 130 (Nsononono ya Kirusi)

Nzayilu ya Kenataka na Luzingu ya Mvula na Mvula (1995): 45 500 000 na bandinga 125 (Nsononono ya Kialema)