Monisa Mabanza Yina Kristu Vandaka na Yo!
“Nzambi yina ke pesaka beto kikesa, ke songaka beto mpi nki mutindu beto fweti kanga ntima, yandi kupesa beno ngolo ya kuwakana mbote-mbote na kati na beno; mpidina beno ta landa mbandu ya Yesu Kristo.”—ROMA 15:5.
1. Inki mutindu mabanza ya muntu lenda monana na luzingu na yandi?
KIKALULU ya konso muntu kele kima ya nene ya keswaswanisaka bantu na luzingu. Kuvanda molo to kikesa, kuvanda ti mabanza ya mbote to ya mbi, kuvanda ti kikalulu ya kunwanisa to ya kusala kumosi ti bantu, kuvanda ti kikalulu ya kubokuta-bokuta to ya kupesa mersi, lenda vanda na bupusi ya ngolo na mutindu muntu kebakilaka mambu yina yandi kekutanaka na yo mpi mutindu bantu yankaka kesalaka na ntwala na yandi. Kana muntu kele ti mabanza ya mbote, yandi lenda vanda na kyese ata na kati ya mpasi. Sambu na muntu yina kevandaka ti mabanza ya mbi, bo kemonaka mambu yonso kaka mbi, ata na ntangu luzingu kele mbote.
2. Inki mutindu muntu kelongukaka bikalulu?
2 Bikalulu, yo vanda ya mbote to ya mbi, muntu lenda longuka yo. Na kuta masonga, yo kelombaka kulonguka yo. Na kisika yo ketubilaka mwana ya fyoti ya mebutuka, mukanda mosi (Collier’s Encyclopedia) ketuba nde: “Nsukansuka, bikalulu ya yandi tavanda na yo, yandi fwete baka to kulonguka yo, bonso mpila yandi fwete zaba to kulonguka ndinga mosi to mayele ya kusala konso kima yina.” Inki mutindu beto kelongukaka bikalulu? Bima mingi kesalaka nde beto longuka bikalulu, kansi kisika ya beto kezingaka ti banduku kevandaka na bupusi mingi. Mukanda ya beto mekatuka kutubila ketuba nde: “Beto kelongukaka to kebakaka, bikalulu ya bantu yina beto kezingaka na bo mingi, mutindu eponge kebendaka masa.” Mafunda ya bamvula meluta, Biblia kutubaka dyambu ya mutindu mosi: “Kana nge landa bantu ya mayele, nge ta kuma mpi mayele; kana nge landa bazoba, nge mpi ta kuma zoba.”—Bingana 13:20; 1 Korinto 15:33.
Mbandu mosi ya mabanza ya mbote
3. Nani pesaka mbandu ya mbote kana beto tala mabanza na yandi, mpi nki mutindu beto lenda landa mbandu na yandi?
3 Na mambu yonso, ata nkutu na mambu ya metala mabanza, Yezu Kristu mepesaka mbandu ya kuluta mbote. Yandi tubaka nde: “Mono me songa beno mbandu, sambu beno kusala mutindu mono me sala beno.” (Yoane 13:15) Sambu na kuvanda bonso Yezu, beto fwete longuka ntete mambu yina metala yandi.a Beto kelonguka luzingu ya Yezu ti ngindu ya kusala mambu yina ntumwa Piere kelongisila beto na kusala: “Nzambi solaka beno sambu na mambu ya mutindu yina, sambu Kristo yandi mosi monaka mpasi sambu na beno, ebuna yandi bikilaka beno mbandu sambu beno landa yo.” (1 Piere 2:21) Lukanu na beto kele ya kusala yonso yina beto lenda sambu na kusala bonso Yezu. Yo kelomba kuyedisa mabanza na yandi.
4, 5. Inki kikalulu ya mabanza ya Yezu bo ketubila mingi na Roma 15:1-3, mpi nki mutindu Bakristu lenda landa yandi?
4 Kuvanda ti mabanza ya Kristu Yezu ketendula nki? Kapu 15 ya mukanda ya Polo na bantu ya Roma kesadisa beto na kupesa mvutu na ngyufula yai. Na baverse ya ntete ya kapu yai, Polo ketubila kikalulu mosi ya nene ya Yezu ntangu yandi ketuba nde: “Beto bantu yina ke na lukwikilu ya ngolo, beto fweti sadisa bantu yina ke na lukwikilu ya ngolo ve sambu na mambu yina ke pesaka bo mpasi na ntima. Beto kusosa ve na kumona kiese kaka beto mosi, kansi konso muntu na kati na beto fweti sosa mpila ya kupesa mpi kiese na mpangi na yandi. Mpidina yandi ta sala yandi mbote, yandi ta sadisa yandi na kuvanda na lukwikilu ya ngolo. Sambu Kristo vandaka kusosa ve kumona kiese kaka yandi mosi. Bo sonikaka na Mukanda ya Nzambi nde: ‘Kusaula yina ya bantu vandaka kusaula nge, yo me kwisa kubwa na zulu ya ntu na mono.’”—Roma 15:1-3.
5 Sambu bo kelandaka mabanza ya Yezu, Biblia kesyamisa Bakristu na kuyilama sambu na kulungisa bampusa ya bantu yankaka na kudikulumusa yonso na kifulu ya kusosa nde bo mosi mpamba kumona kyese. Ya kyeleka, luzolo yina ya kudikulumusa sambu na kusadisa bantu yankaka kele kikalulu ya “bantu yina ke na lukwikilu ya ngolo.” Yezu, ya kuvandaka ngolo na kimpeve kuluta bantu yonso ya mezingaka, kutubaka sambu na yina metala yandi mosi nde: “Mutindu mosi bonso Mwana-muntu; yandi kwisaka ve sambu bantu kusadila yandi, kansi yandi kwisaka sambu na kusadila bantu ti na kupesa bo moyo na yandi bonso mbongo ya kukatula bantu mingi na kimpika ya masumu.” (Matayo 20:28) Beto Bakristu, beto mpi fwete sala ngolo sambu na kusadisa bankaka, ti “bantu yina ke na lukwikilu ya ngolo ve.”
6. Inki mutindu beto lenda landa Yezu na mutindu na yandi ya kusala na ntwala ya bantu yina vandaka kuzola yandi ve mpi kutonga yandi?
6 Kikalulu yankaka ya mbote yina Yezu vandaka na yo, vandaka mbandu ya bangindu ti bisalu yina vandaka ntangu yonso ya mbote. Yandi ndimaka ve ata mbala mosi nde bangindu ya mbi ya bantu yankaka kubebisa bangindu na yandi ya mbote ya kusadila Nzambi; beto mpi lenda ndima yo ve. Ntangu bo vandaka kutonga yandi mpi kumonisa yandi mpasi sambu yandi sambilaka Nzambi na kwikama yonso, Yezu kangaka ntima ti ntima ya madidi kibeni kukonda kubokuta. Yandi zabaka nde bantu yina kesosa kupesa bampangi na bo kyese ‘na kusala bo mambu yina kele mbote mpi kusadisa bo na kuvanda na lukwikilu ya ngolo’ bo tamenga bo na bantu yina kekwikilaka ve mpi na inza yai ya kebakisaka ve mambu.
7. Inki mutindu Yezu kumonisaka kukanga ntima, mpi sambu na nki beto fwete sala mutindu mosi?
7 Yezu kumonisaka mabanza ya mbote na mitindu yankaka. Yandi monisaka ve ntima zulu-zulu na Yehowa ata fyoti kansi yandi kingaka na kukanga ntima yonso sambu balukanu na Yandi kulungana. (Nkunga 110:1; Matayo 24:36; Bisalu 2:32-36; Baebreo 10:12, 13) Dyaka, Yezu kuwilaka ve balongoki na yandi kiseku. Yandi songaka bo nde: “Beno vanda balonguki na mono”; sambu yandi vandaka “muntu ya pima,” malongi na yandi vandaka kutunga mpi kupesa kikesa. Mpi sambu yandi vandaka “muntu ya ntima ya mbote,” yandi vandaka ve na kikalulu ya lulendo. (Matayo 11:29) Polo kesyamisa beto na kulanda mambu yai ya bikalulu ya Yezu ntangu yandi tubaka nde: “Beno vanda na mabanza yina Yesu Kristo vandaka ti yo. Yandi vandaka kaka na lukumu ya Nzambi ntangu yonso, kansi yandi vandaka na mabanza ve nde yandi fweti vanda kaka kiteso mosi na Nzambi na kingolo-ngolo. Yandi buyaka mambu yina yonso na luzolo na yandi mosi, ebuna yandi ndimaka na kukuma mpika. Yandi kumaka bonso bantu ya nkaka, yandi kwisaka kumonika na kimuntu.”—Filipi 2:5-7.
8, 9. (a) Sambu na nki beto fwete sala ngolo na kukuna kikalulu ya kukonda bwimi? (b) Sambu na nki beto fwete lemba nitu ve kana beto kekuka ve na kulanda mbotembote mbandu yina Yezu kubikisaka, mpi nki mutindu Polo kele mbandu ya mbote na dyambu yai?
8 Yo kele pete na kutuba nde beto kezola kusadila bantu yankaka, mpi beto kezola kutula mambote na bo na ntwala ya mambote na beto. Kansi, kana beto tala mabanza na beto na masonga yonso, yo lenda songa beto nde ntima na beto ya mvimba kepusa beto ve na kusala mambu yina. Sambu na nki? Ntetentete, sambu beto mebutukaka ti bikalulu ya bwimi yina beto bakaka na Adami ti Eva; ya zole, sambu beto kezingaka na inza yina kele ya kufuluka na bwimi. (Efezo 4:17, 18) Sambu na kuyedisa kikalulu ya kukonda bwimi, yo kelombaka ntangu yonso kukuna bangindu yina kewakana ve ti kimuntu na beto ya kukonda kukuka yina beto mebutukaka na yo. Sambu na kusala yo, yo kelombaka kutula mpenza luzolo mpi kikesa.
9 Kimuntu na beto ya kukonda kukuka, ya kele ya kuswaswana mpenza ti mbandu ya kukuka yina Yezu bikilaka beto, lenda lembisa beto nitu ntangu yankaka. Beto lenda tula nkutu badute nde beto takuka ve ata fyoti kukuma na mabanza yina Yezu vandaka na yo. Kansi, tala bangogo ya kepesa kikesa yina Polo kutubaka: “Sambu mono zaba nde mambu ya mbote ke zingaka ve na ntima na mono, mpidina ke songa nde, mambu ya mbote ke zingaka ve na nitu na mono ya kimuntu. Sambu, ata mono ke na nzala ya kusala mambu ya mbote, kansi mono ke lungaka ve na kusala yo. Mambu ya mbote yina ya mono ke zolaka kusala, mono ke salaka yo ve, kansi mambu ya mbi yina ya mono ke zolaka ve na kusala, mono ke salaka yo. Na ntima na mono, mono ke zolaka kulanda Bansiku ya Nzambi. Kansi na nitu na mono, mono ke wa nzala ya kusala mambu ya nkaka; nzala yina ke nwana ti Bansiku yina ya mono me ndimaka na mabanza na mono. Nzala yina ke pesaka nzila na masumu na kusimba nitu na mono.” (Roma 7:18, 19, 22, 23) Ya kyeleka, kukonda kukuka ya Polo vandaka kubikila yandi ve ntangu ya kusala luzolo ya Nzambi mutindu yandi vandaka kuzola, kansi mabanza na yandi, mutindu yandi vandaka kuyindula mpi kuwa sambu na yina metala Yehowa ti nsiku na Yandi, vandaka mbandu ya mbote. Mabanza na beto mpi lenda kuma mpidina.
Kuyambula mabanza ya mbi
10. Inki mabanza Polo kusyamisaka bantu ya Filipi na kukuna?
10 Keti mpila kele nde bantu yankaka kuyambula dibanza mosi ya mbi ya bo kele na yo? Ee. Yo vandaka mpenza mpidina sambu na Bakristu mingi na mvu-nkama ya ntete. Na mukanda ya yandi sonikilaka bantu ya Filipi, Polo tubilaka kuvanda ti mabanza ya mbote. Yandi sonikaka nde: “Mono ke tuba ve nde mono me [baka dezia] mambu yai [luzingu na zulu na nsadisa ya lufutumuku ya ntete], to nde mambu yonso ya [kukuka] me lungaka na mono. Kansi mono ke landa kaka na kubaka ntinu sambu na kubaka matabisi, sambu Yesu Kristo me bakaka mono ntete. Bampangi, mono ke tuba ve nde mono me baka ntete matabisi; kansi mono ke salaka kaka mambu mosi yai mpamba: Mono ke vilaka mambu yonso ya ntama, ebuna mono ke sosaka mpila ya kukuma na mambu yina kele na ntwala. Mono ke bakaka ntinu sambu na kubaka matabisi; matabisi yango yo yai: Nzambi ke solaka beto na kuzinga na zulu, na lusadisu ya Yesu Kristo. Beto yonso yina me kuma bambuta na mambu ya kimpeve, beto fweti vanda kaka na mabanza yo yina.”—Beto bantu metengimisa bisono; Filipi 3:12-15.
11, 12. Na nki mitindu Yehowa kesongaka beto mabanza ya mbote?
11 Mambu ya Polo metuba kesonga nde konso muntu yina, na nima ya kukuma Mukristu, kana yandi kele ve na nzala ya kuyela, tuba nde yandi kele na dibanza ya mbi. Yandi mekuka ve na kubaka mabanza ya Kristu. (Baebreo 4:11; 2 Piere 1:10; 3:14) Keti muntu ya mutindu yina lenda katula kivuvu nde imene yandi tatoma dyaka ve? Ve. Nzambi lenda sadisa beto na kubalula mabanza na beto kana beto kezola mpenza kusala yo. Polo kelanda na kutuba nde: “Kana beno ya nkaka ke na mabanza ya diswaswanu, Nzambi ta songa beno mabanza ya mbote.”—Filipi 3:15.
12 Kansi, kana beto kezola nde Yehowa kusonga beto mabanza ya mbote, beto mpi fwete sala dikabu na beto. Kulonguka Ndinga ya Nzambi na masonga yonso na nsadisa ya mikanda ya Bukristu yina “mpika ya kwikama mpi ya mayele” kebasisaka tasadisa bayina “ke na mabanza ya diswaswanu” na kuyedisa mabanza ya mbote. (Matayo 24:45, NW) Bakristu yina kele bankuluntu, ya mpeve santu meponaka sambu na ‘kukeba mbote-mbote dibundu ya Nzambi,’ tavanda na kyese ya kusadisa beto. (Bisalu 20:28) Beto kepesa matondo mingi mpila Yehowa kevilaka ve nde beto kele bantu ya kukonda kukuka, mpi yandi kepesaka beto lusadisu na zola yonso! Bika beto ndima lusadisu yango.
Beto baka malongi na bantu yankaka
13. Inki beto kelonguka na yina metala mabanza ya mbote na disolo ya Yobi yina kele na Biblia?
13 Na Roma kapu 15, Polo kemonisa nde kuyindula bambandu ya ntama lenda sadisa beto na kutomisa mabanza na beto. Yandi kesonika nde: “Mambu yonso ya bo sonikaka na Mukanda ya Nzambi, bo sonikaka yo sambu na kulonga beto na mpila nde beto kukanga ntima, beto kuvanda na kikesa na kuvingila mambu yina ya Nzambi silaka beto.” (Roma 15:4) Bansadi ya Yehowa mingi ya kwikama ya ntangu ya ntama vandaka na mfunu ya kuyambula bifu yankaka ya bo vandaka na yo. Mu mbandu, na kutuba ya mbote, Yobi vandaka na mabanza ya mbote. Yandi vandaka kutuba mbi ve na Yehowa, mpi yandi bikaka ve nde mpasi kukatula yandi ntima yina yandi vandaka kutula na Nzambi. (Yobi 1:8, 21, 22) Kansi, yandi vandaka ti kikalulu ya kudinungisa yandi mosi. Yehowa kutindaka Elihu na kwenda kusadisa Yobi sambu yandi sungika kikalulu na yandi yai. Na kifulu ya kumona nde bo kekonda yandi luzitu, Yobi kundimaka na kudikulumusa yonso nde yandi vandaka na mfunu ya kubalula mabanza mpi yandi yilamaka na kusala yo.—Yobi 42:1-6.
14. Inki mutindu beto lenda sala bonso Yobi kana bo mepesa beto ndongisila sambu na mabanza na beto?
14 Keti beto tasala mutindu Yobi kusalaka kana mpangi Mukristu mosi kuzabisa beto na zola yonso nde beto kele ti kikalulu mosi ya kemonisa mabanza ya mbi? Bonso Yobi, beto meka ve na ‘kufinga Nzambi.’ (Yobi 1:22) Kana beto kemona mpasi ya kukonda kusala kima, beto bokuta ve to kumona nde Yehowa muntu menatila beto bampasi yina. Beto mekaka ve na kudinungisa, kansi beto fwete yibukaka nde ata beto kele na konso nki mikumba na kisalu ya Yehowa, beto yonso kele kaka “bampika ya mpamba.”—Luka 17:10.
15. (a) Inki mabanza ya mbi balongoki yankaka ya Yezu kumonisaka? (b) Inki mutindu Piere kumonisaka mabanza ya mbote?
15 Na mvu-nkama ya ntete, bantu mingi yina vandaka kuwa malongi ya Yezu kumonisaka nde bo vandaka ti mabanza ya mbi. Kilumbu mosi, Yezu tubaka kima mosi ya vandaka mpasi na kubakisa. Ebuna, “ntangu balonguki ya Yesu mingi me wa mambu yina imene, bo tubaka nde: ‘Malongi yai me luta ngolo mingi! Nani lenda ndima yo?’” Yo ke pwelele nde bayina kutubaka mutindu yina vandaka ti mabanza ya mbi. Ebuna mabanza na bo ya mbi kunataka bo na kubika kuwa malongi ya Yezu. Disolo yango ketuba nde: “Sambu na mambu yina, balonguki na yandi mingi katukaka; bo kwendaka diaka ve ti yandi nzila mosi.” Keti bo yonso vandaka na mabanza ya mbi? Ve. Disolo yango kelanda mutindu yai: “Ebuna Yesu tubilaka balonguki kumi na zole nde: ‘Beno mpi, keti beno ke zola kwenda?’ Simoni Piere vutulaka nde: ‘Mfumu, na nani beto ta kwenda?’” Na nima, Piere pesaka mvutu yai na ngyufula na yandi mosi: “Mambu ya nge ke tubaka yo ke pesaka moyo ya mvula na mvula.” (Yoane 6:60, 66-68) Yai dibanza ya mbote mpenza! Na ntangu beto kekutanaka ti bantendula to mutindu ya mpa ya kubakisa Masonuku ya beto lenda mona ntete mpasi na kundima, keti yo tavanda mbote ve na kuvanda ti mabanza yina Piere kuvandaka na yo? Yo tavanda mpenza mayele ve na kuyambula kusadila Yehowa to kutuba na mpila mosi yina kewakana ve ti “mambu ya kieleka” kaka sambu bima yankaka kele mpasi na kubakisa na luyantiku!—2 Timoteo 1:13.
16. Inki mabanza ya mbi mpenza bamfumu ya mabundu ya Bayuda kumonisaka na bilumbu ya Yezu?
16 Bamfumu ya mabundu ya Bayuda ya mvu-nkama ya ntete kumonisaka ve mabanza yina Yezu vandaka na yo. Desizio na bo ya ngolo ya kubuya kuwa Yezu kumonanaka ntangu yandi tedimisaka Lazare na bafwa. Kana bo vandaka ti mabanza ya mbote, dyambu yina ya kuyituka zolaka kuvanda mpenza kidimbu yina zolaka kundimisa bo nde ya kyeleka Nzambi muntu kutindaka yandi. Kansi, beto ketanga mutindu yai: “Bambuta ya banganga-Nzambi ti Bafarize kwendaka kukutana na Kimvuka ya nene ya Bayuda; bo tubaka nde: ‘Nki beto fweti sala? Sambu muntu yina ke sala mambu mingi ya kuyituka! Kana beto bikisa yandi na kusala mpidina, bantu yonso ta ndima yandi, ebuna bamfumu ya kimfumu ya Roma ta kwisa kufwa Nzo-Nzambi na beto ti beto Bayuda.’” Inki desizio bo bakaka? “Katuka kilumbu yina, bamfumu ya Bayuda vandaka kusosa mpila ya kufwa Yesu.” Katula fondu ya bo salaka sambu na kufwa Yezu, bo wakanaka na kukatula kidimbu ya ngolo yina vandaka kusonga nde yandi vandaka muntu yina vandaka kusala mambu ya kuyituka. “Ntangu yai, bambuta ya banganga-Nzambi sosaka mpila ya kufwa mpi Lazare.” (Yoane 11:47, 48, 53; 12:9-11) Yo tavanda mbi mpenza kana beto kemonisa kikalulu ya mutindu yina mpi beto kewa makasi to kiseku sambu na bima yina fwete pesa beto kyese! Ee, yo tavanda mpi kigonsa kibeni!
Landa mabanza ya mbote ya Kristu
17. (a) Na kati ya mambu ya nki mutindu Daniele kusongaka nde yandi vandaka na boma ve? (b) Inki mutindu Yezu kumonisaka nde yandi vandaka kikesa?
17 Bansadi ya Yehowa kevandaka ti mabanza ya mbote. Ntangu bambeni ya Daniele kuwakanaka sambu na kubasisa nsiku mosi nde bilumbu 30 ya mvimba, ata muntu mosi ve lenda samba nzambi to muntu yankaka katula ntotila, Daniele kuzabaka nde yo tabebisa kuwakana na yandi ti Yehowa Nzambi. Keti yandi zolaka kubikisa kusamba Yehowa bilumbu 30 ya mvimba? Ve, yandi landaka na kusamba Yehowa mbala tatu konso kilumbu kukonda boma, mutindu yandi vandaka kusala yo ntete. (Daniele 6:6-17) Yezu kubuyaka mpi mutindu mosi nde bambeni na yandi kupesa yandi boma. Kilumbu mosi na Kisabatu, yandi kutanaka ti muntu mosi yina vandaka ti diboko ya kukauka. Yezu zabaka nde Bayuda mingi yina vandaka pana tasepila ve kana yandi kubelula muntu na kilumbu ya Kisabatu. Yandi yufulaka bo na kutuba nki bo keyindula na dyambu yina. Ntangu bo buyaka, Yezu landaka kisalu na yandi mpi yandi belulaka muntu yina. (Marko 3:1-6) Yezu vutukaka nima ve na kusala kisalu na yandi, ntangu yonso ya yandi monaka nde yo vandaka mbote na kusala yo.
18. Sambu na nki bantu yankaka kezolaka beto ve, kansi nki mutindu beto fwete sala na ntwala ya bangindu na bo ya mbi?
18 Bubu yai, Bambangi ya Yehowa kezabaka nde bo mpi fwete bika ve bangindu ya mbi ya bantu yina kezolaka bo ve nde yo pesa bo boma. Kana ve, bo tamonisa ve mabanza ya Yezu. Bantu mingi kezolaka ve Bambangi ya Yehowa, bamingi sambu bo zaba ve kyeleka, kansi bankaka sambu bo keyinaka Bambangi to nsangu na bo. Ata mpidina, beto bika ve nde bangindu na bo ya mbi kubebisa bangindu na beto ya mbote. Beto fwete bika ve nde bantu yankaka kusonga beto mutindu beto fwete samba.
19. Inki mutindu beto lenda monisa mabanza bonso yina Yezu Kristu vandaka na yo?
19 Yezu vandaka kusonga ntangu yonso mabanza ya mbote na ntwala ya balongoki na yandi mpi na ntwala ya mambu yina Nzambi kuyidikaka, ata yo vandaka mpasi na kusala mpidina. (Matayo 23:2, 3) Beto fwete landa mbandu na yandi. Ya kyeleka, bampangi na beto kele bantu ya kukonda kukuka, bonso beto mosi. Ebuna, na wapi beto tazwa banduku ya mbote, ya kwikama mpi ya kyeleka, kana na kati ya kimpangi na beto ya inza ya mvimba ve? Yehowa mepesa beto ntete ve mayele sambu na kubakisa Ndinga na yandi yonso ya kusonika, kansi nki mabundu yankaka kebakisaka mambu mbote kuluta beto? Bika beto vanda ntangu yonso ti mabanza ya mbote, mabanza yina Yezu Kristu kuvandaka na yo. Na kati ya mambu yankaka ya beto fwete zaba, yo kelomba mpi kuzaba nki mutindu kukinga Yehowa, mutindu beto tamona yo na disolo ya melanda.
[Noti na nsi ya lutiti]
a Mukanda Muntu ya Kuluta Nene ya Ntangu Yonso, yina Bambangi ya Yehowa mebasisaka, ketubilaka luzingu ti kisalu ya Yezu.
Keti Nge Lenda Tendula?
• Inki bupusi mabanza na beto kevandaka na yo na luzingu na beto?
• Tendula mabanza ya Yezu Kristu.
• Mabanza yina Yobi vandaka na yo kelonga beto nki?
• Inki mabanza beto fwete vanda na yo na ntwala ya bantu yina kezolaka beto ve?
[Bifwanisu ya kele na lutiti 18]
Mukristu yina kele ti mabanza ya mbote kesalaka ngolo sambu na kusadisa bankaka
[Kifwanisu ya kele na lutiti 20]
Kulonguka Ndinga ya Nzambi na masonga yonso kesadisaka beto na kukuma ti mabanza ya Kristu