Keti Nge Mekumisaka Kyeleka Kima na Nge Mosi?

“Beno pesa Nzambi nzila ya kubalula mabanza na beno sambu beno kukuma mutindu ya nkaka mpenza. Ebuna beno ta zaba mambu yai ya Nzambi ke zolaka: mambu yina kele ya mbote, mambu yina ke pesaka yandi kiese, mambu yina ke na kifu ve.”​—ROMA 12:2.

1, 2. Sambu na nki yo ke pete ve na kuvanda Mukristu ya kyeleka bubu yai?

KUVANDA Mukristu ya kyeleka na bilumbu ya nsuka yai ya “mpasi” kele pete ve. (2 Timoteo 3:1) Ya kyeleka, sambu na kulanda mbandu ya Kristu, muntu fwete bedisa nsi-ntoto. (1 Yoane 5:4) Yibuka mambu yina Yezu kutubaka sambu na yina metala nzila yina Mukristu fwete landa: “Kota na kielo yina kele ya fioti. Sambu kele ti kielo ya nene ti nzila ya nene yina ke nataka bantu na [lufwa, NW], bantu mingi ke kwendaka na nzila yina. Kansi kielo ti nzila yina ke nataka bantu na moyo yo kele na nkaka mpenza, bantu fioti mpamba ke monaka yo.” Yandi tubaka dyaka nde: “Kana muntu zola kwisa kulanda mono, yandi lenda yindula diaka ve luzingu na yandi mosi; kansi yandi kubaka [nti na yandi ya mpasi, NW] konso kilumbu, yandi kwisa kulanda mono.”​—Matayo 7:13, 14; Luka 9:23.

² Na nima ya kuzwa nzila ya luzingu, Mukristu fwete sala ngolo sambu yandi bikala na nzila yango. Sambu na nki yo kelombaka kusala ngolo? Sambu kudipesa ti mbotika na beto kekumisaka beto bambeni yina Satana kenwanisaka, to ya yandi kesosaka kubwisa na mayele na yandi ya mbi. (Efezo 6:11) Yandi kesosaka bisika yina beto kele ngolo ve mpi yandi kesalaka ngolo na kusadila bisika yango sambu na kubwisa beto na kimpeve. Beto lenda yituka ve, sambu mutindu yandi mekaka na kubwisa Yezu, beto lenda kinga ve nde yandi bikisa beto mpima.​—Matayo 4:1-11.

Mayele ya mbi yina Satana kesadilaka

3. Inki mutindu Satana kukotisaka badute na mabanza ya Eva?

³ Mayele mosi ya mbi ya Satana kesadilaka kele kukotisa badute na mabanza na beto. Yandi kesosaka bisika yina beto kele ve ngolo na binwaninu na beto ya kimpeve. Na luyantiku, yandi sadilaka mayele yina na Eva, ntangu yandi yulaka yandi nde: “Keti ya kieleka, Nzambi songaka beno nde beno dia ve bambuma ya konso nti yina kele na kati ya kilanga?” (Kuyantika 3:1) Disongidila Satana vandaka kutuba nde: ‘Keti yo kele mpenza mbote nde Nzambi kutudila beno nsiku yina? Sambu na nki yandi pimisaka beno kima ya kitoko mpidina? Yai mambu ya kuyituka, sambu Nzambi mezaba nde kilumbu ya beno tadya bambuma ya nti yai, meso na beno takanguka mpi beno takuma bonso Nzambi, beno ta zaba mambu ya mbote ti mambu ya mbi!’ Satana kukunaka nkeni ya badute na mabanza ya Eva ebuna yandi vandaka kukinga nde yo mena.​—Kuyantika 3:5.

4. Inki mambu bantu yankaka lenda yantika na kutudila badute bubu yai?

⁴ Inki mutindu Satana kesadilaka mayele yai bubu? Kana beto ketula bumolo na kutanga Biblia, na kulonguka beto mosi, na kusamba, mpi na kisalu na beto ya Bukristu ti balukutakanu, beto lenda bika nzila nde badute yina bantu yankaka kebasisa kukotila beto. Beto lenda yantika kudiyula nde: “Inki mutindu beto mezaba nde mambu yai kele kyeleka mutindu Yezu kulongaka yo?” “Keti beto kezinga mpenza na bilumbu ya nsuka? Ata mpidina, si beto mekuma dezia na mvu-nkama ya 21.” “Keti beto mekuma penepene na Armagedoni, to yo kele dyaka ntama?” Kana bangyufula ya badute ya mutindu yai mebasika, inki mutindu beto lenda sala sambu na kukatula yo?

5, 6. Inki beto fwete sala kana badute fwete basika na ntima na beto?

⁵ Yakobo kupesaka bandongisila ya mbote ntangu yandi sonikaka nde: “Kana muntu mosi na kati na beno ke na mayele ve, yandi lomba yo na Nzambi, ebuna Nzambi ta pesa yandi yo; sambu Nzambi ke zolaka kukaba mingi na bantu yonso na ntima ya mbote. Kansi muntu yina ke lomba na Nzambi, yandi fweti tula ntima kaka nde yandi ta baka mambu yina ya yandi me lomba. Sambu muntu yina ke na ntima zole [to, na badute] ntangu yandi ke lomba, yandi kele bonso kitembo ya masa yina ya mupepe ke tombulaka na zulu ti ke nataka na ndambu yonso. Muntu ya mutindu yina lenda tula ntima diaka ve nde yandi ta baka konso kima na Mfumu Nzambi, sambu yandi kele muntu mosi ya ntima zole, yandi mpi ke balulaka bikalulu na yandi konso ntangu.”​—Yakobo 1:5-8.

⁶ Ebuna, inki beto fwete sala? Beto fwete “lomba na Nzambi” na kisambu sambu yandi pesa beto lukwikilu mpi mayele ti kikesa ya kusala kulonguka na beto mosi, na mpila nde yo sadisa beto na kuzwa mvutu na bangyufula to badute yina mebasika. Beto lenda lomba mpi lusadisu na bantu yina kele na lukwikilu ya ngolo, mpi kukonda kutula dute nde Yehowa tapesa beto ve lusadisu yina beto kele na yo mfunu. Yakobo kutubaka dyaka nde: “Beno lemfuka na Nzambi; beno vanda bambeni ya Satana, ebuna yandi ta tina beno, yandi ta kwenda ntama. Beno kwenda penepene na Nzambi, ebuna yandi ta kwisa penepene na beno.” Ya kyeleka, badute na beto tamana kana beto kwenda penepene na Nzambi na nsadisa ya kulonguka ti kusamba.​—Yakobo 4:7, 8.

7, 8. Inki mambu lenda sadisa beto na kuzaba lusambu yina Yezu kulongaka, mpi banani kelungisaka mambu yai?

⁷ Mu mbandu, baka ngyufula yai: Inki mutindu beto kezaba nde beto kesambilaka mutindu Yezu kulongaka? Sambu na kuzwa mvutu, inki mambu beto fwete tadila? Biblia ketuba nde Bakristu ya kyeleka fwete vanda na zola ya kyeleka na kati na bo. (Yoane 13:34, 35) Bo fwete santisa zina ya Nzambi, Yehowa. (Yezaya 12:4, 5; Matayo 6:9) Mpi bo fwete zabisa bantu zina yango.​—Kubasika 3:15; Yoane 17:26.

⁸ Kidimbu yankaka ya kuzabila dibundu ya kyeleka kele kuzitisa Ndinga ya Nzambi, Biblia. Yo mpamba kezabisaka beto kimuntu ya Nzambi mpi balukanu na yandi. (Yoane 17:17; 2 Timoteo 3:16, 17) Dyaka, Bakristu ya kyeleka kelongaka Kimfumu ya Nzambi nde yo kele kivuvu mosi kaka ya bantu fwete vanda na yo sambu na kubaka luzingu ya mvula na mvula na paladisu na ntoto. (Marko 13:10; Kusonga 21:1-4) Bo kekotaka ve na makambu ya politiki ya nsi-ntoto mpi na luzingu ya banzila na yo ya mvindu. (Yoane 15:19; Yakobo 1:27; 4:4) Banani bubu yai kelungisaka mpenza mambu yai yonso? Mambu yonso memonisa nde mvutu kele kaka mosi: Bambangi ya Yehowa.

Inki beto lenda sala kana badute kemana ve nswalu?

9, 10. Inki beto lenda sala sambu na kukatula badute yina kemana ve nswalu?

⁹ Inki beto lenda sala kana badute meyantika dezia kukota na ntima na beto? Inki kibeni beto lenda sala? Ntotila ya mayele Salomo kepesa mvutu nde: “Mwana na mono, wa mambu ya mono ke longa nge ti ya mono ke songa nge na kusala; kuvila yo ve. Wa mambu ya mayele, meka mpi na kuzaba yo. Sosa na kuzwa mayele, yula ngangu na kusadisa nge; tula ngolo na kusosa yo mutindu bo ke sosaka bibende yai ya ntalu arza to bima ya nkaka ya ntalu me bumbanaka. Kana nge sala mpidina, nge ta zaba nki disongidila ya kutina Mfumu Nzambi boma; nge ta zaba mpi kuzaba Nzambi.”​—Beto bantu metengimisa bisono; Bingana 2:1-5.

¹⁰ Keti ngindu yai keyitukisa beto ve? Kana beto kele na luzolo ya kutula dikebi na mayele ya Nzambi na masonga yonso, beto ta “zaba mpi kuzaba Nzambi.” Ya kyeleka, beto lenda baka nzayilu ya Nkwa-Kimfumu ya inza ya mvimba kana beto kemonisa luzolo ya kuwa mpi ya kubaka mambu yina yandi kesonga beto na valere. Yo ketendula kudipesa na Yehowa na kisambu mpi na nsadisa ya kulonguka ya beto mosi. Mambu ya mbote yina mebumbanaka na Ndinga ya Nzambi lenda sadisa beto na kukatula badute yonso mpi na kumona nsemo ya kyeleka.

11. Inki mutindu dute kukotilaka nsadi ya Elisa?

¹¹ Na 2 Bantotila 6:11-18, beto kemona mbandu mosi ya mbote ya kemonisa mutindu kisambu kusadisaka nsadi mosi ya Nzambi yina vandaka kuwa boma mpi kutula badute na ntima. Nsadi ya Elisa kuvandaka ve na luswasukusu ya kimpeve. Yandi kukaka ve kubakisa nde bawanzio tasadisa profete ya Nzambi, yina basoda ya Siria kuzyungaka. Na boma yonso nsadi yango kutubaka na ndinga ya ngolo nde: “Mfumu, imene na beto! Nki beto ke sala?” Inki mutindu Elisa kuvutulaka? “Kuwa boma ve. Bantu yai kele na beto, bo kele mingi kuluta bo.” Kansi, mutindu nsadi yina vandaka kumona ve bawanzio yango, inki mutindu yandi zolaka kukwikila mambu yango?

12. (a) Inki mutindu badute ya nsadi yina kumanaka? (b) Inki mutindu beto lenda manisa badute yonso yina beto lenda vanda na yo?

¹² “Elisa sambaka Nzambi nde: ‘Mfumu Nzambi, kangula meso na yandi, yandi mona.’ Mfumu Nzambi kangulaka meso ya muntu ya Elisa; ebuna yandi talaka na ngumba, yandi monaka ngumba me fuluka na bampunda ya tiya ti bapusupusu ya tiya, me ziunga Elisa.” Awa, Yehowa kusadisaka nsadi ya Elisa na kumona basoda ya zulu yina vandaka kutanina Elisa. Yo kezola kutuba ve nde beto fwete tula ntima nde Nzambi kutindila beto kaka lusadisu ya mutindu mosi bubu yai. Yibuka nde yo lombaka ve nde nsadi yina ya profete kulonguka ntete Biblia ya mvimba sambu lukwikilu na yandi kukuma ngolo. Beto kele na Biblia. Kana beto sadila yo mbote, lukwikilu na beto lenda kuma mpi ngolo mutindu mosi. Mu mbandu, beto lenda yindula masolo yina ketubilaka Yehowa na kisika ya yandi kezingaka na zulu. Masolo yai kepesaka beto ve nzila ata fyoti ya kutula dute nde Yehowa kele ti organizasio mosi na zulu yina kesadisaka bansadi na yandi na kisalu ya kulonga yina kesalama na ntoto ya mvimba bubu yai.​—Yezaya 6:1-4; Ezekiele 1:4-28; Daniele 7:9, 10; Kusonga 4:1-11; 14:6, 7.

Keba na mayele ya mbi ya Satana!

13. Inki kima Satana kesadilaka sambu na kumeka kulembisa beto sambu beto bika kyeleka?

¹³ Inki mitambu Satana kesadilaka sambu na kulembisa beto na kimpeve sambu beto yambula kyeleka? Mosi na kati na yo kele mansoni, na mitindu na yo yonso ya kuswaswana. Na inza ya bubu ya mefuluka na mansoni, kubaka nkento ya zole to ya tatu ya bo kebingaka nde “babiro” (mutindu bo kebingaka nkento ya zole to ya tatu) to kulutisa mpimpa ya mvimba (na kusala mansoni) kele mambu ya kesalamaka konso kilumbu na kimvuka ya bantu ya kezolaka byese mingi mpi ya kesosaka kaka kulungisa yo ata na nzila ya nki mutindu. Bafilme, televizio, ti babande video kesikisaka luzingu ya mutindu yai. Banzila ya kupesila bansangu, mingimingi Internet, mefuluka na bifwanisu ti mambu ya kesonga kinkonga ya bankento ti babakala. Mpukumunu kekuminaka bantu yina kesosaka kutala mambu yina kesongaka kinkonga ya bankento ti babakala.​—1 Tesalonika 4:3-5; Yakobo 1:13-15.

14. Sambu na nki Bakristu mingi mebwaka na mayele ya mbi ya Satana?

¹⁴ Bakristu mingi mepesaka nzila nde mpusa ya kusosa kutala mambu ya mutindu yina kukotila bo mpi yo mebebisaka mabanza na bo ti ntima na bo na mpila nde bo mekumaka kutala bifwanisu yina muntu lenda bakisa nde yo kesonga mansoni to bafoto ya kyeleka yina kesonga mutindu bantu kevukisa nitu. Bo mosi bantu mepesaka nzila nde bo bwa na mutambu ya Satana. Kusala mambu ya mutindu yina kenataka mbala mingi bantu na kubwa na kimpeve. Bantu ya mutindu yina kekukaka ve na kubikala bonso “bana yina ke zabaka ve mambu ya mbi.” Yo yina, bo kekumaka ve ‘bambuta na mabanza na bo.’ (1 Korinto 14:20) Konso mvula, bantu mingi kebutaka mbuma ya bo kekunaka na mpila bo kezitisaka ve minsiku ti bansiku yina kele na Ndinga ya Nzambi. Bo mebuyaka na kulwata mpi kutanina “binwaninu yonso ya Nzambi ke pesaka.”​—Efezo 6:10-13; Kolosai 3:5-10; 1 Timoteo 1:18, 19.

Kumona ve kimvwama na beto mpamba

15. Sambu na nki bantu yankaka lenda mona mpasi na kubaka kimvwama na bo ya kimpeve na valere?

¹⁵ Yezu kutubaka nde: “Beno ta zaba mambu yina kele ya kieleka, ebuna mambu yina ta katula beno na kimpika.” (Yoane 8:32) Bambangi yonso meyambulaka mutindu bo vandaka kuzinga mpi mabundu yina bo vandaka kusambila ntete. Yo yina, bo keyangalalaka mpenza na kimpwanza yina kyeleka menatilaka bo. Kansi, bana yankaka ya meyelaka na mabuta yina bibuti kele na kyeleka kemonaka mpasi na kubaka kimvwama na bo ya kimpeve na valere. Bo mevandaka ve na dibundu ya luvunu to mekotaka na makambu ya nsi-ntoto ti bangindu na yo ya kusosa ntete byese, kunwa bima yina kelausaka, mpi kusala mansoni. Ebuna, bo lenda kuka ve na kubakisa luswaswanu ya ngolo yina kele na kati ya paladisu na beto ya kimpeve ti inza ya kubeba ya Satana. Nkutu bankaka kebwaka na mpukumuna ya kumeka ndikila ya inza sambu na kuzaba kana mambu ya bo kesalaka ve kele ntomo nki mutindu!​—1 Yoane 2:15-17; Kusonga 18:1-5.

16. (a) Inki bangyufula beto lenda kudiyula? (b) Inki bo kelongaka mpi kesyamisaka beto na kusala?

¹⁶ Keti beto kele mpenza na mfunu ya kuyoka misapi na beto sambu na kuwa mutindu yo kesalaka mpasi? Keti beto lenda baka ve dilongi na mambu ya mbi yina mekuminaka bankaka? Keti beto kezola kuvutuka na “potopoto” ya inza yai sambu na kuzaba kana beto kebuyaka mambu ya mbote? (2 Piere 2:20-22) Piere kuyibusaka Bakristu ya mvu-nkama ya ntete yina kuvandaka ntete na inza ya Satana nde: “Beno manisaka ntangu mingi na kuzinga mutindu bamimpani ke zolaka kuzinga. Beno vandaka kuzinga na luzingu mosi ya mbi, beno vandaka na banzala ya mbi, beno vandaka kulauka malafu, beno vandaka kwenda na bafete yina ya bantu ke salaka mambu ya kisakasaka, beno vandaka kunwa malafu mingi, beno mpi vandaka kusamba bisambu mosi ya mbi ya kusambila banzambi ya biteki.” Na kuta masonga, beto kele ve na mfunu ya kusala “mambu ya kisakasaka” ya inza sambu na kuzaba nki mutindu luzingu ya mbi kevandaka. (1 Piere 4:3, 4) Kansi, bo kelongaka beto bansiku ya kuluta nene ya Yehowa na Banzo ya Kimfumu, yina kele bisika ya bo meyidikaka sambu na kupesa beto malongi ya Biblia. Ebuna bo kesyamisa beto na kusadila mabanza na beto sambu na kubakisa nde beto kele na kyeleka mpi nde beto mekumisaka kyeleka kima na beto mosi mpenza.​—Yozue 1:8; Roma 12:1, 2; 2 Timoteo 3:14-17.

Zina na beto kuvanda ve kaka ya mpamba

17. Inki mutindu beto lenda vanda Bambangi ya Yehowa ya kyeleka?

¹⁷ Kana beto kumisa kyeleka kima na beto mosi, beto tasosa kuzabisa yo bantu yankaka na konso okazio ya mbote yina memonana. Yo kezola kutendula ve nde beto fwete ndimisa yo na kingolongolo na bantu yina kebuya. (Matayo 7:6) Ata mpidina, beto fwete wa ve nsoni na kuzabisa bantu nde beto kele Bambangi ya Yehowa. Kana muntu mosi kumonisa mwa mpusa na mpila yandi meyula ngyufula mosi ya masonga to yandi mendima mukanda mosi ya ketendulaka Biblia, beto tayilama sambu na kuzabisa yandi nswalu kivuvu na beto. Ya kyeleka, yo ketendula nde beto fwete vandaka ntangu yonso ti mikanda bisika yonso ya beto kele, yo vanda na nzo, na kisalu, na nzo-nkanda, na magazini, to na bisika ya beto kekwendaka kulenga.​—1 Piere 3:15.

18. Inki mutindu kuzabisa bantu pwelele nde beto kele Bakristu lenda vanda kima mosi ya mbote na luzingu na beto?

¹⁸ Ntangu beto kezabisaka bantu pwelele nde beto kele Bakristu, beto keyikaka ngolo ya kunwana ti mayele ya mbi ya Satana. Kana bantu kesala fete ya aniversere to nkinsi ya Lubutuku to bantu kebula bansaka ya shanse, bantu yina beto kesalaka ti bo kisika mosi tatubaka ntangu yonso nde, “Beno yangisa yandi ve. Yandi kele Mbangi ya Yehowa.” Kana bo mezaba mpidina, bantu lenda sala ve bansaka ya buzoba kisika beto kele. Ebuna, kuzabisa bo nde beto kele Bakristu tavanda kima mosi ya mbote sambu na luzingu na beto, kaka mutindu ntumwa Piere kutubaka: “Nani ta sala beno mbi kana beno ke luta kuzola kusala mambu ya mbote? Ata beno ke monaka mpasi sambu beno ke salaka mambu ya mbote, beno ta vanda kaka kiese.”​—1 Piere 3:13, 14.

19. Inki mutindu beto kezaba nde beto mekuma mpenza ntama na bilumbu ya nsuka?

¹⁹ Mambote yankaka ya kukumisa kyeleka kima na beto mosi kele nde beto tandima mpenza nde yai kele bilumbu ya nsuka ya inza yai. Beto tabakisa nde bambikudulu mingi ya Biblia ke na kulungana na ntangu na beto.a Makambu ya mbi yonso ya mekatuka kuluta na mvu-nkama ya mekatuka kumana kendimisa mpenza lukebisu yai ya Polo: “Na bilumbu ya nsuka ta vanda mpasi mingi.” (2 Timoteo 3:1-5; Marko 13:3-37) Disolo ya ketubila mvu-nkama ya 20 yina kubasikaka na zulunalu mosi vandaka na ntu-dyambu nde: “Beto Tayibukaka Yo Bonso Nsungi ya Mavwanga.” Disolo yango kutubaka nde: “Mvu 1999 kuvandaka mvula ya bo fwaka bantu kuluta mingi na kitini ya zole ya mvu-nkama ya bo fwaka bantu kuluta mingi.”

20. Yai kele ntangu ya kusala nki kisalu?

²⁰ Ntangu yai kele dyaka ve ntangu ya kutula badute. Ntembe kele ve ata fyoti nde Yehowa ke na kusakumuna kisalu ya kuluta nene ya kulonga Biblia yina kesalama na kiteso mosi ya mesalamaka ntete ve na inza ya mvimba na mpila nde bantu ya makanda yonso kuwa yo. (Matayo 24:14) Kumisa kyeleka kima na nge mosi, mpi zabisa yo na bantu yankaka. Nge tabaka luzingu ya kukonda nsuka na bilumbu kekwisa sambu na kisalu ya nge kesala ntangu yai. Kutula bumolo tasadisa beto ve na kubaka balusakumunu ya Yehowa. (Luka 9:62) Kansi, yai kele ntangu ya ‘kuvanda ngolo, bonso bantu yina lenda bwa ve. Beno kudipesa ntangu yonso na kisalu ya Mfumu Yesu, sambu beto zaba nde konso kisalu ya Mfumu ya beto ke salaka yo kele ya mfunu.’​—1 Korinto 15:58.

[Noti na nsi ya lutiti]

Keti Nge Keyibuka?

• Inki mutindu beto lenda katula badute?

• Inki dilongi beto lenda baka na mbandu ya nsadi ya Elisa?

• Na ntwala ya nki bampukumuna beto fwete kangula meso ntangu yonso?

• Sambu na nki beto fwete zabisa bantu pwelele nde beto kele Bambangi ya Yehowa?

[Bifwanisu ya kele na lutiti 19]

Kulonguka Biblia mbala na mbala mpi kusamba lenda sadisa beto na kukatula badute

[Kifwanisu ya kele na lutiti 20]

Mbona-meso mosi kusadisaka nsadi ya Elisa na kukatula badute ya yandi vandaka na yo

[Kifwanisu ya kele na lutiti 21]

Beto kelongukaka minsiku ya nene ya Yehowa na Banzo ya Kimfumu bonso yai na Benin