‘Nzambi, Sambu na Nki Nge Pesaka Nzila nde Mambu Yai Kusalama?’

RICARDO keyibukaka tii bubu yai ntangu bo vandaka ya kufonga ti nkento na yandi Maria, na kisika ya bo kevingilaka doktere.a Ata muntu mosi ve na kati na bo vandaka ti kikesa ya kutanga mvutu ya baekzame ya nsuka ya Maria kusalaka. Na nima, Ricardo kukangulaka amvelopi, mpi nswalunswalu bo talaka bangogo ya kimunganga yina kuvandaka na rapore yango. Meso na bo kubwaka na ngogo “kansere,” mpi bo zole yantikaka kudila ntangu bo bakisaka disongidila ya ngogo yina.

Ricardo keyibuka nde “doktere vandaka kusadisa beto mbote mpenza, kansi ntembe kele ve nde yandi vandaka kubakisa nde maladi kuvandaka ya ngolo sambu yandi vandaka kutubila beto mbala na mbala nde beto fwete tula ntima na Nzambi.”

Na ntwala nde bo yantika kusadila metode ya lusansu yina bo kebingaka radiation (kamasini mosi ya bankisi ya bo ketambwisaka na nitu sambu yo sosa bisika yina kansere kele sambu na kufwa yo), doktere ya Maria kumonaka nde Maria vandaka kukuka ve kuyala bidimbu ya dikulu na yandi ya kitata. Baekzame yankaka ya bo sadisaka dyaka kumonisaka nde kansere kukumaka dezia na butomfu. Na nima ya kusansa yandi mposo mosi kaka, bo yambulaka kusadila metode ya radiation. Maria yantikaka kulakana mpi yandi fwaka na nima ya bangonda zole. Ricardo ketendula nde: “Mu waka kyese mingi na kumona nde mpasi na yandi kusukaka, kansi mono zangaka yandi mingi mpenza na mpila nde mono kumaka kumona nde mono mpi tafwa. Mbala mingi, mono vandaka kudidila Nzambi nde: ‘Sambu na nki nge pesaka nzila nde dyambu yai kusalama?’”

Kana Mpasi Mebwa, Bangyufula Mingi Kebasikaka

Bonso Ricardo, bantu mingi na ntoto ya mvimba kekutanaka ti bampasi. Mbala mingi, bantu ya kemonaka mpasi kele bayina mesala kwa bo kima ve. Yindula mpasi ya ngolo ya bantu kemonaka sambu na bitumba ya kenyokulaka bo mbala na mbala. To yindula mpasi ya kemonaka bankento ya bo keladisaka na kingolongolo, bana ya bo keladisaka na kingolongolo, to bankwelani ya bo kebulaka, mpi bantu ya kekutanaka na mambu yankaka ya nku. Banda ntama, yo kemonanaka bonso nde kukonda lunungu ti bampasi yina babakala ti bankento kemonisaka bankaka kelandaka kaka na kusalama mingi. (Longi 4:1-3) Yindula dyaka bampasi ya bantu ya kenyokwama na bisumbula ya lugangu to na maladi ya mawi, ya mabanza ti ya nitu. Mpila ya kuyituka kele ve kana bantu mingi keyulaka nde: “Sambu na nki Nzambi mepesaka nzila na bampasi ya mutindu yai?”

Ata sambu na bantu yina kesambilaka, yo kevandaka ve ntangu yonso pete na kunwana ti bampasi. Nge mpi lenda kudiyula sambu na nki Nzambi ya zola mpi nkwa-ngolo yonso lendaka kupesa nzila nde bantu kumona mpasi. Kuzwa mvutu ya kitoko mpi ya mefwana na kutudila ntima na ngyufula yai ya keyangisaka bantu mingi kele mfunu sambu na ngemba na beto ya mabanza mpi na kinduku na beto ti Nzambi. Biblia kepesa mvutu ya mutindu yina. Beto kelomba na nge na kutadila mambu ya Biblia ketuba yina bo metendula na disolo ya kelanda.

[Noti na nsi ya lutiti]

[Bifwanisu ya kele na lutiti 3]

Doktere vandaka kutubila beto mbala na mbala nde beto fwete tula ntima na Nzambi