Biblia Lenda Sadisa Makwela na Nge

SAMBU na bantu mingi, makwela kevandaka dyambu mosi ya kyese. Kansi sambu na bankaka, yo kevandaka dyambu mosi ya mawa. Nkento mosi kubokutaka nde: “Ata mu kele na kati ya makwela, mu kekudiwaka bonso nde makwela yango mefwaka. Mu kekudiwaka nde bakala na mono kekipaka mono ve mpi nde mu kevandaka kaka mono mosi konso ntangu.”

Inki kesalaka nde bantu zole yina kupesanaka ntete lusilu ya kuzolana, kuzolana dyaka ve? Kikuma mosi kevandaka kukonda kuzaba mambu yina makwela kelombaka. Muntu ya zulunalu mosi ya kimunganga ketuba nde: “Bo kelongaka beto ve ata fyoti na ntangu beto kekwelaka.”

Kimvuka mosi (The National Marriage Project) ya bantu ya Iniversite ya Rutgers na New Jersey, Etats-Unis, kusalaka bansosa yina kumonisaka nde bantu fyoti mpamba melongukaka mambu yina makwela kelombaka. Bamfumu ya kimvuka yango kusonikaka nde: “Bansosa yina kumonisaka nde bantu mingi meyelaka na mabuta yina bibuti kuvandaka ve ti makwela ya kyese to na mabuta yina bibuti kufwaka makwela. Bantu ya mutindu yina kezabaka mbotembote mutindu makwela ya mbi kevandaka, kansi bo kebakisaka mbote ve kana makwela ya mbote kevandaka nki mutindu. Bankaka ketubaka kaka nde makwela ya mbote kele ‘yina ya meswaswana ti makwela ya bibuti na munu.’”

Keti mavwanga lenda kota ve na makwela ya Bakristu? Mavwanga lenda kota. Nkutu na mvu-nkama ya ntete Bakristu yankaka kuvandaka ti mfunu ya bandongisila ya pwelele sambu na kukonda “kufwa” makwela na bo. (1 Korinto 7:27) Ya kyeleka, makwela yonso ya bantu zole ya kukonda kukuka kevandaka ti mavwanga na yo, kansi beto kevandaka ti lusadisu. Babakala ti bankento yina mekwelaka lenda tomisa bangwisana na bo kana bo kesadila minsiku ya Biblia.

Ya kyeleka, Biblia kele ve mukanda mosi ya kelongaka kaka mambu ya makwela. Kansi, sambu yo mepemamaka na Muntu yina kusalaka makwela, beto lenda tula ntima nde minsiku na yo lenda sadisa beto. Na nzila ya profete Yezaya, Yehowa Nzambi kutubaka nde: “[Yehowa], Nzambi ya Israele, Mfumu Nzambi yina ke gulusaka nge, yandi ke tuba nde: ‘Mono Mfumu Nzambi na nge, mono muntu ke longa nge sambu na mambote na nge, mono muntu ke nata nge na nzila ya nge fweti landa. Kana nge landaka bansiku na mono mbote-mbote, nge zolaka kuvanda na ngemba kimakulu, nge zolaka kununga mpenza; yo zolaka kuvanda bonso masa ke luta mingi, yo ke yuma ve.’”​—Yezaya 48:17, 18.

Keti zola yina kuvandaka ntete na kati na nge ti nkwelani na nge meyantika kukita? Keti nge kemona nde zola kele ve na makwela na nge? Nkento mosi ya mesalaka bamvula 26 na makwela kutubaka nde: “Yo kele pete ve na kutendula mpasi yina muntu kewaka na makwela ya mutindu yina. Mpila ya kutina mpasi yango kevandaka ve mpi yo kevandaka ntangu yonso.” Na kisika ya kundima kuzinga na makwela ya mutindu yina, sambu na nki kusala ve kima mosi sambu na kutomisa yo? Disolo yina kelanda tamonisa nki mutindu minsiku ya Biblia lenda sadisa babakala ti bankento yina mekwelaka na dyambu mosi ya sikisiki: dyambu ya metala lusilu ya makwela.