Keti Nge Kezabaka Kusolula Mbote?

BAMVULA fyoti meluta, banke mosi ya Japon kusadisaka nsaka mosi ya mbongo yina vandaka na ntu-dyambu yai: “Mukanda ya Zola ya Mununu Mosi ya Bamvula 60.” Bo lombaka bantu ya Japon yina kuvandaka na bamvula kiteso ya 50 mpi 60 na kusonika mukanda sambu na kumonisila bankwelani na bo “mawi na bo ya masonga.” Muntu mosi ya kusalaka nsaka yango kusonikilaka nkento na yandi nde: “Ziku nge taseka, kansi yo tasala munu mpasi kana mu tuba yo ve, yo yina mu ketuba na ndinga ya ngolo nde: Matondo mingi na mutindu nge ndimaka kukwela munu.”

Na bansi mingi, yika mpi bansi yankaka ya ndambu ya Esti, bo kebuyisaka bantu na kumonisa mawi na bo. Ata mpidina, bantu kiteso ya 15 000 kusalaka nsaka yina ya kusonika mukanda ya zola. Sambu bantu mingi kibeni kusepelaka na nsaka yina, bo sadisaka nsaka yankaka, mpi bo basisaka nkutu babuku yina kuvutukilaka mambu yina kuvandaka na mikanda yina. Dyambu yai kemonisa nde bantu mingi kevandaka mpenza ti mpusa ya kumonisila bankwelani na bo ya bo kezolaka mingi mambu ya bo kevandaka na yo na ntima. Kansi, bankaka kezolaka ve kusala yo. Sambu na inki? Yo lenda vanda sambu yo kelombaka nde bo sala kikesa mpi bo sadila mayele sambu bantu yankaka, mu mbandu nkwelani, kubakisa mawi na bo.

Hitoshi Kato, yina kusonikaka mukanda mosi ya ketubila pansio, ketuba nde na kati ya bantu ya Japon yina mekwelaka ntama, mbala mingi bankento bantu kesosaka kufwa makwela sambu na kimbeni mpi makasi ya bo mebumbaka na ntima tuka bamvula mingi. “Kansi,” yandi ketuba nde, “yo kele mpi sambu bankwelani kesolulaka ve na ntangu bo kekutanaka ti mambu ya mpasi.”

Bantangu yankaka bankento kezolaka kufwa makwela kaka ntangu fyoti kana babakala mebaka pansio, mpi dyambu yai keyitukisaka babakala yango mingi. Ziku banda bamvula mingi bankwelani yango vandaka kusolula ve sambu na kuzaba mutindu bo kezolanaka. Mbala yankaka bakala ti nkento kusosaka mpila ya kumonisa mawi na bo, kansi bo vandaka kukuka ve na kulanda kusolula mbote. Na kisika ya kuyedisa kinduku ya ngolo, bo kumaka kaka kuswana mbala na mbala.

Inki mutindu bakala ti nkento lenda bongisa kukonda kuwakana na bo na ngemba mpi kumonisa mawi na bo na mutindu mosi ya mbote? Nge lenda sepela na kuzaba nde beto kekuta ve bandongisila ya kuluta mbote sambu na dyambu yai na mukanda mosi ya mpa yina ndongisi mosi ya makwela mesonika, kansi na Biblia, mukanda mosi ya ntama yina bantu kesepelaka na yo tuka bamvu-nkama mingi.