Nani Lenda Zaba Mambu Yina Takwisa?
“Mono kele Nzambi. . . . Katuka luyantiku mono ke tubaka mambu yina fweti kubwa, mono ke zabisaka mpi ntama na ntwala mambu yina me bwa ntete ve.”—Yezaya 46:9, 10.
NA BANTANGU yai ya kesoba-sobaka, bantu ya kelongukaka politiki, mbongo, mpi luzingu ya bantu kelongukaka mambu ya melutaka mpi bikalulu ya bantu ya bubu sambu na kuzaba mambu yina takwisa. Bantu yankaka yina kele ti mpusa ya ngolo ya kuzaba mambu yina takumina bo na bilumbu kekwisa kekwendaka na bantu ya kelongukaka bambwetete to ya kesadilaka bampeve ya mbi sambu na kuzwa bamvutu. Mbala mingi, bantu yai kezwaka ve bamvutu ya mbote. Keti mpila kele ve ata fyoti ya kuzaba mambu yina takumina nsi-ntoto yai, mabuta na beto, mpi beto mosi? Keti kele ti muntu yina lenda mona mpenza na ntwala mambu yina takwisa?
Na bangogo ya kele awa na zulu, yina yandi tubilaka profete Yezaya, Nzambi Nkwa-Ngolo Yonso, Yehowa, kutubaka nde yandi kezabisaka na ntwala mambu yina takwisa. Na nzila ya Yezaya, Nzambi kuzabisaka na ntwala nde bantu ya Izraele takatuka na kimpika na Babilone mpi tavutuka sambu na kutunga dyaka Yeruzalemi mpi tempelo. Inki mambu ya sikisiki mbikudulu yai kutubaka? Kiteso ya bamvula 200 na ntwala, Yezaya kuzabisaka na sikisiki yonso nde Sirusi muntu tabedisa Babilone. Dyaka, Yezaya kutubilaka na sikisiki yonso mayele yina Sirusi tasadila, disongidila yandi tasoba nzila ya Nzadi Efrate, yina vandaka kutanina bwala ya Babilone. Yandi monaka nkutu na ntwala nde Sirusi takuta bakyelo ya nene ya kibaka ya bwala yango ya kukanguka, ebuna yo tasadisa yandi na kununga kukonda mpasi.—Yezaya 44:24–45:7.
Kana beto fwanisa muntu ti Nzambi, muntu kele na ngolo ve ya kuzaba mambu yina takwisa. Ntotila ya mayele Salomo kusonikaka nde: “Kusepela ntete ve sambu na mambu ya mbasi, nge zaba ntete ve nki ta bwila nge katuka bubu tii mbasi awa na kati.” (Bingana 27:1) Mambu yai kele kaka ya kyeleka. Ata muntu mosi ve lenda mona na ntwala mambu yina takumina luzingu na yandi. Inki kesalaka nde Nzambi kumona na ntwala mambu yina takwisa? Yandi kebakisaka mpenza bima yonso yina yandi salaka, mpi bikalulu ti mabanza ya muntu. Ntangu yandi keponaka na kusala mutindu yina, Nzambi lenda mona na ntwala na sikisiki yonso mutindu bantu mpi makanda ya mvimba tasala mambu. Dyaka, yandi kele ti mayele mingi ya kutwadisa mutindu mambu tasuka. Ntangu yandi ketubaka na ntwala na nzila ya baprofete na yandi nde kima mosi tasalama, yandi kekumaka muntu ya kelungisaka mambu yina ‘muntu na yandi ke tuba, mpi ntangu yandi ke basisaka ngindu na yandi, yandi ke lungisaka yo.’ (Yezaya 44:26) Kaka Yehowa Nzambi mpamba lenda tuba mambu yina na masonga yonso.
Yezaya kuzingaka bamvula kuluta 700 na ntwala ya Yezu, Mesia. Ata mpidina, Yezaya kubikulaka na yina metala kukwisa ya Mesia. Kansi, mingimingi banda na mvu-nkama ya 18 mata, bantu yina ketulaka ntembe na Biblia kendimaka ve bukyeleka ya mukanda ya Yezaya. Bo metubaka nde bambikudulu ya Yezaya kele ve mpenza bambikudulu kansi nde bo sonikaka yo na nima ya kusalama na yo, nsoniki mosi ya kuzingaka na nima kusonikaka mambu yina kusalamaka dezia. Keti mambu yina kele ya kyeleka? Na mvu 1947 bo sengumunaka kopi mosi ya mukanda ya Yezaya, kumosi ti barulo yankaka ya ntama, na dibulu mosi ya matadi penepene ya Nzadi Mungwa ya Kufwa. Bantu ya mayele kutubaka nde kopi yai kusalamaka bamvula kuluta nkama mosi na ntwala ya lubutuku ya Mesia, to Kristu, yina bo tubilaka na ntwala. Ee, Biblia kumonisaka mambu yina takwisa!
Yezaya mpi bansoniki yankaka ya Biblia lendaka ve kutuba na ntwala mambu yina takwisa, kaka na mayele na bo mosi. Kansi, bo “vandaka kutuba na zina ya Nzambi sambu mpeve-santu vandaka kusonga bo mambu yonso ya bo vandaka kutuba.” (2 Piere 1:21) Na masolo yina kelanda, beto tatula dikebi na mwa mambu ya luzingu ya Yezu, yina Yezaya kutubaka na ntwala. Na nima, beto tatadila mambu yina Yezu ti balongoki na yandi kutubaka na ntwala sambu na bilumbu na beto mpi yina kekwisa.