Inki Mambu Bana Fwete Longuka?

‘Bo sonikaka Mukanda ya Nzambi yonso na ngolo na yandi; mpi yo kele mfunu sambu na kulonga, sambu na kusungika bifu, sambu na kubongisa bantu, mpi sambu na kulonga bantu na kuzinga luzingu mosi ya kinzambi.’​—2 TIMOTEO 3:16.

BANA fwete longuka kyeleka ya metala Nzambi. Na wapi bo lenda longuka kyeleka yina? Na Biblia, mukanda yina mabundu mingi na nsi-ntoto kezitisaka.

Biblia kele bonso mukanda yina mekatuka na Nzambi. Na mukanda yango, Nzambi kemonisaka kimuntu na yandi mpi kepesaka lutwadisu ya mbote sambu na bana na yandi, baleke mpi bambuta. Tala mwa mambu yina kele na Biblia mpi malongi yina ata baleke lenda baka.

Inki mambu Nzambi kezolaka nde beto zaba na yina metala yandi?

◼ Mambu yina Biblia kelongaka: “Nge, ya kele na zina Yehowa, nge mpamba kele Muntu ya Kuluta Kuzanguka na zulu ya ntoto ya mvimba.”​—Nkunga 83:18, NW.

Dilongi: Nzambi kele muntu ya kyeleka mpi yandi kele ti zina.

◼ Mambu yina Biblia kelongaka: “Mfumu Nzambi ke talaka ntima ya bantu, yandi ke zabaka mpi bangindu ya bantu. Kana nge sosa yandi, yandi ta ndima nge.”​—1 Bansangu 28:9.

Dilongi: Yehowa kekudibanzaka sambu na beto, tanga mpi bana-fyoti. (Nkunga 10:14; 146:9) Yandi kezolaka nde beto longuka mambu na yandi.

◼ Mambu yina Biblia kelongaka: ‘Beno monisa mwana-nsyona mpasi ve. Kana beno monisa yandi mpasi, ntangu yandi ta didila mono sambu mono sadisa yandi, mono tasadisa yandi.’​—Kubasika 22:21-24.

Dilongi: Yehowa kewidikilaka bisambu ata ya bana-fyoti. Beto lenda solula ti Nzambi mbala na mbala mpi kuzabisa yandi mabanza mpi mawi na beto.

◼ Mambu yina Biblia kelongaka: ‘Mbala na mbala bo vandaka kumeka Nzambi, mbala mingi bo vandaka kupesa Musantu ya Israele makasi.’​—Nkunga 78:41.

Dilongi: Bangogo mpi bisalu na beto kepesaka Yehowa mawa to kyese, yo yina beto fwete yindula na ntwala ya kutuba to kusala mambu.

Inki mutindu beto fwete sadila bantu yankaka mambu?

◼ Mambu yina Biblia kelongaka: “Nzambi ke zolaka bantu yonso mutindu mosi. Na konso dikanda ya bantu yandi ke ndimaka bantu yina ke zitisaka yandi ti ke salaka mambu ya mbote.”​—Bisalu 10:34, 35.

Dilongi: Kana Nzambi kendimaka bantu ya binkulu yonso, beto fwete buya ve bantu yankaka sambu mpusu na bo ya nitu to ilungi na bo meswaswana ti ya beto.

◼ Mambu yina Biblia kelongaka: “Konso ntangu beno fweti vanda ya kuyilama na kupesa mvutu na bantu yina ke yulaka beno sambu na kuzaba nki mutindu beno ke tulaka ntima na Nzambi. Kansi beno sala yo na malembe ti na luzitu.”​—1 Piere 3:15, 16.

Dilongi: Ntangu beto kezabisaka bankaka mambu ya Nzambi, beto fwete monisa na mawete yonso nde, beto kendimaka mambu yango. Beto fwete zitisa mpi bantu yina balukwikilu na bo meswaswana ti ya beto.

Inki mutindu beto fwete sadila bantu ya dibuta na beto mambu?

◼ Mambu yina Biblia kelongaka: “Bana, beno fweti wila batata ti bamama na beno na mambu yonso, sambu yina kele mambu ya Mfumu [Yehowa] ke monaka kiese.”​—Kolosai 3:20.

Dilongi: Bana ya bulemfu kemonisaka kaka ve nde bo kezolaka bibuti na bo kansi mpi nde bo kezolaka kusepedisa Nzambi.

◼ Mambu yina Biblia kelongaka: ‘Kana muntu ke na mambu na muntu yankaka, mbote yandi lolula yandi mutindu Nzambi melolulaka beno.’​—Kolosai 3:13.

Dilongi: Bantangu yankaka, bantu yankaka, ata mpi bantu ya dibuta na beto tapesa beto mpasi. Kansi, kana beto kezola nde Nzambi kulolula beto, beto fwete lolula bankaka.​—Matayo 6:14, 15.

Sambu na inki beto fwete vanda bantu ya masonga mpi ya mbote?

◼ Mambu yina Biblia kelongaka: “Beno bika luvunu! Konso muntu kutubila mpangi na yandi mambu ya kieleka.”​—Efezo 4:25.

Dilongi: Ntangu beto ketubaka kyeleka, beto kelandaka mbandu ya Nzambi mpi kesepedisaka yandi. Kana beto kele ti kikalulu ya kuta luvunu, beto tafwanana ti mbeni ya Nzambi, Satana yina kele “tata ya luvunu.”​—Yoane 8:44; Tito 1:2.

◼ Mambu yina Biblia kelongaka: “Beno sadila bantu yankaka mambu mutindu beno kezola nde bo sadila beno.”​—Matayo 7:12, “Contemporary English Version.”

Dilongi: Beto fwete zaba mawi mpi bampusa ya bantu ya dibuta na beto yika mpi ya bantu yankaka yina kezingaka na nzyunga na beto. Kana beto kemonisa ‘zola,’ ntembe kele ve nde bankaka mpi tasadila beto mambu na mutindu ya mbote.​—1 Piere 3:8; Luka 6:38.

Mutindu bambandu yai kemonisa yo, malongi ya Biblia lenda sadisa bana na kukuma bambuta yina kemonisaka ntonda, luzitu, mpi kekuditulaka na kisika ya bankaka. Kansi, nani fwete longa bana malongi yai?