Keti Beto Fwete Sambila Basantu?

NANI me kutanaka ntete ve ti diambu mosi ya mpasi mpi vandaka na mfunu ya lusadisu ya muntu ya nkaka? Ata beto ke niokwama sambu na konso diambu yina, ntembe kele ve nde beto ta pona nduku yina ke kuditulaka na kisika ya bankaka mpi ya me kutanaka dezia ti mpasi yina beto ke kutana ti yo. Nkadilu ya kuditula na kisika ya bankaka mpi mambu yina muntu me kutanaka na yo ke salaka nde yandi vanda nduku ya mbote mpenza.

Bantu ya nkaka lenda wa mutindu mosi na yina me tala kisambu. Sambu bo ke monaka nde Nzambi me luta nene mpi bo ke waka yandi boma, na kisika ya kusambila yandi, bo ke monaka mbote na kusambila basantu. Bo ke yindulaka nde sambu basantu yina me kutanaka dezia ti mimekamu mpi bampasi yina bantu yonso ke kutanaka ti yo, bo ta kuditula na kisika na bo. Mu mbandu, bantu yina me vidisa kima mosi ya mbalu mingi ke monaka mbote na kusambila “Santu” Antoine de Padoue, yina ke tadilaka bima yina me vila to ya bo me yiba. Kana bo ke samba sambu na mbisi yina ke bela, bo ke sambilaka “Santu” François d’Assise to kana bo kele diaka ve ti kivuvu na diambu mosi, bo ke sambilaka “Santu” Jude Thaddée.

Kansi, inki mutindu beto lenda zaba kana na kutadila Masonuku yo me fwana na kusambila basantu to ve? Sambu bisambu na beto ke vandaka mambu yina beto ke zabisaka Nzambi, ntembe kele ve nde beto fwete zaba diambu yai: Keti yandi ke waka bisambu na beto? Diaka, beto fwete kudiyula nde: Inki mutindu Nzambi ke tadilaka diambu ya me tala kusambila basantu?

DIBANZA YA BIBLIA NA YINA ME TALA KUSAMBILA BASANTU

Kikalulu ya kusambila basantu me katukaka na malongi ya Dibundu ya Katolika yina ke longaka nde basantu ke sambaka sambu na bantu. Mukanda mosi (New Catholic Encyclopedia) ke tuba nde diambu yina me simba dilongi yina kele: “Kubondila santu mosi yina, na meso ya Nzambi, kele ti nswa ya kusala mpidina sambu na kulomba Nzambi na kumonisa mawa na muntu yina kele na mfunu ya lusadisu.” Yo yina, bantu yina ke sambilaka basantu ke tulaka kivuvu nde Nzambi lenda ndima bo na mutindu ya sipesiali na nzila ya basantu yina sambu bo kele na kiyeka ya lukumu na meso ya Nzambi.

Keti Biblia ke longaka dilongi yina? Bantu ya nkaka ke tubaka nde ntumwa Polo yantikisaka diambu ya me tala kusambila basantu na mikanda yina yandi sonikaka. Mu mbandu, yandi sonikilaka Bakristu ya Roma nde: “Ntangu yai bampangi, mono ke siamisa beno na nzila ya Mfumu na beto Yezu Kristu mpi na nzila ya zola yina mpeve ke pesaka, nde beno sala ngolo ti mono na bisambu yina beno ke sala na Nzambi sambu na mono.” (Baroma 15:30) Keti Polo vandaka kulomba bampangi na yandi Bakristu na kubondila Nzambi sambu na yandi? Ata fioti ve. Nkutu, bo bantu zolaka kulomba Polo, ntumwa ya Kristu na kusamba Nzambi sambu na bo. Polo zolaka kumonisa nde yo kele mbi ve na kulomba mpangi-Mukristu mosi na kusamba Nzambi sambu yandi sadisa beto. Kansi, diambu yai me swaswana mpenza ti kusamba muntu mosi yina beto ke kwikila nde yandi kele na zulu, sambu na kuzabisa Nzambi bisambu na beto. Sambu na nki?

Na Evanzile ya ntumwa Yoane, Yezu tubaka nde: “Mono kele nzila mpi kieleka mpi luzingu. Ata muntu mosi ve ke kwisaka na Tata kana yandi kwisa ve na nzila na mono.” (Yoane 14:6) Yandi tubaka diaka nde: “Konso kima yina beno ke lomba Tata na zina na mono, yandi ta pesa beno yo.” (Yoane 15:16) Yezu tubaka ve nde beto fwete sambaka yandi mpi na nima, yandi ta tuba na Nzambi sambu na beto. Kansi, sambu Nzambi kuwa bisambu na beto, beto fwete samba na nzila ya Yezu kansi na nzila ya muntu ya nkaka ve.

Ntangu balongoki ya Yezu lombaka yandi na kulonga bo mutindu ya kusamba, Yezu tubaka nde: “Konso ntangu ya beno ke samba, beno tuba nde: ‘Tata, bika nde zina na nge kusantisama.’” (Luka 11:2) Ee, “konso ntangu,” to ngunga yonso, beto fwete samba kaka Nzambi kansi Yezu ve to muntu ya nkaka. Na kutadila malongi yai ya Yezu ya pwelele, keti yo me fwana ve nde beto samba Nzambi na nzila ya Yezu-Kristu kansi ve na nzila ya bantu ya nkaka to “basantu”?

Kisambu kele diambu ya kuluta mfunu na lusambu na beto, mpi kusamba muntu ya nkaka na kisika ya Nzambi ke wakana ve ata fioti ti malongi ya Biblia. (Yoane 4:23, 24; Kusonga 19:9, 10) Yo yina beto fwete samba kaka Nzambi.

KETI NGE FWETE WA BOMA NA KUKWENDA PENE-PENE NA NZAMBI?

Na Disolo na yandi ya me zabanaka mingi na Zulu ya Ngumba, Yezu pesaka mbandu ya mwana yina lombaka tata na yandi kima ya kudia. Keti tata ta pesa mwana na yandi ditadi na kisika ya dimpa? To nioka ya ndikila na kisika ya mbisi ya masa? (Matayo 7:9, 10) Kibuti ya zola lenda sala ve ata fioti diambu ya mutindu yina!

Sala bonso nde nge kele kibuti yina bo me tubila na mbandu yai. Yindula nde mwana na nge kele ti diambu mosi ya mfunu ya kuzabisa nge. Nge ke vandaka ti bangwisana ya mbote ti yandi, mpi konso ntangu yandi ke solulaka ti nge kukonda mpasi. Ata mpidina, sambu yandi ke wa boma na mutindu yina nge ta tadila diambu yina yandi ke zola kulomba, yandi me zabisa muntu ya nkaka na kulombila yandi diambu yina. Nge ta wa nki mutindu? Ebuna kana yandi me kuma ti kikalulu ya kusolula ti nge kaka na nzila ya muntu yina mpi yo ke monana nde yandi ta landa kusala buna? Keti nge ta sepela na ngidika yina? Ata fioti ve! Bibuti ya zola ke zolaka nde bana na bo kusolula ti bo mbala mosi mpi kuwa boma ve na kulomba bo kima yina bo kele na yo mfunu.

Na nima ya kupesa mbandu ya mwana yina lombaka madia, Yezu tubaka na kibuka ya bantu nde: “Yo yina, kana beno, ata beno kele bantu ya mbi, beno me zaba kupesa makabu ya mbote na bana na beno, beno fwete zaba kibeni nde Tata na beno yina kele na zulu ta pesa bima ya mbote na bantu yina ke lombaka yandi yo!” (Matayo 7:11) Ntembe kele ve nde, kibuti yonso ke vandaka ti mpusa ya ngolo ya kupesa mwana na yandi bima ya mbote. Tata na beto ya zulu ke vandaka ti mpusa ya kuwa mpi ya kupesa mvutu na bisambu na beto.

Nzambi ke zolaka nde beto mosi kusamba yandi ata kana beto me sala bifu ya nki mutindu. Yandi me pesaka ve bantu ya nkaka mukumba ya kuwa bisambu na beto. Biblia ke siamisa beto nde: ‘Bikila Yehowa kilo na nge, yandi ta sadisa nge.’ (Nkunga 55:23) Na kisika ya kuvingila nde basantu to bantu ya nkaka kutuba na Nzambi sambu na beto, yo ta vanda mbote nde beto vanda ti mabanza ya mbote sambu na Yehowa Nzambi.

Tata na beto ya zulu ke kudibanzaka sambu na konso muntu na kati na beto. Yandi ke zolaka kusadisa beto na bampasi na beto mpi ke lombaka beto na kukwenda pene-pene na yandi. (Yakobo 4:8) Beto kele na kiese kibeni ya kuvanda ti dibaku ya kukwenda pene-pene ya Nzambi mpi Tata na beto, Muntu yina “ke ndimaka bisambu”!​—Nkunga 65:3.