“Bikalulu na Yandi ya Ke Monanaka Ve Ke Monanaka Pwelele”

Keti nge ke kwikilaka na Nzambi? Kana yo kele mpidina, inki mambu ke ndimisa nge nde yandi kele? Kieleka kele nde, kele ti mambu na nziunga na beto ya ke ndimisa nde Nzambi kele zola, yandi kele ti mayele, mpi ti ngolo. Inki kele banzikisa yango, mpi inki mutindu yo ke ndimisa beto? Sambu na kuzwa mvutu, beto tadila bangogo yina ntumwa Polo sonikilaka Bakristu ya Roma.

Polo tubaka nde: “Bikalulu na yandi [ya Nzambi] ya ke monanaka ve ke monanaka pwelele banda na lugangu ya nsi-ntoto, sambu yo ke monanaka na bima yina yandi salaka, disongidila ngolo na yandi ya kukonda nsuka mpi Kinzambi na yandi, na mpila nde bo kele ve ti kima ya kutuba.” (Baroma 1:20) Mutindu Polo monisaka yo, bima yina Ngangi me salaka ke monisaka nde yandi kele. Beto tadila mbote-mbote bangogo ya Polo.

Polo ke monisa nde, bikalulu ya Nzambi lenda monana “banda na lugangu ya nsi-ntoto.” Na verse yai, ngogo ya Kigreki yina bo ke balulaka na “nsi-ntoto” ke tadila ve Ntoto yai ya beto ke zinga. Kansi, yo ke tadila bantu.a Yo yina, Polo monisaka nde banda ntangu Nzambi me gangaka bantu, bo lenda mona banzikisa ya bikalulu na yandi na bima yina yandi salaka.

Banzikisa yango kele na nziunga na beto. Yo ke “monanaka pwelele” na lugangu. Bigangwa yonso ya yandi me salaka yo vanda ya kuluta nene to ya kuluta fioti, ke monisaka pwelele nde Ngangi kele mpi nde yandi kele ti bikalulu ya kitoko. Keti bima ya mayele yina yandi me gangaka ya ke monanaka pwelele na lugangu, ke monisaka beto ve nde yandi kele mayele? Keti zulu ya me fuluka ti bambwetete mpi banzadi ya nene ke monisaka ve nde yandi kele na ngolo? Keti madia ya mutindu na mutindu ya ke sepedisaka beto mpi kitoko ya kubasika ti ya kudinda ya ntangu ke monisaka ve nde yandi ke zolaka bantu?​—Nkunga 104:24; Yezaya 40:26.

Na nki mutindu banzikisa yai kele pwelele? Yo kele pwelele kibeni na mpila nde, bantu yina ke monaka yo ve mpi ke buyaka kukwikila na Nzambi “kele ve ti kima ya kutuba.” Muntu mosi ya mayele pesaka mbandu yai: Yindula nde shofere mosi me tula ve dikebi na bidimbu ya nzila ya ke tuba nde “Vutuka​—Baluka na Diboko ya Kimama.” Polisi mosi me tedimisa yandi mpi me zengila yandi amande. Shofere ke sosa kupesa bikuma nde yandi monaka ve bidimbu yina. Kansi polisi me buya kulolula yandi sambu bidimbu yina ke monana pwelele, mpi meso ya shofere ke monaka mbote kibeni. Katula yo, sambu yandi kele shofere yandi kele ti mukumba ya kumona bidimbu yina mpi kuzitisa yo. Yo kele mutindu mosi sambu banzikisa ya kele na lugangu na yina me tala Nzambi. “Bidimbu” na yo ke monana pwelele. Sambu beto kele bigangwa ya mayele, beto kele ti makuki ya kumona yo. Kele ve ti kima ya kutuba sambu na muntu yina ke tudila yo ve dikebi.

Ya kieleka, mukanda ya lugangu ke monisa mambu mingi ya me tala Ngangi na beto. Kansi, kele ti mukanda ya nkaka ya ke monisa mambu mingi sambu na yandi​—Biblia. Na nzila na yo, beto lenda zwa mvutu na ngiufula yai ya mfunu: Inki kele lukanu ya Nzambi sambu na ntoto mpi bantu? Kuzaba mvutu na ngiufula yai lenda sadisa nge na kukwenda pene-pene na Nzambi yina “bikalulu na yandi ya ke monanaka ve ke monanaka pwelele” na bima yina kele na nziunga na beto.