Sambu na nki Nzambi ke pesaka bantu ya ngolo nzila na kuniokula bayina me konda ngolo?

Biblia kele ti bambandu yina ke monisa mutindu bantu ya ngolo niokulaka bantu ya me konda ngolo. Beto baka mbandu ya Naboti.a Akabi, ntotila ya Izraele na mvu-nkama ya kumi N.T.B., pesaka Yezabele nkento na yandi nswa ya kufwa Naboti ti bana na yandi sambu ntotila kubaka kilanga na yandi ya vinu. (1 Bantotila 21:1-16; 2 Bantotila 9:26) Sambu na nki Nzambi pesaka muntu ya mutindu yai nzila ya kusadila kiyeka na yandi na mutindu ya mbi?

Bika beto tula dikebi na kikuma mosi ya mfunu: Nzambi lenda kusa ve. (Tito 1:2) Inki kuwakana kele na kati ya mambu ya nku ti kikalulu yai ya Nzambi? Na luyantiku kibeni, Nzambi kebisaka bantu nde kana bo kolama na yandi, yo ta nata malanda ya mbi disongidila lufwa. Mutindu Nzambi tubaka, bantu me kumaka kufwa banda bo kolamaka na kilanga ya Edeni. Ya kieleka, lufwa ya muntu ya ntete salamaka sambu muntu ya ngolo niokulaka muntu ya kukonda ngolo disongidila Kaini fwaka mpangi na yandi Abele.—Kuyantika 2:16, 17; 4:8.

Na kutadila disolo ya luzingu ya bantu, Ndinga ya Nzambi ke tuba na bunkufi sambu na diambu yai nde: “Kisika bantu ya nkaka kele bamfumu ebuna bankaka ke mona mpasi na maboko na bo.” (Longi 8:9) Keti bangogo yai lunganaka? Yehowa kebisaka bantu na yandi, dikanda ya Izraele nde bamfumu na bo ta niokula bo mpi yo ta pusa bo na kudidila yandi. (1 Samuele 8:11-18) Nkutu, Salomo Ntotila ya mayele niokulaka bantu na yandi ngolo. (1 Bantotila 11:43; 12:3, 4) Bonso bantotila ya nkaka ya mbi, Akabi vandaka kuniokula bantu mingi. Beto tadila diambu yai: Kana Nzambi buyisaka nde mambu ya nku ya mutindu yai kusalama ve, keti mambu yina yandi tubaka zolaka ve kumonana ya luvunu?

Kuvila ve nde Satana tubaka mpi nde bantu ke sadilaka Nzambi kaka sambu na bikuma ya bwimi. (Yobi 1:9, 10; 2:4) Kana Nzambi taninaka bansadi na yandi yonso na baluyalu yai mbi, keti yo zolaka kumonisa ve nde mambu yina Satana tubaka vandaka ya kieleka? Mpi kana Nzambi buyaka nde mambu ya nku kukumina ve bantu yonso, keti yandi zolaka ve kuvanda na kisina ya luvunu mosi ya kuluta nene? Kana Nzambi tanina bantu, bantu mingi lendaka kuyindula nde bo me fwana na kuditwadisa kukonda Nzambi. Kansi mambu yina Ndinga ya Nzambi ke tubaka me swaswana—muntu me fwana ve ata fioti na kuditwadisa. (Yeremia 10:23) Beto ke zolaka nde Kimfumu ya Nzambi kukwisa sambu na kusukisa mambu ya kukonda lunungu.

Keti yo ke tendula nde Nzambi ta sala ve ata kima mosi sambu na mambu ya nku? Beto tadila mambu zole ya yandi salaka: Ntete, yandi ke monisaka mambu yonso ya nku mutindu yo kele. Mu mbandu, Ndinga na yandi ke monisa pwelele komplo yina Yezabele salaka sambu na Naboti. Diaka, Biblia ke monisa nde mfumu mosi ya ngolo ke siamisaka mambu yai ya mbi mpi ke zolaka kubumba kimuntu na yandi. (Yoane 14:30; 2 Bakorinto 11:14) Biblia ke binga yandi Satana Diabulu. Sambu Nzambi ke monisaka pwelele kisina yina mambu ya mbi mpi ya nku ke katukaka, yandi ke sadisaka beto na kutina mambi. Yo yina, yandi ke yidikaka bilumbu ya ke kwisa sambu beto zinga kimakulu.

Ya zole, Nzambi ke pesa beto kivuvu ya kieleka sambu na kusukisa mambu ya nku. Mutindu Nzambi monisaka, sambisaka mpi pesaka Akabi ti Yezabele mpi bantu mingi ya nkaka ndola—ke ndimisa beto nde kilumbu mosi yandi ta pesa bantu yonso ya mbi ndola mutindu yandi silaka. (Nkunga 52:3-7) Nzambi ke sila beto mpi nde ntama mingi ve, yandi ta katula mambu ya mbi sambu na bantu yina yandi ke zolaka.b Yo yina, Naboti muntu ya kwikama ti bana na yandi ta zinga kimakulu na paladisu awa na ntoto ntangu mambu ya kukonda lunungu ta vanda diaka ve.—Nkunga 37:34.