BAMVUTU NA BANGIUFULA YA BIBLIA

Keti mambu yonso me suka kaka na luzingu yai?

Keti nge me kudiyulaka dezia kana luzingu kele ti mambu ya nkaka katula kaka kusala bansaka, kusala kisalu, kukwela, kusansa dibuta, mpi kununa? (Yobi 14:1, 2) Biblia ke monisa nde ata bantu ya mayele mingi ke kudiyangisaka sambu na mambu ya mutindu yai.​—Tanga Longi 2:11.

Keti luzingu ke vandaka mfunu? Ntete, beto fwete kudiyula nde: Luzingu yantikaka nki mutindu? Na nima ya kulonguka mutindu Nzambi salaka butomfu mpi nitu na beto, bantu mingi me monaka nde Ngangi mosi ya mayele salaka yo. (Tanga Nkunga 139:14.) Kana yo kele mutindu yai, yo fwete vanda nde Nzambi salaka beto ti kikuma! Kuzaba kikuma yai lenda sadisa beto na kumona nde luzingu na beto kele mfunu mingi.

Sambu na nki Nzambi gangaka bantu?

Nzambi sakumunaka bankwelani ya ntete mpi pesaka bo mukumba mosi ya kitoko. Lukanu na yandi vandaka nde bo fulusa ntoto, bo kumisa yo paladisu mpi bo zinga kimakulu.​—Tanga Kuyantika 1:28, 31.

Lukanu ya Nzambi lunganaka ve ntangu bantu buyaka luyalu na yandi. Kansi, Nzambi me yambulaka beto ve mpi yandi me sobaka ve lukanu na yandi sambu na bantu mpi sambu na ntoto. Biblia ke ndimisa beto nde Nzambi ke sala mambu sambu na kugulusa bantu ya kwikama mpi nde lukanu na yandi sambu na ntoto ta lungana! Yo yina, Nzambi ke zolaka nde beto zinga na mutindu yina yandi kanaka! (Tanga Nkunga 37:29.) Na nsadisa ya Biblia, longuka mutindu nge lenda baka mambote ya mambu yina Nzambi ke kana na kusala.