Bawanzio—Keti Bo Lenda Vanda ti Bupusi na Luzingu na Nge?

Lumingu mosi na nima ya midi, Kenneth ti Filomena yina ke zingaka na kisanga ya Curaçao, kwendaka kutala bakala mosi ti nkento na yandi yina bo vandaka kulonga Biblia.

Kenneth ke tuba nde: “Ntangu beto kumaka, nzo vandaka ya kukanga mpi kamio vandaka ve. Kansi kima mosi pusaka mono na kubinga nkento yina na telefone.”

Yandi yambaka mpi tubaka nde bakala na yandi me kwenda na kisalu. Kansi, ntangu yandi bakisaka nde beto vandaka na nganda, yandi kwisaka na kielo mpi songaka beto na kukota na nzo.

Na mbala mosi, bo bakisaka nde nkento yina vandaka kudila. Ntangu Kenneth yantikaka kusamba na ntwala ya kulonguka, yandi yantikaka kudila diaka. Na mawete yonso, Kenneth ti Filomena yulaka yandi mambu yina vandaka kupesa yandi mpasi.

Nkento yina tubaka nde yandi zolaka kudifwa na nima ya midi yina, mpi nde ntangu Kenneth bingaka na telefone yandi vandaka kusonikila bakala na yandi mukanda ya ke tendula sambu na nki yandi ke zola kudifwa. Yandi songaka bo nde yandi vandaka kuniokwama na mabanza, yo yina bo tangisaka yandi mwa baverse ya Biblia ya ke pesa kikesa. Lusadisu yina gulusaka luzingu na yandi.

Kenneth ke tuba nde: “Beto pesaka Yehowa mersi na mutindu yandi pesaka beto nzila ya kusadisa nkento yina vandaka kudiyangisa mingi, mpi mingi-mingi sambu yandi pusaka beto, ziku na nzila ya wanzio to ya mpeve santu, na kubinga nkento yina na telefone!”a

Keti Kenneth ti Filomena vandaka ti kikuma ya kundima nde Nzambi muntu sadisaka bo, yo vanda na nzila ya wanzio to ya mpeve santu? To keti mutindu Kenneth bingaka na ntangu ya mbote vandaka kaka diambu mosi ya kintulumukina?

Beto me zaba kibeni ve. Kansi, mambu ya beto ke zaba kele nde Nzambi ke sadilaka bawanzio na yandi sambu na kusadisa bantu na kimpeve. Mu mbandu, Biblia ke tuba nde Nzambi sadilaka wanzio mosi sambu na kutwadisa nsamuni Filipo sambu yandi sadisa mfumu mosi ya nsi Etiopia yina vandaka kusosa lutwadisu ya kimpeve.—Bisalu 8:26-31.

Mabundu mingi ke longaka bantu na kukwikila na bigangwa ya kimpeve; bo ke tubaka nde bigangwa ya nkaka kele bigangwa ya mbote yina ke lungisaka luzolo ya Nzambi to ke taninaka bantu. Bantu mingi ke kwikilaka kaka ve nde bawanzio kele kansi nde bo ke vandaka mpi ti bupusi ya ngolo na luzingu na bo. Kansi, bantu mingi ya nkaka ke kwikilaka ve ata fioti nde bawanzio kele.

Keti bawanzio kele kibeni? Kana mpidina, bo me katukaka na wapi? Inki kele kieleka na yina me tala bawanzio? Keti bo lenda vanda ti bupusi na luzingu na nge? Bika beto tadila bikuma ya ke ndimisa mambu yai.