Bamvutu na Bangyufula na Beno

◼ Inki mutindu beto fwete lwata kana beto kekwenda na Banzo ya Kimfumu, Banzo ya Balukutakanu ya Nene ti ya Distrike, Babetele, mpi Babiro ya Filiale yina kele bisika ya beto kesadilaka Yehowa?

Na nsi-ntoto ya mvimba, Banzo ya Kimfumu, Banzo ya Balukutakanu ya Nene ti ya Distrike, Babetele, mpi Babiro ya Filiale kele bisika yina beto kesadilaka Yehowa. Bisika yango kevandaka ya kukonda mindondo, ya bunkente, ya kuyidika mbote, mpi ya kemonisaka luzitu. Luswaswanu kele ya nene mpenza ti yina beto kemonaka mbala mingi na ngidika ya bima ya Satana. Ntangu beto kekwendaka na bisika yina beto kesadilaka Yehowa, bantu fwete bakisa mpi nde beto kele bansadi ya Yehowa yina kesalaka luzolo na yandi.

Sambu beto kele Bakristu, beto “ke songaka na mambu yonso nde beto ke sadilaka Nzambi,” ti na mambu yina metala mutindu na beto ya kulwata mpi ya kuyidika nitu. (2 Kor. 6:​3, 4) Beto fwete vanda mpi ti bikalulu ya mbote. Ntangu yonso, mutindu na beto ya kulwata mpi ya kudiyidika fwete monisa lukumu mpi luzitu yina mefwana na bansadi ya Yehowa Nzambi. Yo fwete vanda mpidina mingimingi na ntangu beto kekwenda kutala banzo ya nto-kimvuka na New York mpi bafiliale ya ntoto ya mvimba.

Sambu na kutubila mfunu ya kulwata mpi kudiyidika mbote, mukanda Beto Mevukana Sambu na Kusala Luzolo ya Yehowa ketubila mfunu ya kuvanda bunkete na nitu, kuvanda ti bilele ya mbote, mpi kudiyidika mbote na ntangu beto kekwenda na kisalu ya bilanga mpi na balukutakanu ya Bukristu. Ebuna, na lutiti 138, paragrafe ya 3, yo ketuba nde: “Kuvila ve nde zina Betele ketendula ‘Nzo ya Nzambi.’ Yo yina, mutindu na beto ya kulwata ti ya kudiyidika, mpi bikalulu na beto fwete vanda mutindu mosi ti yina ya beto kevandaka na yo ntangu beto kekwendaka na balukutakanu sambu na lusambu na Nzo ya Kimfumu.” Bansamuni ya Kimfumu yina kekwenda na Betele fwete zitisa munsiku yai ya kuzanguka, yo vanda bayina kezingaka penepene ya Betele to bayina kekatukaka ntama. Kana muntu yina kekwenda kutala Betele kusala mutindu yina, yandi tamonisa ntonda mpi luzitu yina mefwana.​—⁠Nk. 29:⁠2.

Bilele na beto fwete monisa nde beto “ke zitisaka Nzambi.” (1 Tim. 2:10) Kulwata mpi kudiyidika mbote kevandaka na bupusi ya mbote na mutindu bantu yankaka ketadilaka lusambu ya kyeleka ya Yehowa. Kansi, beto kemonaka nde na ntangu bampangi yankaka kekwendaka kutala bisika yina beto kesadilaka Yehowa, bo kelwataka bilele ya kukonda mfunu to ya kemonisaka nitu, mpi ya kisakasaka. Bilele ya mutindu yina mefwana ve ata fyoti na Bakristu. Na dyambu yai, mpi na mambu yonso yankaka ya luzingu na beto ya Bukristu, beto kezola kulanda na kuzitisa minsiku ya kuzanguka yina keswaswanisaka bansadi ya Nzambi ti bantu ya nsi-ntoto, mpi kusala mambu yonso sambu na lukumu ya Nzambi.​—⁠Roma 12:2; 1 Kor. 10:⁠31.

Yo yina, na ntangu beto kekwenda kutala banzo ya nto-kimvuka na New York to babiro yankaka ya filiale, yo vanda beto kekana kukwenda to na ntangu beto kele na konzie na kisika mosi buna, beto kudiyula nde: ‘Keti mutindu na munu ya kulwata mpi ya kudiyidika kemonisa nde kisika ya mu kekwenda kele ya kukonda mindondo, ya bunkente, mpi ya kemonisa luzitu? Keti yo kepesa lukumu na Nzambi yina mu kesambilaka? Keti yo tayangisa to tapesa bantu yankaka nsoni?’ Na mutindu na beto ya kulwata mpi ya kudiyidika, bika beto monisa ntangu yonso nde mambu yonso ya beto ke salaka, ‘kezitisaka malongi yina ke tadila Ngulusi na beto Nzambi.’​—⁠Tito 2:⁠10.