‘Landa Mbandu na Yandi’
1. Inki mutindu beto lenda kuma bansamuni ya kebutaka mbuma?
1 Yezu kulongukaka ve na banzo-nkanda ya barabi, kansi yandi vandaka Nsamuni ya kuluta nene na disolo ya luzingu ya bantu. Dyambu ya kepesa kyese kele nde bo mesonikaka disolo ya kisalu ya Yezu sambu na mambote na beto. Sambu beto vanda bansamuni ya kebuta mbuma, beto fwete landa mbotembote ‘mbandu na yandi.’—1 Pie. 2:21.
2. Bonso Kristu, nki tasadisa beto na kuyedisa zola sambu na bantu?
2 Monisa Zola Sambu na Bantu: Dikebi ya zola yina Yezu vandaka kutudila bantu kupusaka yandi na kusala mambu sambu na bo. (Mar. 6:30-34) Bantu mingi ya teritware na beto kekutana ti ‘bampasi,’ mpi bo kele na mfunu ya ngolo ya kyeleka. (Roma 8:22) Kuyindulula bampasi na bo ya ngolo mpi dikebi ya zola yina Yehowa kemonisilaka bo, tapusa beto na kukwamina na kusamuna. (2 Pie. 3:9) Dyaka, bantu tandima nsangu na beto kukonda mpasi kana bo kebakisa nde beto ketudila bo dikebi ya kyeleka.
3. Inki mabaku Yezu kusadilaka sambu na kusamuna na bankaka?
3 Tuba na Mabaku Yonso: Yezu kusadilaka mabaku yonso sambu na kuzabisa bankaka nsangu ya mbote. (Mat. 4:23; 9:9; Yoa. 4:7-10) Mutindu mosi, beto fwete kudibongisa na kuzabisa mambu ya metala kyeleka na ntangu beto kesala mambu na beto ya konso kilumbu. Bampangi yankaka kesimbaka na maboko Biblia ti mikanda yina ketendulaka yo na mpila nde bo lenda ta kimbangi na kisalu, na nzo-nkanda, ntangu bo kekwenda kusumba bima to ntangu bo kesala nzyetolo, mpi buna na buna.
4. Inki mutindu beto lenda sala nde Kimfumu kuvanda ntu-dyambu ya kisalu na beto ya kusamuna?
4 Tula Dikebi na Kimfumu: Nsangu ya mbote ya Kimfumu kuvandaka ntu-dyambu ya kisalu ya kusamuna ya Yezu. (Luka 4:43) Ata bangogo na beto ya kukotila na masolo lenda tubila ve mbala mosi Kimfumu, beto fwete vila ve na kusadisa muwi na kumona mfunu ya Kimfumu. Ata ntangu beto ketubilaka mambu ya mbi ya keluta na nsi-ntoto yina kemonisa nde beto kezinga na bilumbu ya nsuka, beto kezabisaka ntetentete “nsangu ya mbote.”—Roma 10:15.
5. Sambu kisalu na beto kubuta mbuma, inki fwete vanda mukumba ya Biblia?
5 Tula Ntima na Ndinga ya Nzambi: Na kisalu na yandi ya mvimba, Yezu kusadilaka ntangu yonso Masonuku sambu yo simba malongi na yandi. Yandi longaka ve mambu na luzolo na yandi mosi. (Yoa. 7:16, 18) Yandi vandaka kutanga Ndinga ya Nzambi mpi kusadilaka yo ntangu Satana kumekaka yandi. (Mat. 4:1-4) Sambu kisalu na beto ya kulonga kubuta mbuma, beto fwete tangaka Biblia konso kilumbu mpi kusadila mambu ya beto kelonguka. (Roma 2:21) Ntangu beto kepesa mvutu na bangyufula ya bo keyula beto na kisalu ya kusamuna, beto fwete vutukila baverse ya Biblia yina kesimba mambu ya beto ketuba, mpi kana mpila kele kutanga yo mbala mosi na Biblia. Beto kezola nde muwi kubakisa nde beto ketuba ve bangindu na beto mosi, kansi mabanza ya Nzambi.
6. Inki Yezu kusalaka sambu na kusimba ntima ya bawi na yandi?
6 Simba Ntima ya Bantu na Ntangu Nge Kelonga: “Ata mbala mosi ve muntu me tubaka mambu mutindu muntu yai ke tuba.” (Yoa. 7:46) Yai kele mambu bapolisi kutubaka sambu na Yezu ntangu bamfumu ya banganga-Nzambi mpi Bafarize kuyulaka bo sambu na nki bo kangaka ve Yezu. Na kisika ya kutuba kaka mambu, Yezu kulongaka na mutindu yina vandaka kusimba ntima ya bantu yina yandi vandaka kulonga. (Luka 24:32) Yandi sadilaka bingana yina vandaka kutadila luzingu ya bantu ya konso kilumbu sambu na kusadisa bo na kubakisa nsangu na yandi. (Mat. 13:34) Yezu kulongaka ve bawi na yandi mambu mingi na mbala mosi. (Yoa. 16:12) Yandi vandaka kubenda dikebi na bo na Yehowa, kansi na yandi mosi ve. Bonso Yezu, beto lenda kuma balongi ya mbote kaka kana beto ketula dikebi na “malongi” na beto.—1 Tim. 4:16.
7. Sambu na nki Yezu kukwaminaka na kisalu ya kusamuna?
7 Kwamina Ata Bantu Kebuya Nsangu to na Ntwala ya Kimbeni: Yezu kusalaka bidimbu ya nkumbwa, kansi bantu mingi kuwidikilaka yandi ve. (Luka 10:13) Ata bantu ya dibuta na yandi kuyindulaka nde “yandi me lauka.” (Mar. 3:21) Ata mpidina, Yezu kukwaminaka. Yandi vandaka ntangu yonso ti nkadilu ya mbote sambu yandi vandaka mpenza kutula ntima nde yandi vandaka ti kyeleka yina lendaka kukatula bantu na kimpika. (Yoa. 8:32) Ti lusadisu ya Yehowa, beto mpi kele ti lukanu ya kuyambula ve kusamuna.—2 Kor. 4:1.
8, 9. Inki mutindu beto lenda landa mbandu ya Yezu na kusalaka bibansa sambu na nsangu ya mbote?
8 Sala Bibansa Yina Mefwana Sambu na Kusamuna Mingi: Yezu kutambikaka bima ya kinsuni sambu na kisalu ya kusamuna. (Mat. 8:20) Yandi samunaka kukonda kulemba, bantangu yankaka tii na nkokila. (Mar. 6:35, 36) Yandi zabaka nde yandi vandaka ve ti ntangu mingi sambu na kusala kisalu ya kusamuna. Sambu “ntangu me bika diaka mingi ve,” beto mpi fwete sala bibansa na yina metala ntangu, ngolo mpi bima na beto sambu na kulanda mbandu ya Yezu.—1 Kor. 7:29-31.
9 Bakristu ya mvu-nkama ya ntete kubutaka bambuma mingi sambu Yezu muntu kulongaka bo. (Bis. 4:13) Beto mpi lenda lungisa mbotembote kisalu na beto ya kusamuna kana beto landa mbandu ya Nsamuni ya kuluta nene na disolo ya luzingu ya bantu.—2 Tim. 4:5.