Kudibongisa Kesadisaka na Kusala Bamvutukila ya Mbote
1. Na nki mutindu kisalu ya Bukristu zolaka kusalama na mvu-nkama ya ntete?
1 Yezu kubongisaka mbotembote balongoki na yandi sambu na kuvanda bansamuni ya mbote ya “nsangu ya mbote sambu na Kimfumu ya Nzambi.” (Mat. 4:23; 9:35) Yandi longaka bo ntangu bo vandaka kusamuna na Palestine. Kansi, na ntwala ya kumata na zulu, Yezu kumonisaka nde kisalu ya Bukristu zolaka kusalama mingi sambu na “kukumisa bantu yonso balonguki.”—Mat. 28:19, 20.
2. Kulemfukila ntuma ya Yezu ya ‘kukumisa bantu balonguki’ ketadilaka nki?
2 Kisalu ya Bukristu zolaka kutadila kuvutukila bantu yina kumonisaka mpusa na nsangu ya mbote ya Kimfumu ya Nzambi, mpi kulonga bo na kulanda mambu yonso yina Kristu kutumaka. Sambu na kusala bamvutukila yango mbote, beto fwete kudibongisa mbote.
3. Inki mutindu nge lenda sala sambu na kuvutukila muntu?
3 Kudibongisa na Ntwala: Bansamuni yankaka keyulaka ngyufula mosi na nsuka ya mvutukila ya ntete mpi kepesaka dilaka ya kuvutuka sambu na kupesa mvutu. Bo memonaka nde kutubila mambu yina kele na mukanda Biblia Kelongaka ntangu bo kevutukilaka muntu, kesadisaka bo na kuyantika mbala mosi kulonguka Biblia ti muntu.
4. Sambu na nki beto fwete kinga ve na kubaka banimero ya mpa sambu na kuvutukila muntu?
4 Kuvanda kaka ti Nzozulu ya Nkengi mosi ti Réveillez-vous ! mosi ya kukabula na konso ngonda, ketendula ve nde beto fwete kinga na kubaka banimero ya mpa sambu na kuvutukila muntu. Yo lenda vanda mbote na kuyedisa mpusa ya muntu na kutadilaka mambu yina kele na zulunalu yina beto bikilaka yandi dezia.
5. Inki kele mfunu ya kuvanda ti lukanu?
5 Vanda ti Lukanu: Na ntwala ya kusala mvutukila, baka mwa minuta fyoti sambu na kutadila dyaka banoti na nge mpi kutadila nki nge kekana na kulungisa. Mu mbandu, tubila disolo mosi ya kele na mukanda yina nge bikisaka na mbala ya ntete. To pesa mukanda yankaka yina ketubila disolo ya beno tubilaka na mbala ya ntete. Kana nge yulaka ngyufula na mbala ya ntete, lukanu na nge fwete vanda ya kupesa mvutu na ngyufula yango. Sala yonso sambu na kutanga verse mosi ya Biblia ya ketubila disolo ya beno ketadila.
6. Inki kele lukanu na beto na ntangu beto kesala bamvutukila?
6 Lukanu na Beto ya Kuluta Mfunu: Ya kyeleka, lukanu na beto kele ya kuyantika kulonguka Biblia ti muntu. Ntangu mpangi mosi ya bakala kuvutukilaka muntu mosi, yandi lombaka yandi na kulonguka Biblia, kansi muntu yango kubuyaka. Mpangi yango kuvutukaka mpi kunataka baperiodike ya mpa, mpi kutubaka nde: “Beto mekwisa sambu na kupesa mvutu na ngyufula mosi ya Biblia ya ketadila bantu bubu yai.” Na nima ya kuwidikila mvutu ya muntu yango, mpangi yina kutangaka verse mosi ya Biblia mpi paragrafe ya mukanda mosi ya beto kesadilaka sambu na kulonguka Biblia ti bantu, yina vandaka kutubila dyambu yina. Kusala mutindu yina kunataka na kulonguka Biblia mbala na mbala.
7. Inki mutindu kudibongisa mbote kesadisaka nge na kuyantika kulonguka Biblia ti muntu?
7 Yo mefwana mpenza na kubaka ntangu ya kudibongisa sambu na kusala bamvutukila. Kyese na beto takuma mingi, mpi beto lenda vanda ti dibaku ya kusadisa bantu yina kele ya kuyilama na kubaka luzingu.—Bis. 13:48.