Keti Nge Kesadila Nimero ya Bantu Yonso ya Nzozulu ya Nkengi?
1 Na nima ya kutanga Nzozulu ya Nkengi ya Kifalansa ya Yanuari 1, 2008, mpangi-nkento mosi kutubaka nde: “Mu lenda vingila ve sambu na kukabula yo na kisalu ya bilanga.” Keti nge metadila dezia mwa mambu ya mpa yina kevutuka mbala na mbala na nimero ya bantu yonso, mpi keti nge mesosa mitindu yina nge lenda sadila yo na kisalu ya kusamuna?
2 “Malongi ya Beto Kebaka na Yina Metala Yezu”: Mbala yankaka nge memona nde disolo yai kesadisa na kuyantika kulonguka Biblia ti bantu. Kana nge mesadila yo ntete ve, meka na kutangila muwi ntu-dyambu ya disolo mpi benda dikebi na yandi na mambu yina Yezu kutubaka, mutindu yo kele na paragrafe ya ntete. Kana muntu memonisa mpusa, sala kikesa na kulanda disolo na kusadilaka ba kantu-dyambu, yina kele bonso bangyufula ya kepusaka na kuyindula. Lomba muwi na kupesa mvutu na bangyufula yina. Tendula na bunkufi konso kifwanisu yina kele na kuwakana ti bangyufula yina, mpi kwenda na paragrafe yina kelanda. Nge lenda tubila kitini ya ntete ya disolo yango na mbala ya ntete yina nge mekutana ti yandi, mpi kutubila kitini ya zole ntangu nge tavutukila yandi. Kudibongisa sambu na kulanda kulonguka ti yandi mukanda Biblia Kelongaka.
3 “Kinsweki ya Kyese ya Dibuta”: Lukanu ya masolo yai, ya kebasika na nima ya bangonda tatu, kele ya kusadisa babakala, bankento, mpi bibuti na kuzaba mutindu ya kusadila minsiku ya Biblia ntangu makambu yina kekatulaka ngemba ya dibuta mabasika. Nge lenda sadila mpi masolo yai sambu na kusadisa bantu yina kele ve Bambangi ya Yehowa sambu bo bakisa mayele yina kele na kati ya Biblia.—2 Tim. 3:16, 17.
4 Masolo Sambu na Baleke: Masolo “Sambu na Baleke na Beto” kele ya kusonika na mutindu yina kesadisa na kuyindula masolo ya sikisiki ya Biblia. Nge lenda sadila masolo yai sambu na kusadisa baleke yina nge kekutana ti bo na kisalu ya kusamuna sambu bo bakisa mfunu ya kulonguka Ndinga ya Nzambi. (Nk. 119:9, 105) Ntangu nge kesolula ti bibuti, nge lenda tubila disolo “Beno Longa Bana na Beno,” yina kebasika bangonda yankaka. Masolo yai lenda sadisa bana ya fyoti na kulonguka malongi ya mfunu ya bantu yina Biblia ketubilaka. Keti nge meyantika dezia kutanga masolo yai ti bana na beno?
5 Masolo Yankaka: Konso ngonda, masolo “Bangyufula ya Batangi na Beto” ketubilaka ngyufula mosi yina bantu yina kele ve Bambangi ya Yehowa lenda yula. Nge lenda sadila disolo yai ntangu nge kekabula baperiodike na kisalu ya nzo na nzo. Disolo “Mukanda ya Mekatuka na . . . ” kele disolo ya muntu keta ya kemonisa bampasi yina bamisionere ti bantu yankaka kekutana ti yo na kisalu ya kusamuna. Masolo yai lenda sadisa bantu ya kemonisa mpusa na kubakisa nde nsangu ya mbote ke na kulongama na nsi-ntoto ya mvimba, na kulungana ya kidimbu ya kuvanda ya Kristu.—Mat. 24:3, 14.
6 Disolo “Kwenda Penepene na Nzambi,” yina kebasika konso ngonda mpi ya mekatuka na lutangu ya Biblia ya Nzo-Nkanda ya Kisalu ya Teokrasi, lenda pusa bantu ya ntima masonga na kuzola kulonguka mambu mingi ya metala Yehowa. Disolo “Landa Mbandu ya Lukwikilu na Bo,” yina kebasika mbala iya na mvula, kele ti lukanu ya kusadisa bantu na kubakisa nde bantu yina Biblia ketubilaka kele bantu ya kyeleka na yina metala bansola ya bo salaka, bampasi ya bo kutanaka ti yo, mpi lukwikilu na bo.
7 Beto kele na kyese mpenza na kuzwa konso ngonda nimero ya bantu yonso ya Nzozulu ya Nkengi yina beto lenda sadila na kisalu ya bilanga! Kuluta dyaka, bika nde beto tanga mpenza nimero yango ya mvimba mpi beto sadila yo mpenza na kisalu na beto ya kusamuna.