Bamvutu na Bangyufula na Beno

◼ Keti yo mefwana nde mabundu to bantu kusadila ba-logo ya bimvuka ya Bambangi ya Yehowa yina mezabanaka na nsiku?

Logo kele zina to kidimbu ya kesadisaka bantu na kuzaba kukonda mpasi kompani mosi. Logo The Watch Tower (kifwanisu ya nzozulu) kele kidimbu ya kemonisaka kimvuka Watch Tower Bible and Tract Society of Pennsylvania mpi bimvuka yankaka yina organizasio kesadilaka. Kimvuka The Christian Congregation of Jehovah’s Witnesses kesadilaka na zulu ya mikanda na yo kidimbu ya Biblia ya kukangula. Bimvuka yankaka ya Bambangi ya Yehowa kesadilaka bidimbu yankaka ya kuswaswanisa.

Mabundu to bantu fwete sadila ve ba-logo to bazina ya bimvuka yina mezabanaka na bansiku ya leta ya organizasio kesadilaka, to ba-logo mpi bazina ya kefwanana ti yina organizasio kesadilaka, na Banzo ya Kimfumu na bo, na bidimbu ya kevandaka na zulu ya mikanda na bo, na bima na beto mosi, mpi buna na buna. Kusadila ba-logo ya organizasio na mutindu yai lenda vwalangasa bamfumu ya leta, bansamuni, mpi bantu yankaka na yina metala bangwisana ya dibundu na ntwala ya nsiku ya leta ti bimvuka yina mezabanaka na nsiku ya leta yina organizasio kesadilaka. Mutindu mosi, bantu lenda yindula nde biro ya nene ya ntoto ya mvimba to biro ya filiale muntu mendima to metinda mikanda yina.

Bo fwete sadila ve Logo The Watch Tower, to logo ya kefwanana ti yo, na Banzo ya Kimfumu yina bo tatunga na bilumbu kekwisa ata nkutu kimvuka Watch Tower muntu kusumbaka Nzo ya Kimfumu yina. Yo kelomba ve nde mabundu yina kele dezia ti Banzo ya Kimfumu ya kele ti logo kusoba mbala mosi bidimbu yina, sambu yo lenda lomba nsoba ya nene mpi ntangu, kikesa, mpi mbongo mingi. Kansi, na ntwala ya kusala nsoba, beno fwete tadila kana yo tavanda ya fyoti mpi yo talomba ve kisalu ya nene. Kana yo talomba kisalu ya nene, beno lenda sala yo na ntangu yina beno metulaka sambu na kuyidika dyaka nzo to bidimbu.