Kisalu ya Kusamuna Kemonisaka Zola na Beto Sambu na Nzambi
1. Zola ya Yezu sambu na Nzambi kupusaka yandi na kusala inki?
1 Zola kupusaka Yezu na kulungisa kisalu na yandi ya kusamuna. Bitini yonso ya kisalu ya Yezu kele nzikisa ya pwelele ya kemonisa zola na yandi sambu na Yehowa. Yezu kutubaka nde: “Bantu ya nsi-ntoto yai fweti zaba nde mono ke zolaka Tata; yo yina, mono ke salaka konso mambu yina ya yandi ke songaka mono na kusala.” (Yoa. 14:31) Sambu beto kele balongoki ya Yezu, beto kele mpi ti dibaku ya mbote ya kumonisa zola na beto ya mudindu sambu na Nzambi na kisalu na beto ya kusamuna.—Mat. 22:37; Ef. 5:1, 2.
2. Inki mutindu zola sambu na Yehowa kevandaka ti bupusi na kisalu na beto?
2 “Bika nde Zina na Nge Kuvanda Santu”: Ntangu beto kesadilaka ti kikesa konso dibaku sambu na kuzabisa bankaka mambu ya metala Yehowa mpi Kimfumu na yandi, beto kemonisaka zola na beto sambu na Nzambi mpi, na kutuba ya kyeleka, beto kesadisaka na kusantisa zina na yandi. (Nk. 83:18, NW; Ezek. 36:23; Mat. 6:9, NW) Mutindu kisalu ya Yezu kumonisaka yo, kisalu na beto kelandaka na kumonisa mpusa ya masonga ya beto kevandaka na yo sambu zina ya Yehowa kusantisama mpi sambu luzolo na yandi kusalama.—Mat. 26:39.
3. Na nki mutindu zola na beto sambu na Yehowa kesadisaka beto na kununga bampasi?
3 Zola Kepusaka Beto na Kununga Bampasi: Zola sambu na Yehowa kenungaka mambu yonso ya lenda kanga beto nzila. (1 Kor. 13:4, 7) Na luzingu na yandi, Yezu kutanaka ti mambu mingi yina lendaka kukanga yandi nzila na kulungisa kisalu na yandi. Kansi, ntangu yandi kutanaka ti bampasi, zola na yandi ya mudindu mpi mpusa na yandi ya kusala luzolo ya Yehowa kusadisaka yandi na kununga mambu yonso yina. (Mar. 3:21; 1 Pie. 2:18-23) Beto mpi kekutanaka ti bampasi mingi, yina zola na beto sambu na Nzambi lenda sadisa beto na kununga. Na kulandaka mbote-mbote mbandu ya Kristu, beto lenda vanda ti kivuvu mpi kikesa na kusala kisalu na beto ya kusamuna. Ata kimbeni ya bantu ya dibuta, maladi, kimununu, to mutindu bantu kebuya nsangu lenda pesa beto mpasi, yo kekangaka beto ve nzila ya kumonisa zola na beto sambu na Yehowa na kulungisaka kisalu na beto ya kusamuna na mutindu ya mefwana.
4. Inki dibaku ya mbote zola na beto sambu na Yehowa kepesa beto?
4 Zola kevandaka ngolo, mpi beto kele ti dibaku ya mbote ya kumonisa zola na beto ya ntima ya mvimba sambu na Nzambi na kisalu ya kusamuna. (1 Kor. 13:13) Sambu beto kepusana nswalu mpenza na ntangu yina zina ya Yehowa tasantisama kimakulu, bika nde ‘zola na beto kukuma mingi-mingi.’—Filp. 1:9; Mat. 22:36-38.