Bilumbu Tatu ya Kepesa Kikesa na Kimpeve
1. Lukutakanu ya distrike ya mvula yai tanatila beto nki mambote?
1 Na nsi-ntoto yai ya zelo na zelo na kimpeve yina kele nsi-ntoto ya Satana, Yehowa kelanda kaka na kupesa bansadi na yandi kikesa. (Yez. 58:11) Ngidika mosi yina Yehowa kesadilaka sambu na kupesa beto kikesa kele lukutakanu ya distrike yina kesalamaka konso mvula. Mutindu lukutakanu ya distrike ya mvula yai kefinama, nki mutindu beto lenda kudibongisa sambu na kubaka mpi kupesa kikesa na kimpeve?—Bing. 21:5.
2. Inki mambu beto fwete sosa kuyidika dezia?
2 Kana nge mekudibongisa ntete ve, baka ntangu, banda bubu yai, ya kuyidika manaka na nge mosi mpi manaka ya kisalu na nge ya kinsuni sambu na kuvanda na lukutakanu ya distrike bilumbu yonso tatu. Keti nge metadila dezia kana nge tasala bantangu ikwa sambu na kukwenda konso kilumbu na kisika lukutakanu ya distrike tasalama na mpila nde nge lenda kuma na ntwala nde manaka kuyantika mpi kubaka kisika ya kuvanda? Ntembe kele ve nde beto tazola ve kukonda ata kitini mosi ya madya ya kimpeve ya kepesa kikesa yina Yehowa meyidikaka sambu na beto! (Yez. 65:13, 14) Keti nge mebaka dezia bangidika sambu na kisika ya kulala mpi transpore?
3. Inki bangindu tasadisa beto mpi mabuta na beto na kubaka mambote ya mingi na manaka ya lukutakanu?
3 Inki tasadisa nge na kutula dikebi ya ngolo na ntangu lukutakanu kesalama? Kana mpila kele, pema mbote konso mpimpa na nsungi ya lukutakanu. Tala mutubi. Landa baverse yonso na Biblia na nge. Baka banoti ya nkufi. Yo kele mbote nde mabuta kuvanda kisika mosi sambu bibuti lenda sadisa bana na bo na kulanda na dikebi yonso. (Bing. 29:15) Mbala yankaka beno lenda tubila bangindu ya mfunu ya manaka konso nkokila na dibuta. Sambu dibuta na beno kulanda na kubaka kikesa ata na nima ya lukutakanu ya distrike, na nkokila ya Lusambu ya Dibuta, beno lenda baka ntangu ya kutadila bangindu ya sikisiki yina dibuta na beno lenda sadila.
4. Inki mutindu beto lenda sadisa bantu yankaka na dibundu na beto na kubaka kikesa na kimpeve?
4 Sadisa Bankaka na Kubaka Kikesa na Kimpeve: Beto kezolaka nde bantu yankaka mpi kubaka kikesa na kimpeve. Keti dibundu na beno kele ti bansamuni ya minunu to bantu yankaka yina kele na mfunu ya lusadisu sambu na kukwenda na lukutakanu ya distrike? Keti nge kele ti makuki ya kusadisa bo? (1 Yoa. 3:17, 18) Bankuluntu, mingi-mingi bankengi ya bimvuka, fwete zikisa kana bansamuni ya mutindu yai mebaka lusadisu ya mefwana.
5. Inki mutindu beto takabula baemvitasio na lukutakanu ya distrike? (Tala mpi lupangu yai kele awa na zulu.)
5 Bonso na bamvula meluta, bamposo tatu na ntwala ya kusala lukutakanu na beto ya distrike, beto tasala kampanye sambu na kubingisa bantu yankaka na kuvukana ti beto. Mabundu fwete baka lukanu ya kukabula baemvitasio yonso ya bo bakaka mpi kusala teritware na bo ya mvimba kana mpila kele. Kansi, kana dibuta na beno mebikala ti baemvitasio na nsuka ya kampanye, beto kelomba beno na kunata yo na lukutakanu ya distrike, sambu na kusadila yo ntangu beno keta kimbangi na dibaku ya mbote. Bansangu yankaka ya metadila ngidika yai tapesama na manaka ya kilumbu ya Kitanu. Kana dibuta na beno kele ti baemvitasio ya ngika yina beno takuka ve kukabula na bwala yina lukutakanu tasalama, beno fwete pesa yo na mpangi mosi ya kisalu ya kuyamba bantu ntangu beno kekota na kisika ya lukutakanu na Kitanu. Beto kelomba nge na kubumba kopi mosi sambu nge tavanda na mfunu ya kutadila yo na Lumingu, ntangu diskure ya nsuka tasalama.
6. Inki mutindu beto lenda pesa bantu yankaka kikesa na kumonisaka nkadilu ya mbote?
6 Nkadilu ya Mbote Kepesaka Kikesa: Na ntangu bantu mingi ‘kezolaka bantu ya nkaka ve’ mpi ketulaka ve dikebi na mawi ya bantu yankaka, yo kepesaka mpenza kikesa na kuvanda kumosi ti bampangi Bakristu yina kesala ngolo sambu na kumonisa nkadilu ya mbote! (2 Tim. 3:2) Beto kemonisaka nkadilu ya mbote ntangu beto kekotaka na kisika ya lukutakanu na mutindu mosi ya pima mpi na ndonga ntangu bo kekangulaka bakyelo, mpi na kubumbaka bisika ya kuvanda kaka sambu na bantu yina kezingaka na nzo na beto, bayina kekwisa kumosi ti beto na vwatire, to bantu yina kelongukaka Biblia ti beto. Beto kelandaka lutwadisu ya ntwadisi ya kitini mosi ya lukutakanu ntangu yandi kelombaka nde beto kwenda kuvanda na bisika na beto sambu na kulanda miziki ya luyantiku ya konso kitini ya manaka. Kuyidika telefone to ba-apareyi yankaka na mpila nde yo vwalangasa ve mabanza ya bantu yankaka ntangu lukutakanu kesalama, kele kumonisa nkadilu ya mbote. Na ntangu lukutakanu kesalama, beto tamonisa mpi nkadilu ya mbote kana beto kesolula ve mpamba-mpamba, ketinda ve bansangu na telefone, kedya ve, to ketambula-tambula ve.
7. Inki mutindu beto lenda baka mpi kupesa kikesa na ntangu beto kevukana ti bampangi na beto?
7 Kinduku ya Kepesa Kikesa: Balukutakanu ya distrike kepesaka beto mabaku mingi ya kusepela na kikesa yina beto kebakaka na bumosi mpi kimpangi na beto ya Bukristu. (Nk. 133:1-3) Sambu na nki ve kusala kitambi ya ntete na “kudikangula” mpi kukutana ti bampangi ya babakala mpi ya bankento yina mekatuka na mabundu yankaka? (2 Kor. 6:13) Nge lenda tula lukanu ya kuzabana ata na muntu mosi to dibuta mosi konso kilumbu. Kupema ya midi kepesaka dibaku ya mbote ya kusala mutindu yai. Sambu na yo, kunata ve madya ya kilo mpi dya na kisika ya lukutakanu kumosi ti bampangi olie ya kubasika sambu na kukwenda na restora yina ke penepene. Yo lenda sadisa beto na kubaka mambote ya kusolula na banduku ya mpa mpi ya ntama.
8. Sambu na nki beto fwete monisa luzolo ya mbote sambu na kupesa maboko na lukutakanu, mpi nki mutindu beto lenda sala yo?
8 Yo kepesaka kikesa mpenza na kusala kumosi ti bampangi-Bakristu na kisalu ya santu! Keti nge lenda monisa luzolo ya mbote na kupesaka maboko na departema mosi to kusadisa dibundu na beno kana bo mepesa beno mukumba ya kutula bunkete? (Nk. 110:3) Kana bo mepesa nge ntete ve mukumba na lukutakanu, beto kelomba nge na kusosa kukutana ti bampangi ya Departema ya Kisalu ya Luzolo ya Mbote. Kana bantu kele mingi, kisalu kepesaka kyese mpi kekumaka pete.
9. Sambu na nki beto fwete tula dikebi ya sipesiali na bikalulu na beto mpi na mutindu na beto ya kuyidika nitu na nsungi ya lukutakanu?
9 Bikalulu na Beto Kepesaka Kikesa na Bantu ya Ketala Beto: Beto kele mimonisi ya lukutakanu ya distrike bilumbu yonso tatu, kansi kaka ve na ntangu manaka kesalama. Bantu yina ketala beto ntangu beto kele na kisika yina lukutakanu kesalama fwete mona luswaswanu na kati na beto ti bantu yina kele ve Bambangi ya Yehowa. (1 Pie. 2:12) Mutindu na beto ya kulwata mpi ya kuyidika nitu na kisika lukutakanu ya distrike kesalama, na kisika ya beto kelala mpi na barestora fwete pesa Yehowa lukumu. (1 Tim. 2:9, 10) Kulwata bamakaro na beto tasadisa bantu yina ketala beto na kuzaba nde beto kele bambangi mpi, mbala yankaka, yo tapesa beto dibaku ya kuta kimbangi mpi ya kuzabisa bo mambu ya metala lukutakanu na beto.
10. Inki baeksperiansi kemonisa nde bikalulu na beto ya Bukristu kevandaka ti bupusi ya mbote?
10 Bikalulu na beto ya mbote na nsungi ya lukutakanu ya distrike kevandaka ti nki bupusi na bantu yankaka? Mfumu ya kisika mosi yina Bambangi kusadilaka sambu na balukutakanu ya distrike kutubaka mambu yai, ya bo sonikaka na zulunalu mosi: “Bantu kele luzitu kibeni. Beto kevandaka na kyese mingi ya kuyamba bo konso mvula.” Na mvula ya mekatuka kuluta muntu mosi yina kele ve Mbangi kuvidisaka ka-saki na yandi ya kutudila mbongo na otele yina bantu ya kukwendaka na lukutakanu kuvandaka. Ntangu bo vutudilaka mfumu ya otele ka-saki yango ti bima yonso na kati, yandi tubilaka munkwa na yo nde: “Nge ke na shanse sambu Bambangi ya Yehowa kusalaka lukutakanu na bo na zyunga na beto, mpi bo vandaka ya kufuluka awa na otele. Kana ve, saki na nge zolaka kumonana dyaka ve.”
11. Mutindu lukutakanu ya distrike kefinama, nki fwete vanda lukanu na beto, mpi sambu na inki?
11 Lukutakanu ya distrike ya mvula yai kefinama nswalu. Bampangi kebakaka ntangu mingi mpi kesalaka bikesa mingi sambu manaka mpi mambu yina tasalama na kisika ya lukutakanu ya distrike kupesa kikesa. Baka lukanu ya kukwenda na lukutakanu bilumbu yonso tatu, mpi kudiyidika sambu na kulanda mambu yina Yehowa mpi organizasio na yandi meyidika sambu na nge. Baka mpi lukanu ya kupesa bankaka kikesa na nkadilu na nge ya mbote, na kusalaka kinduku ti bampangi na kyese yonso, mpi na bikalulu na nge ya mbote. Mpidina, nge ti bantu yankaka lenda kudiwa bonso mpangi nkento mosi, yina kuvandaka na kati ya bantu yina kukwendaka na lukutakanu ya distrike mvula meluta; yandi sonikaka nde: “Mu keyibuka ve mambu yankaka yina lenda pesa kyese mingi kuluta lukutakanu ya distrike!”
[Bangogo sambu na kubenda dikebi ya kele na lutiti 4]
Bonso na bamvula meluta, bamposo tatu na ntwala ya kusala lukutakanu na beto ya distrike, beto tasala kampanye sambu na kubingisa bantu yankaka na kuvukana ti beto
[Bangogo sambu na kubenda dikebi ya kele na lutiti 6]
Mutindu na beto ya kulwata mpi ya kuyidika nitu na kisika lukutakanu ya distrike kesalama, na kisika ya beto kelala mpi na barestora fwete pesa Yehowa lukumu
[Bangogo sambu na kubenda dikebi ya kele na lutiti 7]
Baka lukanu ya kupesa bankaka kikesa na nkadilu na nge ya mbote, na kusalaka kinduku ti bampangi na kyese yonso, mpi na bikalulu na nge ya mbote
[Lupangu ya lutiti 4-7]
Bangibusa ya Lukutakanu ya Distrike 2011
◼ Bangunga: Bilumbu yonso tatu manaka tayantikaka na 8:20. Kansi na bambanza yai: Brazzaville, Goma, Kananga, Kikwit, Kinshasa, Kisangani, Kolwezi, Likasi, Lodja, Lubumbashi, Matadi, Mbandaka, Mbujimayi, Mwene Ditu, Pointe Noire mpi Tshikapa, manaka ya balukutakanu ya distrike tayantika na 9:20 konso kilumbu. Bakyelo takangukaka na 7:00 to na 8:00, na kutadilaka mutindu mambu kesalamaka na bwala na beno. Na ntangu miziki tayantika kubula, beto yonso fwete vanda na bisika na beto na ntangu yina na mpila nde manaka kuyantika na mutindu mosi ya mefwana.
◼ Kubumba Bisika: Beno lenda bumba bisika ya kuvanda kaka sambu na bantu yina kezingaka ti beno nzo mosi, bayina kekwisa kumosi ti beno na vwatire, to sambu na bantu yina kelongukaka Biblia ti beno.—1 Kor. 13:5.
◼ Madya ya Midi: Beto kelomba beno na kunata madya ya kukonda kilo kansi ya mefwana na kudisa nitu, mu mbandu: mampa, bambuma (mankondo), nguba, mikati to bagato. Beno fwete tula bima bonso masa, kafe to te na kima mosi yina kepasukaka ve sambu na kubuya ba aksida. Ata muntu mosi ve kele ti nswa ya kunata malafu na lukutakanu ya distrike. Kana beno nata madya na beno ti bima yina beno lenda nwa, beno tavanda ve na mfunu ya kusumba yo na bateki. Kubuya kusumba bima na bantu yina kele na nganda tasadisa beto na kupesa kimbangi ya mbote na yina metala bunkete na beto. (Beno simba nde: Bateki kele ve ti nswa ya kukota na kisika ya lukutakanu na konso ntangu yina.—Yoa. 2:13-17.)
◼ Makabu: Beto lenda tula makabu ya luzolo ya mbote na Nzo ya Kimfumu na beto to na lukutakanu ya distrike sambu na kumonisa ntonda na beto na bangidika ya lukutakanu ya distrike mpi na kisalu yina kesalama na ntoto ya mvimba. Ba chèques yina bantu kepesa sambu na lukutakanu ya distrike, bo fwete tula yo na zina ya Association “Les Témoins de Jéhovah.”
◼ Ba Aksida mpi Maladi ya Kintulumukina: Bampangi yina kesalaka na departema ya ketalaka maladi ya kintulumukina kubokutaka nde bampangi mingi kebingaka bo sambu na mambu ya fyoti kibeni. Kana maladi kukanga muntu na kintulumukina na kisika ya lukutakanu ya distrike, beto kelomba beno na kusolula ti mpangi mosi ya kisalu ya kuyamba bantu, ebuna yandi tasukinina ve na kuzabisa departema ya Lusadisu ya Ntete na mpila nde bampangi yina kele na lukutakanu mpi ya mezaba kisalu yango mbote kutala nene ya maladi yango mpi kupesa lusadisu na bo.
◼ Kubaka Bafoto: Kana beno kebaka bafoto na ntangu programe kesalama, beto kelomba beno na kusadila ve flashe. Beto kelomba beno mpi na kubinga ve bantu yina kekangaka bafoto na kukwisa na kisika ya lukutakanu. Kana beno mona bantu yango kekanga bafoto na kisika ya lukutakanu, beno kwenda ve na bo sambu bo kanga beno bafoto.—Yoa. 2:13-17.
◼ Batelefone: Beno fwete sala na mpila nde yo katula ve dikebi ya bawi.
◼ Bunkete: Mbala mingi, yo kemonanaka nde bantu yina kesumbaka madya na bateki kelosaka bapapie na ntoto to basashe ya bo kekangilaka bo bima yango. Yo kesalaka nde kibansala ya mvimba kufuluka ti bapapie, basashe, babusho ya milangi mpi buna na buna. Kana muntu mebaka lukanu ya kusumba kima mosi na bantu yina ketekaka (mu mbandu: bazoka, babisikwiti, bagato, bitini ya bambisi to konso kima yankaka), pana yandi kele ti mukumba ya kulosa papie to sashe yina na kati ya bitunga ya bima ya mvindu kansi na ntoto ve. Kana beto memona nde muntu mosi melosa papie to sashe na ntoto, beto fwete lokuta yo mpi kulosa yo na bitunga ya bima ya mvindu. Bampangi, beto kelomba beno na kusala mpenza kikesa sambu kisika ya beto kesadila lukutakanu na beto ti nzyunga na yo kubikala bunkete. Konso muntu yina kele na lukutakanu fwete tadila dyambu ya bunkete na ntima mosi. Kana konso muntu kusala dikabu na yandi, na nsuka ya kilumbu, kisika ya lukutakanu tabikala bunkete. Beto kezola kumonisa bikalulu ya Nzambi yina beto kesambilaka sambu yandi kele santu.—1 Pie. 1:15, 16; Kub. 19:10; Kul. 23:14.
◼ Na Bisika na Beto ya Kulala: (1) Kana bo mepesa beto kisika ya kulala, beto fwete lutisa ve ntalu ya bantu yina munkwa nzo mepesila nswa. (2) Kana nge tazola ve kuvanda na nzo yina bo mepesa nge, beto kelomba nge na kutuba yo kukonda kusukinina. (3) Na ntwala ya kulamba, lomba ntete nswa na munkwa nzo to na bampangi yina kele na mukumba ya kutadila bisika ya kulala na Nzo ya Kimfumu na mpila nde bo baka konso ngidika yina kele mfunu. (4) Kusadila ve na mutindu ya mbi konso ngidika yina bampangi mebaka sambu na banzenza. Beto fwete sadilaka bukatikati. (5) Bunkete kekwendaka kumosi ti kikalulu ya kukangama na Nzambi. Kisika na beno ya kulala fwete vanda ntangu yonso bunkete mpi na ndonga. Dyambu yai ketadila mpi Nzo ya Kimfumu, yina beno lenda sadila bonso kisika ya kulala sambu na bampangi yina kekatukaka na mabundu ya ntama. (6) Monisa mbuma ya mpeve na mutindu na nge ya kuzinga ti bankaka, yo vanda ti munkwa nzo to ti bampangi Bakristu yankaka yina lenda vanda nzo mosi to kisika mosi ti nge.—Gal. 5:22, 23.
◼ Kisalu ya Bantu ya Luzolo ya Mbote: Kyese na beto ya kuvukana na lukutakanu takuma mingi kibeni kana beto ndima na luzolo yonso kusala bisalu yina kele mfunu sambu na lukutakanu. (Bis. 20:35) Konso muntu yina kezola kusala mpidina fwete kwenda kudimonisa na Departema ya Bantu ya Luzolo ya Mbote, na lukutakanu. Bana yina kele na bamvula na nsi ya 16 lenda sala mpi dikabu na bo na mutindu mosi ya kuluta mbote, na kusalaka na lutwadisu ya batata to bamama na bo to ya mbuta yankaka yina bibuti mepesaka nswa.
[Lupangu ya lutiti 5]
Inki mutindu beto takabula baemvitasio?
Sambu na kusala teritware na beto ya mvimba, bangogo na beto fwete vanda nkufi. Beto lenda tuba bangogo bonso yai: “Mbote. Beto kevukana na kisalu ya kukabula na ntoto ya mvimba emvitasio yai. Kopi na nge yo yai. Nge takuta bansangu mingi na kati.” Lutiti ya ntete ya emvitasio kebenda dikebi mpenza, yo yina pesa yo muntu na mpila nde yandi mona yo. Vanda na kyese. Ntangu beno kekabula baemvitasio na bawikendi, beno fwete kabula mpi baperiodike, kana mpila kele.