Ndinga ya Nzambi Sambu na Beto na Nzila ya Yeremia

1. Inki mukanda kubasikaka na lukutakanu ya distrike ya mvu 2010, mpi nki mutindu beto tasadila yo?

¹ Beto waka kyese mingi ntangu beto bakaka mukanda ya mpa ya kubasikaka na mvu 2010 na Lukutakanu ya Distrike “Beno Bikala Penepene ya Yehowa!” Mukanda yai ketubila malongi ya mekatuka na mukanda ya Yeremia mpi Mawa, yina lenda sadisa beto na luzingu na beto ya konso kilumbu. (Roma 15:4) Bo mebasisa mukanda yango sambu na Kulonguka ya Biblia ya Dibundu, yo yina kulonguka yango tayantika na mposo ya Novembri 5, 2012.

2. Sambu na nki beto lenda baka mambote kana beto ketadila mukanda ya Yeremia mpi ya Mawa?

² Yo Kele Mfunu Bubu Yai: Yeremia, nsoniki ya mukanda yai ya kupemama, kubikulaka na nsungi mosi ya mavwanga na Yuda. Na luyantiku, yandi vandaka kudiwa nde yandi fwanaka ve sambu na kulungisa mukumba na yandi. (Yer. 1:6) Bo mengaka yandi mpi na bantu yina yandi zabanaka ti bo, ziku bantu ya mbanza na yandi, Anatoti. (Yer. 11:21, 22) Yo ke pwelele nde, na ntangu mosi buna Yeremia kulembaka nitu. (Yer. 20:14) Ntangu beto kelungisaka mukumba na beto ya “kukumisa bantu yonso balonguki,” mbala mingi beto kekutanaka ti bampasi mpi kevandaka ti mawi ya mefwanana ti Yeremia. (Mat. 28:19) Kutadila masonama na yandi tasadisa beto na kusala mbote-mbote kisalu na beto ya kusamuna ti kivuvu mpi kikesa.

3. Inki mutindu beto tasadila mambu yankaka yina kele na mukanda ya Yeremia?

³ Mambu Yina Kele na Kati: Baverse ya mfunu yina beto fwete tanga ntangu beto kelonguka kele na bisono ya kutengama. Na nsuka ya kitini ya kulonguka ya konso mposo kele ti ngyufula mosi to bangyufula zole ya mfunu ya kele na mukubu ya ndombe mingi, mpi yo kebenda dikebi na malongi ya mfunu ya kapu yina. Ntwadisi ya kulonguka tayula bawi bangyufula yai na mvutukila. Mukanda yai kele ti bifwanisu ya kitoko, mpi ntembe kele ve nde bampangi tasepela kupesa bakomantere na bifwanisu yango.

4. Inki mutindu beto lenda baka mambote ya mingi na kulonguka ya mukanda ya Yeremia?

⁴ Sambu na kubaka mambote ya mingi, yidika na ntwala dilongi yina beno talonguka. Sosa bangindu yina beno lenda sadila na luzingu na beno mpi na kisalu ya kusamuna. Pesa bakomantere ya mingi. Ti lusadisu ya Yehowa, Yeremia kulungisaka mukumba na yandi na kyese mingi. (Yer. 15:16) Bika nde kulonguka mukanda yai ya mpa kusadisa beto na kusala kisalu na beto bonso Yeremia.