Site Internet na Beto​—Sadila Yo na Kisalu na Nge ya Kusamuna

Siamisa Bantu na Kusadila Site Internet Yai: Bantu ya nkaka yina ke vandaka na keti​-keti ya kusolula ti beto to ya kundima mikanda na beto, ke ndimaka kukotaka na site jw.org na banzo na bo sambu na kusosa kuzaba Bambangi. Yo yina, zabisa bantu ya nkaka Site Internet yai na konso dibaku yina ta monana.

Pesa Mvutu na Bangiufula: Bantangu ya nkaka muwi mosi, disongidila muntu mosi ya me monisa mpusa to yina beto me zaba mbote, lenda yula beto ngiufula na yina me tala Bambangi ya Yehowa to balukwikilu na beto. Sadila telefone to ordinatere sambu na kupesa yandi mvutu mbala mosi. Mbala mingi yo ke vandaka mbote na kutanga mbala mosi na Biblia baverse yina bo me vutukila ve bangogo na yo. Kana nge kele ve ti apareyi yina kele na Internet, tendudila yandi mutindu ya kusadila jw.org sambu na kuzwa mvutu yandi mosi.​—Bweta na “Malongi ya Biblia,” na nima bweta na “Bamvutu na Bangiufula ya Biblia,” to bweta na “Mambu ya Me Tala Beto,” mpi na “Bangiufula Yina Bantu Ke Yulaka Mingi.”

Tindila Muntu Mosi ya Nge Me Zaba Mukanda to Disolo Mosi: Tindila muntu na e-mail mukanda mosi ya nge me baka na Internet, ya kele na format PDF to EPUB. To baka mukanda mosi ya kuwidikila mpi kotisa yo na CD. Konso ntangu ya nge ke tindila muntu yina me bakaka ntete ve mbotika mukanda, kamukanda, to zulunalu ya mvimba na Internet, nge lenda sonika yo na rapore na nge ya nsuka ya ngonda. Nge fwete tindila ve muntu mukanda kukonda kusonika zina na nge to kuvukisa mikanda mingi kumosi. Nge fwete kotisa mpi ve mikanda yango na site Internet ya nkaka.​—Bweta na “Mikanda.”

Songa Bansangu ya Mpa ya Me Tala Bambangi ya Yehowa: Yo ta sadisa balongoki ya Biblia mpi bantu ya nkaka yina nge ke kwendaka kutala na kuyedisa ntonda sambu na kisalu na beto yina ke salamaka na ntoto ya mvimba mpi bumosi na beto ya Bukristu. (Nk. 133:1)​—Bweta na “Bansangu.”

[Tablo ya kele na lutiti 5]

(Sambu na kumona mambu yonso, tala mukanda)

Meka Yo

1 Bweta na “Mikanda,” mpi pona mikanda yina nge ke zola kubaka; na nima, bweta kisika yina nge lenda baka mukanda ya kutanga to ya kuwidikila.

2 Bweta na “MP3” sambu na kumona disolo mosi-mosi. Bweta na ntu-diambu ya disolo sambu na kubaka yo to ▸ kuwidikila yo na Internet.

3 Pona ndinga ya nkaka na kisika bo me sonika “Monisa,” kana nge ke zola kubaka mukanda na ndinga yango.