Beto Landa Mbandu ya Baprofete—Yonasi
1. Yonasi vandaka ti nki bikalulu ya mbote?
1 Inki ke kwisilaka nge na mabanza kana nge yindula profete Yonasi? Bantu ya nkaka lenda mona yandi bonso muntu ya boma-boma to ya ntima-ngolo. Kansi, yandi monisaka pwelele kikalulu ya kudikulumusa, kikesa, mpi mpeve ya kuditambika. Inki mutindu beto lenda landa “mbandu” ya bikalulu ya kitoko ya Yonasi?—Yak. 5:10.
2. Inki mutindu beto lenda landa mbandu ya kudikulumusa ya Yonasi?
2 Kudikulumusa: Na luyantiku, Yonasi tinaka teritware ya bo pesaka yandi mpi kwendaka na ndambu ya nkaka. Yo ke yitukisa ve sambu bantu ya Asiria vandaka nku mpenza mpi bantu vandaka kubinga Ninive nde ‘bwala ya menga.’ (Nah. 3:1-3) Ata mpidina, Yehowa pesaka Yonasi disipline mpi yandi ndimaka mukumba yina na kudikulumusa yonso ntangu bo pesaka yandi yo na dibaku ya zole. (Bing. 24:32; Yon. 3:1-3) Katula keti-keti ya luyantiku, yandi salaka lukanu ya Yehowa. (Mat. 21:28-31) Keti beto ke vandaka mpi ti lukanu ya kusamuna nsangu ya mbote bonso yandi, ata bo me pesa beto disipline to teritware mosi ya mpasi?
3. Inki mambu ya kisalu na beto ya kusamuna ke lomba kikesa mpi mpeve ya kuditambika?
3 Kikesa mpi Kuditambika: Ntangu Yonasi bakisaka nde desizio na yandi ya mbi tulaka luzingu ya bantu ya maswa na kigonsa, yandi ndimaka na kutambika luzingu na yandi. (Yon. 1:3, 4, 12) Na nima, ntangu yandi vandaka kulungisa mukumba na yandi na Ninive, yandi tambulaka na kati-kati ya mbanza, ziku sambu na kusosa kisika ya mbote ya kuzabisa lusambisu ya Yehowa. Yo vandaka mambu yina lombaka nde profete ya kikesa ya Nzambi kusala, kansi ve ya boma-boma! (Yon. 3:3, 4) Ebuna beto bubu yai? Beto kele na mfunu ya kikesa ya ke katuka na Nzambi sambu na kuta kimbangi kukonda boma ntangu bantu ke telamina beto. (Bis. 4:29, 31) Beto fwete vanda na mpeve ya kuditambika sambu na kusadila ntangu mpi makuki na beto na kisalu ya kusamuna.—Bis. 20:24.
4. Sambu na nki beto fwete baka ntangu ya kuyindulula bambandu ya mbote ya baprofete ya Yehowa?
4 Konso ntangu ya nge ke tanga disolo ya profete mosi ya Yehowa, nge ta bakila yo mambote kana nge ke kudimona nde nge kele na kisika mambu yina salamaka. Kudiyula nde: Inki mu zolaka kusala? Inki mutindu mu lenda landa bikalulu na yandi ya mbote na luzingu na munu? (Baeb. 6:11, 12) Na bilumbu ke kwisa, masolo ya Kisalu na Beto ya Kimfumu ta tubila malongi mingi ya mfunu yina beto lenda baka na baprofete ya nkaka ya kwikama ya Yehowa.