Keti Nge Kele ti Luzolo ya Kusala Bansoba?
1. Bansoba ya ke salama na nsi-ntoto ke lomba nde beto sala mpi nki?
1 Na 1 Bakorinto 7:31, Biblia ke fwanisa nsi-ntoto ti kisika mosi ya teyatre yina bansonga ti bantu ya ke sala bansonga ke soba ntangu yonso. Bansoba ya ke salama na nsi-ntoto ke lomba nde beto sala mpi bansoba mbala na mbala na bametode na beto ya kusamuna, manaka na beto, mpi na bangogo na beto ya kukotila na masolo. Keti nge kele ti luzolo ya kusala bansoba?
2. Sambu na inki beto fwete sala bansoba sambu na kulanda kutambula kumosi ti organizasio?
2 Bametode na Nge ya Kusamuna: Banda ntama, dibundu ya Bukristu ke vandaka ya kuyilama sambu na kusala bansoba. Ntangu Yezu tindaka balongoki na yandi na kwenda kusamuna na mbala ya ntete, yandi songaka bo na kubaka ve mwa-saki ya kunatila madia to mbongo. (Mat. 10:9, 10) Kansi na nima, yandi sobaka bantuma yai sambu na kusadisa bo na kudibongisa sambu na kimbeni yina vandaka kuvingila bo mpi kupanzana ya kisalu ya kusamuna na bateritware ya nkaka. (Luka 22:36) Na bamvu-nkama ya me luta, organizasio ya Yehowa me sadilaka bametode ya kuswaswana sambu na kusamuna,—mu mbandu, bakarte ya kimbangi, baradio, mpi bakaminio yina vandaka ti ba oparlere—na kutadilaka bampusa ya ntangu yina. Sambu na bisika mingi bubu yai, bantu ke vandaka ve mingi na banzo, bo me bendaka dikebi na beto mingi na kutaka kimbangi na bisika yina bantu kele, mpi na mabaku ya mbote, katula kisalu ya nzo na nzo. Bo ke siamisaka beto mpi na kusamuna nzo na nzo na bankokila, kana bantu ke lutisaka kilumbu ya mvimba na kisalu. Mutindu pusu-pusu ya zulu ya Yehowa ke soba nzila na yo, keti nge ke landa kutambula kumosi ti yo?—Ezek. 1:20, 21.
3. Inki mutindu kusala bansoba ke sadisaka beto na kubuta bambuma mingi na teritware?
3 Bangogo na Nge ya Kukotila na Masolo: Inki mambu ke yangisa bantu ntangu yai na kisika yina nge ke zingaka? Mambu ya mbongo? Dibuta? Bitumba? Yo ke mbote kibeni na kuzaba mambu ya ke yangisa bantu mpi yina ke salama na teritware na beto; mpidina beto lenda yidika bangogo ya me fwana ya kukotila na masolo. (1 Bak. 9:20-23) Kana muwi me monisa bangindu na yandi, yo ta vanda mbote na kusoba disolo na beto sambu yo wakana ti bampusa na yandi, na kisika ya kupesa kaka mvutu mpi kulanda kutuba mambu yina beto yidikaka.
4. Sambu na nki beto fwete sala bansoba nswalu?
4 Kubika fioti, kitini ya nsuka ya “nsonga” ya insi-ntoto yai ta mana, mpi mpasi ya nene ta yantika. “Ntangu ya me bikala kele fioti.” (1 Bak. 7:29) Yo ke mfunu kibeni na kusala bansoba kukonda kusukinina; mpidina beto lenda sala mingi na ntangu yai ya me bikala!