Beto Landa Mbandu ya Baprofete—Amosi
1. Sambu na nki mbandu ya Amosi lenda pesa beto kikesa?
1 Keti nge me kudiwaka dezia nde nge me fwana ve na kusamuna sambu nge me longukaka mingi ve to nge me yelaka ve na dibuta mosi ya lukumu? Kana mpidina, mbandu ya Amosi lenda pesa nge kikesa. Yandi vandaka ngungudi ya mameme mpi yandi vandaka kusala kisalu ya bilanga na nsungi mosi buna konso mvula. Ata mpidina, Yehowa pesaka yandi ngolo ya kusamuna nsangu mosi ya mfunu mingi. (Amo. 1:1; 7:14, 15) Mutindu mosi bubu yai, Yehowa ke sadilaka bantu ya me longukaka mingi ve mpi ya kele ti lukumu mingi ve. (1 Bak. 1:27-29) Inki malongi ya nkaka beto ke baka na luzingu ya profete Amosi, yina lenda sadisa beto na kisalu na beto ya kusamuna?
2. Sambu na nki beto lenda bikala ya kwikama na ntwala ya mbangika na kisalu na beto ya kusamuna?
2 Bikala ya Kwikama na Ntwala ya Mbangika: Ntangu Amasia, nganga-Nzambi yina vandaka kusambila kiteki ya ngombe na kimfumu ya bikanda kumi ya Izraele yina vandaka na nordi, waka Amosi ke bikula, yandi tubaka nde: ‘Katuka awa! Vutuka na bwala na nge! Beto kele ti dibundu na beto!’ (Amo. 7:12, 13) Sambu yandi lombaka Ntotila Yeroboami na kubuyisa kisalu ya Amosi, Amasia sobaka nsangu ya profete. (Amo. 7:7-11) Kansi Amosi waka ve boma ata fioti. Bubu yai, bamfumu ya nkaka ya mabundu ke sosaka lusadisu na bamfumu ya luyalu sambu na kuniokula bansadi ya Yehowa. Kansi, Yehowa ke ndimisa beto nde ata munduki mosi ve ya bo me sala sambu na kufwa beto ta nunga kimakulu.—Yez. 54:17.
3. Inki kele bitini zole ya nsangu ya beto ke zabisaka bubu yai?
3 Zabisa Lusambisu ya Nzambi mpi Balusakumunu Yina Ke Kwisa: Ata Amosi bikulaka na mukanda ya Biblia yina kele ti zina na yandi nde, Nzambi ta pesa makanda kumi ya kimfumu ya Izraele ndola, yandi pesaka mpi lusilu yai ya Yehowa na nsuka: Bantu ya Izraele ta vutuka diaka na bwala na bo mpi bo ta baka balusakumunu ya mingi. (Amo. 9:13-15) Beto mpi, beto ke zabisaka “kilumbu ya kusambisa” ya Nzambi yina ke kwisa; kansi yo kele kaka kitini ya ‘nsangu ya mbote ya Kimfumu’ yina beto fwete zabisa. (2 Pie. 3:7; Mat. 24:14) Yehowa ta fwa bantu ya mbi na Armagedoni, mpi na nima, yandi ta kumisa ntoto paladisu.—Nk. 37:34.
4. Inki ke ndimisa beto nde beto lenda sala luzolo ya Yehowa?
4 Ntembe kele ve nde, kusamuna nsangu ya Kimfumu na nsi-ntoto yai ya kele ti bambeni mingi, ke tulaka lukanu na beto na kumekama mpi ke pusaka beto na kuyambula kudipesa na beto mpi kusala luzolo ya Yehowa. (Yoa. 15:19) Ata mpidina, beto ke ndima mpenza nde Yehowa ta landa na kupesa beto ngolo ya kusala luzolo na yandi, mutindu yandi pesaka Amosi.—2 Bak. 3:5.