Mutindu ya Kuyidika Bangogo ya Mbote Sambu na Kuyantika Masolo
1. Sambu na nki bangogo ya mbote ya kuyantika masolo kele mfunu?
1 Kaka mutindu kumeka madia ya ntomo ke pesaka nzala ya kudia madia ya bo ke lamba, bangogo ya mbote ke kangulaka nzila na kuyantika masolo ya Biblia. Bangogo ya mbote sambu na kuyantika masolo lenda swaswana na bunda mpi na mambu ya muntu ke tuba. Bonso madia ya ntomo, yo ke lombaka mbala na mbala kuyindula mpi kuyidika yo na ntwala. (Bing. 15:28) Inki ke salaka nde bangogo sambu na kuyantika masolo kuvanda mbote?
2. Inki mutindu beto lenda yidika bangogo ya kuyantika masolo yina ke benda dikebi?
2 Pona Masolo ya Ke Benda Dikebi: Bangogo na beto ya luyantiku lenda benda dikebi, to lenda pusa muwi na kuzenga disolo. Yo yina, ntangu beto ke yidika bangogo yango, beto fwete yindula bampusa ya bantu ya teritware na beto. Keti bo ke sepelaka ti luyalu mosi ya mbote, luzingu ya dibuta ya kiese, to nde bamvita kusuka? Mbala mingi, bantu ke zolaka kupesa dibanza na bo, yo yina yidika ngiufula yina ta pusa muntu na kuyindula mpi na kupesa dibanza na yandi. Keti nge lenda sadila mbandu mosi ya bangogo ya kuyantika masolo yina kele na Kisalu na Beto ya Kimfumu mpi kuwakanisa yo na teritware na beno? Sambu na nki ve bantangu ya nkaka kusala bansonga ya ke monisa mutindu ya kusadila mwa bangogo ya kuyantika masolo na nkokila ya Lusambu ya Dibuta na beno?
3. Inki mutindu beto lenda wakanisa bangogo na beto ya luyantiku ti binkulu mpi balukwikilu ya bantu ya teritware na beto?
3 Tadila Binkulu mpi Balukwikilu ya Bantu: Na bisika mingi, beto ke zabisaka bantu kikuma ya viziti na beto. Kansi na bisika ya nkaka, kana munzenza me yula ntete ve mavimpi ya bawi mpi ziku me yantika kuta masolo, yo ke monisaka kukonda luzitu. Na bisika ya nkaka diaka, kuzaba balukwikilu ya bantu ke pesaka beto nzila ya kutuba kukonda mpasi masolo ya Biblia na bangogo na beto ya luyantiku. (Bis. 2:14-17) Kansi, na kisika yina bantu kele ve na dibundu ya Bukristu, to bo kele ve ata na dibundu mosi, yo lenda vanda mbote na kutubila Biblia na mvutukila ya mpa, na kisika ya kutubila yo na mbala ya ntete.—Bis. 17:22-31.
4. Bangogo na beto ya luyantiku fwete vanda nki mutindu sambu yo benda dikebi na kuyantika masolo?
4 Bangogo ya Luyantiku: Yidika mbote-mbote bangogo na nge ya luyantiku. Mbala mingi, bansa ya nkufi mpi ya pete ke vandaka mbote kuluta. Mutindu na beto ya kuyantika masolo ke vandaka mfunu mingi. Tuba ti kiese. Kuseka na masonga yonso bonso nduku ke monisaka dikebi ya masonga yina beto ke tudilaka muwi. Kana beto sadila mabanza yai, yo ta sadisa beto na kuyidika bangogo ya mbote sambu na kuyantika masolo yina ta pesa bantu ya teritware na beto kikesa na kudia na “mesa ya Yehowa.”—1 Bak. 10:21.