Baeksperiansi

◼ Australie: John, muntu mosi ya me longukaka, vandaka kukwenda na nzo-nzambi yantika bumwana kansi yandi kumaka “muntu yina ke ndimaka ve ata fioti nde Nzambi kele.” Mupasudi-nzila mosi bikilaka yandi kamukanda La vie a-t-elle été créée ? mpi na viziti yina landaka, yandi bikilaka yandi kamukanda L’origine de la vie. Mupasudi-nzila landaka na kuyedisa mpusa na yandi na kunatilaka yandi bazulunalu yonso ya mpa yina vandaka kutubila lugangu mpi bambikudulu ya Biblia. Ntangu yandi yindulaka nde John me yantika kubakisa, yandi pesaka yandi mukanda La Bible : Parole de Dieu ou des hommes ? Na nima ya kutanga yo, John tubaka nde yandi vandaka “muntu yina ke kwikilaka ve nde Nzambi kele.” Ebuna, mupasudi-nzila yantikaka kulonguka Biblia ti yandi na mukanda Biblia Kelongaka, mpi songaka John paragrafe 8 na lutiti 20 mpi baparagrafe 13-16 na balutiti 23-24. Baverse yina kele na disolo yai yitukisaka John mingi mpi yandi tubaka nde: “Mbala ya nkaka mono fwete tadila Biblia mutindu ya nkaka.”

◼ Mexique: Muntu mosi zabisaka nsamuni mosi nde yandi ke kwikilaka ve nde Biblia me pemamaka na Nzambi. Nsamuni yina pesaka yandi nzikisa ya ke monisa nde Biblia me pemamaka na Nzambi. Mambu ya bo vandaka kulonguka na Biblia simbaka ntima na yandi na nima ya mwa ntangu. Yandi sobaka luzingu na yandi mingi-mingi ntangu yandi longukaka minsiku ya Nzambi. Yandi zabisaka nsamuni yina nde: “Ntangu beto yantikaka kulonguka Biblia kumosi, yo vandaka kumonana bonso nde bandongisila yina me katuka na mikanda yonso ya nkaka mpi yo vandaka ve ti bupusi na luzingu na mono. Kansi bubu yai, kana beto me tanga mambu ya kele na Biblia mingi-mingi bandongisila na yo ya me tala bikalulu ya mbote, yo ke simbaka kibeni ntima na mono.”

◼ États-Unis: Ntangu bankwelani vandaka kuta kimbangi ya sipesiali na mbanza ya nene, bo kutanaka ti nkento mosi yina katukaka na Taïwan mpi vandaka kukwikila na Nzambi, kansi yandi vandaka kuyindula nde Biblia kele mukanda ya Mindele. Yandi pusanaka na mesa ya mikanda sambu yandi vandaka kudiwa kukonda mfunu ata yandi vandaka ti mbongo mingi. Yandi vandaka kukwikila nde Biblia ta sadisa yandi na kuzwa lukanu na luzingu. Bankwelani yina yantikaka kulonguka Biblia ti yandi na mukanda Biblia Kelongaka nzila mosi ti kamukanda La paix et le bonheur durables : comment les trouver. Na kisika ya kulonguka kapu ya 2 ya mukanda, bo longukaka kitini ya kamukanda yina kele na ntu diambu «Un guide bénéfique pour tous les humains.» Na nima ya kutadila baparagrafe sambanu ya ntete na kitini yina, nkento yina sepelaka mingi na kumona nde Biblia kele mukanda mosi kaka ya me luta mikanda ya nkaka ya ke tubilaka mambu ya Nzambi. Na nima ya kutadila bambikudulu ya Biblia yina me lunganaka, yandi tubaka nde: “Kele ve ti mukanda ya nkaka yina mono lenda yindula nde yo kele siki-siki bonso Biblia!”

◼ Japon: Muntu mosi zabisaka nsamuni nde yandi ke kwikilaka ve na Nzambi, kansi nsamuni yina landaka kutala yandi, mpi kusolula ti yandi masolo ya Réveillez-vous ! na ntu-diambu: «Hasard ou conception ?» Malembe-malembe muntu yango sobaka mabanza na yandi mpi yantikaka kundima nde Ngangi lenda vanda. Bubu yai, yandi ke kwikilaka nde Nzambi kele mpi bo ke longukaka na nsadisa ya kamukanda Nsangu ya Mbote ya Mekatuka na Nzambi!

◼ Canada: Mpangi-nkento pesaka nkento mosi bazulunalu ya mpa, yina basikaka na nzo sambu na kukota na kamio na yandi. Ntangu mpangi-nkento vutukilaka yandi, nkento yina buyaka na ntima mosi mpi zabisaka yandi nde yo me sepedisa yandi ve mpi yandi ke kwikilaka ve na Nzambi. Mpangi-nkento bakaka lukanu ya kunatila yandi kamukanda Une vie pleinement satisfaisante : Comment ? Ntangu mpangi-nkento monaka nkento yango na nzo, yandi songaka yandi nde mono me zaba nde nge ke kwikilaka ve na Nzambi, kansi mono yindulaka nge sambu mono me zaba nde nge ke sansaka bana nge mosi. Yandi songaka nkento yango paragrafe 6 na lutiti 4 ya kamukanda yina, yina vandaka kutubila kisika ya kuzwa bandongisila ya mbote. Na nima, mpangi-nkento siamisaka yandi na kutanga dibanza ya kele na dilongi ya 2 yina ke tadila kusansa bana. Nkento yango vandaka na kiese ya kubaka kamukanda.