Beto Landa Mbandu ya Baprofete—Mishe
1. Yo lenda vanda nde Mishe kudiyulaka nki ngiufula, kansi sambu na nki kisalu na yandi ya kusamuna vandaka ve ya mpamba?
1 ‘Inki ntangu ngidika ya bima yai ya kubeba ta kuma na nsuka?’ Yo lenda vanda nde profete Mishe yulaka ngiufula ya mutindu mosi ntangu yandi vandaka kuzabisa bansangu ya lusambisu ya Yehowa na bimfumu ya Izraele mpi ya Yuda. Ata mpidina, kisalu na yandi ya kusamuna vandaka ve ya mpamba. Na mvu 740 N.T.B., ntangu Mishe vandaka na luzingu, mambu ya Yehowa tubaka sambu na Samaria lunganaka. (Mis. 1:6, 7) Na nima, bo fwaka Yeruzalemi na mvu 607 N.T.B. (Mis. 3:12) Inki mutindu beto lenda landa mbandu ya Mishe ntangu beto ke vingila kulungana ya balusambisu ya Yehowa na bilumbu na beto?
2. Inki mutindu mpi sambu na nki beto ke monisaka ntima-nda ntangu beto ke vingila kilumbu ya Yehowa?
2 Beto Vanda Ntima-Nda: Mishe sonikaka nde: “Mono ke tala kaka Mfumu Nzambi. Mono ke [vingila, NW] nde yandi ta gulusa mono.” (Mis. 7:7) Ya kieleka, Mishe yambulaka ve kulonga sambu na kuvingila nde nsuka kukwisa. Mishe vandaka ti kisalu mingi sambu yandi vandaka profete ya Yehowa. Sambu beto ke vingila kilumbu ya Yehowa, beto fwete vanda ti “bikalulu ya santu mpi kusala bisalu ya ke monisa kukangama na Nzambi.” (2 Pie. 3:11, 12) Ntima-nda ya Yehowa ke pesaka bantu dibaku ya kubalula ntima. (2 Pie. 3:9) Yo yina, beto ke zitisaka lukebisu ya Nzambi ya kulanda mbandu ya baprofete ntangu beto ke monisaka ntima-nda.—Yak. 5:10.
3. Sambu na nki beto fwete lomba Yehowa mpeve santu na yandi?
3 Beto Tula Ntima na Ngolo ya Yehowa: Ata Mishe salaka kisalu mosi ya mpasi, yandi tudilaka Yehowa ntima sambu Yehowa kupesa yandi ngolo ya kulungisa yo. (Mis. 3:8) Yehowa ke zaba nde beto kele ti mfunu ya ngolo na yandi. Yo yina, na Biblia Yehowa ke siamisaka beto na kulomba ngolo na yandi. Na luzolo yonso, yandi ke pesaka ngolo na bantu yina me lemba sambu bo lungisa mikumba na bo ya kimpeve. (Nk. 84:6, 8; Yez. 40:28-31) Na luzingu na nge, keti Yehowa me pesaka nge dezia ngolo sambu na kusala kisalu ya santu? Keti nge ke sambaka Yehowa mbala na mbala sambu na kulomba lusadisu ya mpeve santu na yandi?—Luka 11:13.
4. Inki mbandu ya kuluta mbote luzingu ya Mishe ke pesa beto bubu yai?
4 Mishe tulaka luzolo ya Nzambi na kisika ya ntete na luzingu na yandi. Ata bantu ya nziunga na yandi vandaka ti bikalulu ya kubeba, yandi bakaka lukanu ya kubikala ya kwikama. Mutindu mosi, kwikama na beto ke mekamaka konso kilumbu. Yo yina, bika beto kumisa ngolo lukanu na beto ya ‘kutambula na zina ya Yehowa Nzambi na beto tii kuna, ee mvula na mvula.’—Mis. 4:5, NW.