Video ya Mpa Sambu na Kuyantika Kulonguka Biblia ti Bantu

Bantu mingi ke tala video mosi ya nkufi na jw.org yina kele ti ntu-diambu Pourquoi étudier la Bible ? Bo me basisa video yai sambu na kupusa bantu yina ke sepelaka na kieleka na kundima kulonguka Biblia ya ofele. Nge lenda tala video yango kana nge bweta kisika yina bo me sonika nde “Cours bibliques gratuits” yina kele na nsuka ya lutiti ya luyantiku to scanner kidimbu yai (QR) yina kele na lutiti ya nsuka ya batrakiti yai ya mpa. Bangindu yai na nsi lenda sadisa beto na kusadila video yai mbote.

• Ntangu beto ke sala bamvutukilu ya mpa, zabisa muwi nde: “Keti mu lenda songa nge video mosi ya nkufi yina ke monisa mutindu nge lenda baka bamvutu na bangiufula ya Biblia?” Kana yandi me ndima, songa yandi video yango na telefone to na ordinatere na yandi.

• Kana beto me pesa muntu trakiti mosi ya mpa ntangu beto ke ta kimbangi ya dibaku ya mbote to na bisika ya bantu mingi, beto songa yandi kidimbu QR mpi beto siamisa yandi na kusadila (scanner) yo na telefone na yandi. Sambu na bandinga mingi, kidimbu yai (QR) ke nata mbala mosi na video yina kele na site Internet na beto, nge lenda songa yandi video yango na telefone na nge.

• Tela banduku ya kisalu, ya nzo-nkanda, bampangi ya kinsuni mpi bantu ya nkaka yina nge me zaba mambu ya me tala video yango. Na nima, zabisa bo nde nge ta songa bo yo to nge ta tindila bo adresi ya Internet yina ke nata mbala mosi na video yango mpi siamisa bo na kutala yo na batelefone na bo mosi.

Kana beto sadila ngidika yai ya mpa, beto lenda yantika kulonguka Biblia ti bantu mingi, mpi kusadisa bantu yina kele na “nkadilu ya mbote sambu na kubaka luzingu ya mvula na mvula.”​—Bis. 13:48.