Augusti Ta Vanda Ngonda Mosi ya Mfunu Sambu na Kisalu!

1. Sambu bamvula 100 ke zola kulunga banda Kimfumu ya Nzambi yantikaka kuyala, nki kampanye ya sipesiali ta salama na ntoto ya mvimba?

¹ Bamvula 100 ke zola kulunga banda Kimfumu ya Nzambi yantikaka kuyala. Yo me fwana mpenza nde beto pesa Yehowa lukumu na kampanye mosi ya sipesiali! Na ngonda ya Augusti, beto ta kabula trakiti mosi ya mpa na ntoto ya mvimba yina kele ti ntu-diambu Inki Kisika Beto Lenda Baka Bamvutu na Bangiufula ya Mfunu ya Luzingu? Trakiti yai ke siamisa batangi na kusadila Biblia sambu na kubaka bamvutu mpi ke tendula mutindu jw.org lenda sadisa bo.

2. Inki mutindu beto lenda vukana sambu na ‘kutula milolo ya ngolo ya kupesa Yehowa lukumu’ yina ta kwenda tii na Augusti?

² Milolo ya Ngolo ya Kupesa Lukumu: Sambu na kusadisa bansamuni na kuyedisa kisalu na bo ya kusamuna, bo me baka ngidika mosi ya sipesiali sambu na bansamuni yina ta zola kusala kisalu ya kimupasudi-nzila nsadisi na ngonda ya Augusti. Na ngonda yina, bansamuni ya me bakaka mbotika yina ta zwa dibaku ya kusala kisalu ya kimupasudi-nzila nsadisi ta pesa bangunga 30 yina bo ke lombaka. Sambu ngonda ya Augusti ta vanda ti ba Kitanu, ba Sabala mpi ba Lumingu tanu, bansamuni yina ke salaka kisalu ya kinsuni to bayina ke kwendaka na nzo-nkanda ta kuka kusala kisalu ya kimupasudi-nzila nsadisi. Kana nge kele ti longoki ya Biblia to mwana yina ke lungisa malombo ya kukuma nsamuni, zabisa mbala mosi mutambusi ya kimvuka ya bankuluntu. Yo ta vanda diambu mosi ya ke pesa kikesa kana bampangi yai me kuma bansamuni na ngonda yai ya mfunu! Ata bapasudi-nzila mingi ya ntangu yonso ke bakaka konzie na ngonda ya Augusti ntangu bo ke lungisaka bangunga yina bo ke lombaka bo konso mvula, bo lenda yidika manaka na bo sambu na kusala mingi na kampanye yai ya sipesiali. Ntangu yai, mabuta lenda tadila mutindu bo ta vukana sambu na ‘kutula milolo ya ngolo ya kupesa Yehowa lukumu’ yina ta kwenda tii na Augusti.​—Esd. 3:11, NW; Bing. 15:22.

3. Inki kivuvu beto kele ti yo sambu na kampanye yai ya sipesiali?

³ Ata beto ke salaka dezia bakampanye ya mutindu yai, beto ke tula kivuvu nde kampanye yai ta vanda mfunu mingi. Beto lenda kuma ti ntalu ya mpa ya bansamuni, ya bangunga, mpi ya bapasudi-nzila nsadisi na Augusti. Sambu beto ke pusana na nsuka ya mvula ya kisalu 2014, bika nde Yehowa kusakumuna bikesa ya bansadi na yandi ya ntoto ya mvimba na kukumisa ngonda ya Augusti ngonda mosi ya kuluta mfunu ya kuta kimbangi!—Mat. 24:14.