Mvu-Nkama ya Kusamuna Kimfumu!

1. Bo siamisaka bansadi ya Yehowa na kusala nki na mvu-nkama yai ya ke zola kulunga?

¹ Mpangi Rutherford tubaka bangogo yai ya ke pesa kikesa bamvula nkama ke zola kulunga: “Beno tala, Ntotila ke yala! Beno bantu ke zabisa nsangu na yandi. Yo yina beno samuna, beno samuna, beno samuna, Ntotila ti kimfumu na yandi.” Na nsadisa ya bangogo yai, yandi siamisaka bansadi ya Yehowa na kulonga nsangu ya Kimfumu na bisika yonso. Mpi yai kele mambu yina beto ke salaka! Bonso Bakristu ya mvu-nkama ya ntete, beto ke longaka nsangu ya mbote ya Kimfumu “na lugangu ya mvimba yina kele na nsi ya zulu.” (Bakol. 1:23) Kana beto yindula diaka mvu-nkama yai ya me luta, nki mambu beto salaka sambu na kusamuna Kimfumu ya Nzambi? Sambu bamvula 100 ke zola kulunga tuka Kimfumu ya Nzambi yantikaka kuyala, nki mutindu beto lenda landa na kusamuna Kimfumu?

2. Inki mutindu mikanda na beto ke samunaka Kimfumu ya Nzambi?

² Yibuka Diaka: Tuka bamvula mingi, mikanda na beto ke samunaka Kimfumu ya Nzambi. Banda na mvu 1939, zulunalu na beto ya ntete-ntete ke vandaka ti ntu-diambu: Nzozulu ya Nkengi Kesamunaka Kimfumu ya Yehowa. Zulunalu yai ke tubilaka mbala na mbala Kimfumu mpi mambu yina yo ta sala. Zulunalu Réveillez-vous ! ke monisaka nde Kimfumu ya Nzambi kele kivuvu mosi kaka sambu na bantu. Bubu yai, yo kele mbote kibeni mutindu bo ke balula bazulunalu yai zole na bandinga mingi mpi ke kabula yo na ntoto ya mvimba!​—Kus. 14:6.

3. Inki ba metode beto me sadilaka sambu na kusamuna Kimfumu?

³ Bansadi ya Yehowa me sadilaka ba metode mingi sambu na kusamuna Kimfumu. Na bilumbu ya me luta, beto vandaka kusadila bakamio yina kele ti ba oparlere, baradio mpi bafono. Na ntangu yina bansamuni ya Kimfumu vandaka mingi ve, ba metode yai sadisaka beto na kumwanga nsangu ya mbote na bantu mingi. (Nk. 19:5) Na bamvula yai, beto ke basisaka masolo na jw.org sambu na kusamuna Kimfumu na bantu mingi, yo vanda bantu yina ke zingaka na bansi yina bo me buyisaka kisalu na beto.

4. Inki bangidika ya sipesiali beto me bakaka?

⁴ Bansadi ya Yehowa me bakaka mpi bangidika ya sipesiali sambu na kumwanga nsangu ya Kimfumu. Mu mbandu, na luyantiku ya mvu 1995, beto salaka bikesa sambu na kusala mingi na kisalu ya nzo na nzo, na ba parke, na ba parkingi mpi na bisika ya mumbongo. Ntama mingi ve, beto me katuka kubaka bangidika ya kuta kimbangi ya spesiali na bisika ya bantu mingi na bambanza ya nene na ntoto ya mvimba. Diaka, mabundu mingi ke ta kimbangi na bisika ya bantu mingi mutindu bo ke tula bashario mpi bamesa na bisika yina bantu ke lutaka mingi na teritware na bo. Ya kieleka, kisalu ya nzo na nzo kele metode na beto ya ntete-ntete sambu na kusamuna nsangu ya Kimfumu.​—Bis. 20:20.

5. Mvula ya kisalu ya mpa ta pesa bantu mingi nki mabaku?

⁵ Kudibongisa Sambu na Bilumbu ya Ke Kwisa: Ntangu beto ta yantika mvula ya kisalu ya mpa na Septembri, bantu mingi ta sala kisalu ya kimupasudi-nzila ya ntangu yonso. Keti nge mpi ta sala yo? Kana nge ta sala ve, keti nge lenda sala kisalu ya kimupasudi-nzila nsadisi mbala na mbala? Yo vanda nge ta sala kisalu ya kimupasudi-nzila to ve, Yehowa ta sakumuna bibansa yonso ya nge ta sala sambu na kusala mingi na kusamuna Kimfumu.​—Mal. 3:10.

6. Sambu na nki ngonda ya Oktobri 2014 ta vanda ngonda mosi ya sipesiali?

⁶ Kimfumu ya Nzambi ta lungisa bamvula 100 na ngonda ya Oktobri 2014. Yo yina, nimero ya bantu yonso ya Nzozulu ya Nkengi ya ngonda ya Oktobri ta tubila Kimfumu ya Nzambi. Yo me fwana mpenza nde beto sala bikesa sambu na kubaka nimero yai mingi. Sambu beto ke vingila bilumbu ya ke kwisa, bika nde beto yonso kulanda na “kuzabisa nsangu ya mbote ya Kimfumu ya Nzambi” na bantu yonso yina ta wa.​—Bis. 8:12.