Bamvutu na Bangiufula na Beno

◼ Keti bansamuni fwete sadila Internet mingi sambu na kuta kimbangi to kulonguka Biblia ti bantu na bansi ya nkaka?

Bansamuni ya nkaka ke sadilaka Internet sambu na kulonguka Biblia ti bantu ya bansi yina bo me buyisaka kisalu na beto to na bansi yina bansamuni kele mingi ve. Na bantangu ya nkaka, yo ke butaka mbuma ya mbote. Kansi, bigonsa kele kana bansamuni ke tindana ba message (ba e-mail) to kana bo ke solula ti bantu ya bansi ya nkaka mbala mosi na nzila ya Internet. (Tala Kisalu na Beto ya Kimfumu ya Yuli 2007, lut. 3.) Sambu lukanu na beto kele ya kulonga bantu ya ntima ya masonga nsangu ya Kimfumu, masolo ya mutindu yai lenda pusa mpangi-bakala to mpangi-nkento na kusolula ti banduku ya mbi to nkutu ba-aposta. (1 Bak. 1:19-25; Bakol. 2:8) Diaka, na bansi yina bo me buyisaka kisalu ya Kimfumu, bamfumu ya luyalu lenda tanga ba message ya beto ke tinda mpi kusolula na nzila ya Internet lenda vanda kigonsa sambu na bampangi ya babakala ti ya bankento ya bansi yango. Yo yina, bansamuni fwete sadila ve Internet sambu na kusosa bantu na bansi ya nkaka sambu bo longa bo nsangu ya mbote.

Kana beto me ta kimbangi ya dibaku ya mbote na muntu ya me katuka na nsi ya nkaka, beto fwete meka ve kuyedisa mpusa na yandi ntangu yandi me vutuka na nsi na yandi. Beto lenda sala yo kaka kana biro ya filiale me pesa beto nswa ya kusala yo. Kansi, beto lenda songa yandi mutindu yandi lenda sadila jw.org sambu na kubaka bansangu ya nkaka to mutindu yandi lenda solula ti biro ya filiale ya nsi na yandi. Beto lenda siamisa yandi na kukwenda na Nzo ya Kimfumu ya kele pene-pene ti kisika ya yandi ke zingaka. Ya kieleka, na bansi ya nkaka Banzo ya Kimfumu ke vandaka ve. Kana muntu yango ke zola nde Bambangi ya nsi na yandi kukwenda kutala yandi, beto fwete fulusa formilere Veuillez suivre l’intérêt (S-43) mpi kupesa yo na sekretere. Sekretere ta kota na jw.org sambu na kutinda formilere yango na filiale ya nsi yina. Biro ya filiale ya ke twadisaka kisalu na nsi ya muntu yina me monisa mpusa ke zaba mbote-mbote mambu ya nsi yina mpi ta zaba mutindu ya kusadisa muntu yango na kimpeve.—Tala Kisalu na Beto ya Kimfumu ya Yuni 2014, lut. 7, mpi ya Novembri 2011, lut. 2.

Kana muntu ya beto ke kulongukaka ti yandi Biblia mbala na mbala me kwenda na nsi ya nkaka to kana beto ke longukaka Biblia mbala na mbala ti muntu na nsi ya nkaka yina beto me zabana ti yandi kaka na Internet, beto fwete landa bantuma ya bo me pesa awa na zulu. Kansi, beto lenda landa na kuyedisa mpusa na yandi tii ntangu bansamuni ya nsi yina ta kwenda kukutana ti yandi. Kana muntu yango ke zingaka na nsi yina bo me buyisaka kisalu na beto, beto fwete keba ngolo ntangu beto ke solula ti yandi mambu ya Biblia na nzila ya mukanda, telefone to apareyi ya nkaka.—Mat. 10:16.