“Bansiku yai . . . Beno Kanga Yo na Ntima na Beno”

Bibuti kele bonso bangungudi. Bo fwete tanina bana na bo sambu bana lenda vila nzila mpi bo lenda kuma na kigonsa. (Bing. 27:23) Inki mutindu bibuti lenda lungisa mukumba yai? Bo fwete lutisa ntangu mingi konso kilumbu na kusolula ti bana na bo sambu bo zaba mambu ya kele na mabanza mpi na bantima na bo. (Bing. 20:5) Diaka, bibuti fwete tunga bana na bo ti bisadilu yina ke bakaka tiya na mpasi sambu na kukumisa lukwikilu ya bana na bo ngolo. (1 Bak. 3:10-15) Video “Bansiku yai . . . Beno Kanga Yo na Ntima na Beno” (Ces paroles devront être sur ton cœur) ke monisa mfunu ya kusala lusambu ya dibuta mbala na mbala. Beno tala yo na dibuta, na nima beno tadila bangiufula yai ya ke landa.

(1) Inki salaka nde dibuta ya mpangi Roman kutula ve dikebi na mambu ya kimpeve? (2) Sambu na nki mpangi Roman nungaka ve ntangu yandi bakaka bangidika ya kusala lusambu ya dibuta na mbala ya ntete? (3) Inki minsiku ya Masonuku lenda sadisa bibuti na kusansa bana na bo mbote? (Kul. 6:6, 7) (4) Inki mambu lenda sadisa bantu ya dibuta na kusolula mbote? (5) Inki bibansa bana ke zolaka nde bibuti na bo kusala? (6) Inki bupusi ya mbote mpangi Martin ti nkento na yandi vandaka ti yo na dibuta ya mpangi Roman? (Bing. 27:17) (7) Inki mambu mfumu ya dibuta fwete yidika na ntwala sambu lusambu ya dibuta kusalama na mutindu ya mbote? (8) Inki mambu mpangi Roman salaka sambu na kutomisa mambu na dibuta na yandi? (9) Sambu na nki yo kele mfunu na kusala lusambu ya dibuta mbala na mbala? (Baef. 6:4) (10) Inki kele mwa mambu ya mfunu ya beno lenda tadila na lusambu ya dibuta? (11) Inki mutindu mpangi Roman vandaka mawete mpi kikesa ntangu yandi vandaka kusadisa Mathias na kubakisa mfunu ya kusala mambu ya mbote? (Yer. 17:9) (12) Inki mutindu mpangi Roman ti nkento na yandi yindulaka ti Rebeka sambu na kusadisa yandi na kubaka lukanu ya mbote na yina me tala kinduku na yandi ti Justin? (Mar. 12:30; 2 Tim. 2:22) (13) Inki mutindu mpangi Roman ti nkento na yandi monisaka lukwikilu ntangu bo salaka bansoba na luzingu na bo? (Mat. 6:33) (14) Inki mutindu video yai ke siamisa bamfumu ya mabuta na kulungisa bampusa ya mabuta na bo na kimpeve? (1 Tim. 5:8) (15) Sambu nge kele mfumu ya dibuta, nki lukanu nge me baka?

NOTI SAMBU NA BAMFUMU YA MABUTA: Bo salaka drame yai na lukutakanu ya distrike ya mvu 2011. Keti nge monaka mfunu ya kutomisa lusambu ya dibuta na nge na ntangu yina? Ebuna bubu yai? Kana yo ke lomba nde nge sala bansoba ya nkaka, beto ke lomba nge na kusamba mpi kusala bansoba sambu dibuta na nge kubaka mambote ya mvula na mvula.—Baef. 5:15-17.