Tula Ntima na Yehowa mpi Sala Mambu ya Mbote

“Kulula ve bantu ya ke salaka mambu ya mbi”

37:1, 2

• Kubika ve nde mambote ya ntangu fioti ya bantu ya mbi kukatula dikebi na nge sambu nge sadila diaka ve Yehowa. Tula mabanza na nge yonso na balusakumunu mpi na balukanu ya kimpeve

“Tula ntima na Yehowa mpi sala mambu ya mbote”

37:3

• Tula ntima nde Yehowa ta sadisa nge kana badute to basusi ke yangisa nge. Yandi ta sadisa nge na kubikala ya kwikama

• Kudipesa mingi na kuzabisa bantu nsangu ya mbote ya Kimfumu ya Nzambi

“Wa kiese mingi kibeni na Yehowa”

37:4

• Sala manaka sambu na kutanga Ndinga ya Nzambi mpi kuyindulula yo ti lukanu ya kusosa kuzaba Yehowa mbote-mbote

“Pesa nzila na nge na Yehowa”

37:5, 6

• Tula ntima yonso na Yehowa sambu yandi ta sadisa nge na kununga konso diambu yina lenda yangisa nge

• Landa na kuvanda ti bikalulu ya mbote kana bo ke menga nge, ke niokula nge, to ke kusila nge makambu

“Vanda pima na ntwala ya Yehowa mpi vingila yandi ti kivuvu”

37:7-9

• Yambula kikalulu ya kusala mambu kukonda kuyindula sambu yo lenda katula nge kiese ti lutaninu ya kimpeve

“Bantu ya kudikulumusa ta baka ntoto”

37:10, 11

• Vanda muntu ya kudikulumusa, mpi vingila na kudikulumusa yonso ntangu yina Yehowa ta katula mambu yonso ya kukonda lunungu yina nge ke kutana ti yo

• Sadisa bampangi Bakristu mpi zabisa bantu yina ke niokwama na mabanza lusilu ya nsi-ntoto ya mpa ya Nzambi yina me kuma pene-pene sambu na kupesa bo kikesa