Keti Ndinga ya Nzambi Me Sobaka?

Bantu mingi ke kudiyulaka kana Ndinga ya Nzambi me sobaka. Profete Yezaya tubaka nde Ndinga ya Nzambi ke “zingaka kimakulu.” (Yezaya 40:8) Inki mutindu beto lenda ndima nde bo taninaka mbote balusilu ya Nzambi?

Nzambi kele ti ngolo ya kutanina Ndinga na yandi na mpila nde bantu kubebisa yo ve. Na ntangu ya ntama, ntangu bo sonikaka bakopi, bantu yina sonikaka bakopi tangaka na dikebi yonso konso mukanda ya Masonuku ya Santu sambu na kundima nde bo yikaka ve, bo sobaka ve mpi bo katulaka ve ata kima mosi. Sambu beto kele bantu ya kukonda kukuka, bansoniki ya nkaka salaka mwa bifu.

BUBU YAI MPI BETO LENDA NDIMA NDE MASONUKU YA SANTU KELE TI NSANGU YA KISINA YA NZAMBI

Bubu yai kele ti bakopi mingi ya ntama ya bamaniskri ya Masonuku ya Santu. Kana kopi mosi me swaswana ti bakopi ya nkaka, bo lenda fwanisa yo sambu na kuzaba kisika yina kifu kele.—Sambu na kuzaba mambu mingi tala disolo “La Bible a-t-elle été modifiée ou falsifiée?” na jw.org.

Mu mbandu, beto tadila mikanda ya ntama yina bo bingaka Barulo ya Nzadi-Mungwa ya Kufwa yina bantu yina bo ke bingaka ba Bedouins zwaka pene-pene ya Nzadi-Mungwa ya Kufwa na 1947. Mikanda yai kele ti bitini ya Masonuku ya Santu yina bo sonikaka banda bamvula kuluta 2000 me luta. Bantu ya mayele fwanisaka bamaniskri ya ntama ti Masonuku ya Santu yina beto kele ti yo bubu yai. Inki bo monaka na kati?

Bo monaka nde mambu yonso yina kele na Ndinga ya Nzambi yina beto kele ti yo bubu yai ke wakana ti mambu yina vandaka na masonuku ya kisinaa mpi nde mambu yonso yina beto ke tangaka na Masonuku ya Santu kele Ndinga ya Nzambi ya kisina. Beto lenda ndima nde Nzambi taninaka mbote Masonuku ya Santu sambu na beto bubu yai.

Ntangu beto ke tanga Ndinga ya Nzambi, beto fwete ndima kibeni nde yo kele Ndinga ya kisina ya Nzambi. Na kuwakana ti mambu yai, disolo yina ke landa ta tubila mambu yina beto lenda longuka sambu na Nzambi na nzila ya baprofete na yandi.