Beto Sala na Bumosi Sambu na Kusamuna na Teritware Yina Bantu Ke Tubaka Bandinga Mingi

Mbala mingi bantu ke ndimaka nsangu ya Kimfumu na kiese yonso kana bo me wa yo na ndinga ya bwala na bo. Ziku yo kele kikuma yina Yehowa yidikaka mambu na Pantekoti ya mvu 33 ya ntangu na beto sambu “Bayuda ya masonga yina katukaka na makanda yonso ya nsi-ntoto” kuwa nsangu ya mbote na bandinga ya babwala na bo ata bo vandaka kutuba bandinga yina bantu mingi vandaka kutuba mu mbandu, Kiebreo to Kigreki. (Bis 2:5, 8) Bubu yai, na bisika yina bantu ke tubaka bandinga mingi, mabundu yina ke salaka balukutakanu na bandinga ya kuswaswana lenda vanda ti teritware mosi yina bo ke samunaka. Inki mutindu bansamuni ya mabundu yai lenda sala na bumosi sambu na kuta kimbangi na mutindu ya mbote sambu yo yangisa ve bawi na bo?

• 

  Kusolula (Bin 15:22): Bankengi ya kisalu ya kusamuna fwete solula sambu na kuzaba mutindu ya mbote yina lenda sadisa mabundu na kulonga nsangu ya mbote na teritware yina. Kana mabundu yina ke samunaka na bandinga ya nkaka kele ti teritware ya fioti, bo lenda lomba dibundu na beno na kukota ve na banzo yina kele na teritware ya ndinga na bo. Kansi, kana bo ke kukaka ve kumanisa kusamuna na teritware na bo ya mvimba sambu yo kele nene, bo lenda lomba beno na kuzabisa bo kana muntu mosi me monisa mpusa na teritware na bo. (od 93 § 37) To bo lenda lomba nde dibundu na beno kusadisa bo na kuzwa bantu yina ke tubaka ndinga ya dibundu na bo mpi yina ke zingaka na teritware na bo. (km 7/12 lupangu ya kele na lutiti 5) Beto vila ve nde na bisika ya nkaka, nzo mosi lenda vanda ti bantu yina ke tubaka bandinga mingi. Bangidika yina bankengi ya kisalu ke bakaka sambu na kusamuna na bateritware yina fwete wakana ti bansiku ya insi yina.

• 

  Kusala na Bumosi (Efe 4:16): Beno landa na dikebi yonso konso lutwadisu yina nkengi ya kisalu na beno ke pesa beno. Keti nge ke longukaka Biblia ti muntu yina ke tubaka ve ndinga ya dibundu na beno? Longoki lenda yela nswalu kana nge lomba mpangi mosi ya dibundu to ya kimvuku ya pene-pene yina ke tubaka ndinga na yandi na kulonguka Biblia ti yandi.

• 

  Kudibongisa (Bin 15:28; 16:1): Kana muntu mosi na teritware na beno ke tuba ndinga ya nkaka, sala ngolo sambu na kulonga yandi nsangu ya mbote. Nge lenda kudibongisa na ntwala sambu na kuzaba ndinga ya bantu ya teritware na beno sambu yo sadisa nge na kutula Babiblia mpi bavideo yina kele na ndinga na bo na telefone na nge. Nge lenda sadila mpi application JW Language sambu na kulonguka mutindu ya kupesa mbote na bandinga ya nkaka.